नागपूर पदवीधर निवडणुकीआधी शरद पवार गटाची मोठी कारवाई! नितेश कराळेंची सहा वर्षांसाठी हकालपट्टी

नागपूर पदवीधर मतदारसंघात महाविकास आघाडीचे अधिकृत उमेदवार अभिजीत वंजारी यांच्या विरोधात अपक्ष उमेदवारी कायम ठेवल्याने नितेश कराळेंची राष्ट्रवादी काँग्रेस शरद पवार पक्षातून सहा वर्षांसाठी हकालपट्टी करण्यात आली आहे.

• नितेश कराळेंची राष्ट्रवादी शरद पवार पक्षातून हकालपट्टी
• नागपूर पदवीधर मतदारसंघात उमेदवारीवरून बंडखोरी
• मतदानातून जनता उत्तर देईल, कराळेंचा विश्वास

नागपूर पदवीधर मतदारसंघातील निवडणुकीच्या पार्श्वभूमीवर राजकीय घडामोडींना वेग आला आहे. अपक्ष उमेदवारी अर्ज कायम ठेवल्याने नितेश कराळे यांची राष्ट्रवादी काँग्रेस शरद पवार पक्षातून सहा वर्षांसाठी हकालपट्टी करण्यात आली आहे. या कारवाईनंतर कराळे भावुक झाले असून, पक्षासाठी केलेल्या कामाची आठवण करून देत त्यांनी आपली नाराजी व्यक्त केली.

नागपूर पदवीधर मतदारसंघातून महाविकास आघाडीने अभिजीत वंजारी यांना अधिकृत उमेदवारी दिली आहे. मात्र, नितेश कराळे यांनी अपक्ष म्हणून निवडणूक लढवण्याचा निर्णय घेत आपला उमेदवारी अर्ज कायम ठेवला. त्यामुळे पक्षाने त्यांच्यावर शिस्तभंगाची कारवाई करत सहा वर्षांसाठी हकालपट्टी केल्याची माहिती समोर आली आहे.

पक्षासाठी 110 सभा घेतल्या, कराळे भावुक

हकालपट्टीची माहिती माध्यमांमधून मिळाल्याचं सांगताना कराळे यांनी पक्षाच्या निर्णयाचा स्वीकार करत असल्याचं म्हटलं. मात्र, ही कारवाई चुकीची असल्याची भावना त्यांनी व्यक्त केली.

Mumbai News : ज्ञानेश कुमारांविरोधात पुन्हा एल्गार! SIR वरून मुंबईत युवक काँग्रेस आक्रमक

“पक्षासाठी 110 सभा घेतल्या. विधानसभा आणि लोकसभा निवडणुकीत राज्यभर फिरून प्रचार केला. स्वतःच्या क्लासकडे दुर्लक्ष करून पक्षासाठी काम केलं,” असं कराळे यांनी सांगितलं.

पक्षासाठी इतकं काम करूनही आपल्यावर कारवाई झाल्याने ते भावुक झाल्याचं दिसून आलं. आता या संपूर्ण प्रकरणात मतदार काय निर्णय घेतात, याकडे त्यांचं लक्ष असल्याचं त्यांनी स्पष्ट केलं.

काँग्रेसच्या दबावामुळे कारवाई झाली का?

या कारवाईमागे काँग्रेसकडून पक्षावर दबाव टाकला जात असावा, अशी शंका कराळे यांनी व्यक्त केली. महाविकास आघाडीचा अधिकृत उमेदवार आणि अपक्ष उमेदवार यांच्यातील लढतीमुळे नागपूर पदवीधर मतदारसंघातील राजकीय समीकरणांची चर्चा सुरू झाली आहे.

मतदानातून जनता उत्तर देणार?

23 ऑक्टोबर रोजी होणाऱ्या मतदानाच्या पार्श्वभूमीवर कराळे यांनी मतदारांवर विश्वास व्यक्त केला. पक्षाच्या निर्णयाबाबत आपली भूमिका मांडल्यानंतर आता जनता मतदानातून उत्तर देईल, असं ते म्हणाले.

दरम्यान, नितेश कराळेंच्या हकालपट्टीचा निवडणुकीवर नेमका काय परिणाम होतो आणि मतदार कोणाला कौल देतात, हे मतदानानंतर स्पष्ट होणार आहे.

Rohit Pawar PC: SIR – निवडणूक आयोगाचे कारनामे’ दाखवत रोहित पवारांचा धक्कादायक खुलासा