मोठी बातमी ! संसदेचे अधिवेशन संपल्यानंतर मंत्रिमंडळ विस्तार होण्याची शक्यता; राघव चड्ढांना केंद्रीय मंत्रिमंडळात संधी?

संसदेच्या पावसाळी अधिवेशनादरम्यान लोकसभा आणि राज्यसभेचे कामकाज विस्कळीत झाले असताना, पंतप्रधान नरेंद्र मोदी आणि केंद्रीय गृहमंत्री अमित शाह यांच्या भेटींमुळे राजकीय वातावरण तापले आहे.

नवी दिल्ली : आम आदमी पक्ष सोडून भाजपमध्ये सहभागी झालेल्या राघव चड्ढांनी पंतप्रधान नरेंद्र मोदी यांच्यासोबतच्या झालेल्या भेटीचे फोटो शेअर केले आहेत. यापूर्वी चड्ढा यांनी राज्यसभेतील भाजपच्या नवीन खासदारांच्या नाश्त्याच्या बैठकीत पंतप्रधानांची भेट घेतली होती. भाजपचे केंद्रीय नेतृत्व राघव चड्ढांना मोठी भूमिका देणार असल्याची चर्चा आहे.

पंतप्रधानांना भेटल्यानंतर राघव चड्ढांनी लिहिले, ‘ही सकाळ मी नेहमी लक्षात ठेवेन’. संसदेच्या पावसाळी अधिवेशनादरम्यान लोकसभा आणि राज्यसभेचे कामकाज विस्कळीत झाले असताना, पंतप्रधान नरेंद्र मोदी आणि केंद्रीय गृहमंत्री अमित शाह यांच्या भेटींमुळे राजकीय वातावरण तापले आहे. १३ ऑगस्ट रोजी अधिवेशन संपल्यानंतर सरकार केंद्रीय मंत्रिमंडळात फेरबदल करू शकते, अशी चर्चा आहे. नीट पेपरफुटी प्रकरणी धर्मेंद्र प्रधान यांच्या राजीनाम्यानंतर, सर्वांचे लक्ष नव्या शिक्षणमंत्र्यांवर लागले आहे.

‘आप’मधून भाजपमध्ये सहभागी झालेले राज्यसभा खासदार राघव चड्ढा चर्चेत आहेत. भाजप त्यांना मोठी भूमिका देऊ शकते, असा दावा केला जात आहे. सध्याच्या परिस्थितीत, राघव चड्ढा भाजपसाठी एक उपयुक्त अस्त्र म्हणून समोर आले आहेत.

जनरेशन झेडच्या आंदोलनामुळे रणनीती बदलली

राजकीय वर्तुळात अशी चर्चा आहे की, जंतरमंतर येथील जनरेशन झेडच्या आंदोलनामुळे भाजपची रणनीती बदलली आहे. पंतप्रधान नरेंद्र मोदींच्या नवीन टीममध्ये अनुभवी चेहऱ्यांपेक्षा अधिक उत्साही चेहऱ्यांचा समावेश असेल. पंतप्रधान मोदी केवळ ‘जनरेशन झेड’सोबत आपले संबंध वाढवत नाहीत, तर २०२९ पर्यंत प्रभावी राहणाऱ्या एका मोठ्या धोरणावरही काम करत आहेत.

भाजप राघव चड्ढांवर लावू शकते डाव

जनरेशन झेडसोबत असलेले त्यांचे घट्ट नाते आणि तीन भाषांवरील प्रभुत्व लक्षात घेता, भाजप पंजाब निवडणुकीत त्यांचा वापर करू इच्छित असल्याची चर्चा आहे. राघव चड्ढा यांनी यापूर्वी भाजपच्या नवीन खासदारांसोबत राज्यसभेत पंतप्रधान नरेंद्र मोदी यांची भेट घेतली होती. या भेटीचे फोटोही प्रसिद्ध झाले होते. आता त्यांच्या एकांतात झालेल्या भेटीमुळे राजकीय वातावरण तापले आहे.

मी पंतप्रधानांचा आभारी

आपल्या इन्स्टाग्राम पोस्टवर राघव चड्ढा यांनी लिहिले, ही एक अशी सकाळ आहे जी मी नेहमी लक्षात ठेवेन. मला पंतप्रधान नरेंद्र मोदी यांना भेटण्याची संधी मिळाली. आमचे सविस्तर आणि उत्तम संभाषण झाले. त्यांच्या वेळेबद्दल आणि त्यांच्या समजूतदारपणा व मार्गदर्शनाचा लाभ घेण्याच्या संधीबद्दल मी त्यांचा खूप आभारी आहे.

‘जात प्रमाणपत्र देताना अधिकारी खोडसाळपणा करतात’; मनोज जरांगेनंतर आता नरेंद्र पाटलांचा सरकारला आंदोलनाचा इशारा