Satara District Bank Election: सातारा जिल्हा बँक निवडणुकीचं राजकारण तापणार; रामराजे, शिवेंद्रसिंहराजे अन् मकरंद पाटलांची खलबते

Satara District Bank Election: बँकेतील बैठकीनंतर शिवेंद्रसिंहराजे यांनी सुरुची निवासस्थानी माध्यमांशी संवाद साधला. त्यानंतर त्यांनी जलमंदिर पॅलेस येथे जाऊन उदयनराजे भोसले यांची भेट घेतली. दोन्ही नेत्यांमध्ये सुमारे तासभर चर्चा झाली.

• सातारा जिल्हा बँक निवडणुकीसाठी अर्ज भरण्याच्या प्रक्रियेदरम्यान ज्येष्ठ नेत्यांच्या बैठकांना वेग
• बँक इमारतीत १.५ तास तर जलमंदिर पॅलेसवर शिवेंद्रसिंहराजे व उदयनराजेंमध्ये १ तास चर्चा
• रामराजे नाईक-निंबाळकर, मकरंद पाटील, नितीन पाटील व शिवेंद्रसिंहराजे एकाच व्यासपीठावर

Satara District Bank Election: सातारा जिल्हा मध्यवर्ती सहकारी बँकेच्या निवडणुकीतील उमेदवारी अर्ज दाखल करण्याची प्रक्रिया सुरू असतानाच जिल्ह्याच्या राजकारणातील प्रमुख नेत्यांच्या भेटीगाठींना अचानक वेग आला आहे. सोमवारी जिल्हा बँकेच्या चौथ्या मजल्यावर झालेली वरिष्ठ नेत्यांची दीड तासांची बैठक आणि त्यानंतर जलमंदिर पॅलेसवर शिवेंद्रसिंहराजे भोसले व खासदार उदयनराजे भोसले यांच्यात झालेली सुमारे तासभराची चर्चा यामुळे बँकेच्या निवडणुकीचे राजकीय गणित पुन्हा चर्चेत आले आहे.

बँकेच्या निवडणुकीच्या निमित्ताने राज्याचे सार्वजनिक बांधकाम मंत्री शिवेंद्रसिंहराजे भोसले, मदत व पुनर्वसन मंत्री मकरंद पाटील, खासदार नितीन पाटील आणि बँकेचे संचालक रामराजे नाईक-निंबाळकर एकाच ठिकाणी आले.

Chitra Wagh : ‘काँग्रेस जिंकली तर आयोग चांगला, भाजप जिंकला तर वाईट?’ ठाकरे बंधूंच्या मोर्चाआधी चित्रा वाघांचा टोला

 

उदयनराजे भोसले यांची गृहनिर्माण मतदारसंघातून अर्ज

जिल्हा बँकेच्या निवडणुकीत यंदा सुरुवातीपासूनच प्रमुख राजकीय व्यक्तींच्या उमेदवारीकडे लक्ष लागले आहे. खासदार उदयनराजे भोसले यांनी गृहनिर्माण मतदारसंघातून अर्ज दाखल करून निवडणूक प्रक्रियेत आपली उपस्थिती नोंदविली, त्यानंतर रामराजे नाईक-निबाळकर यांनी प्रक्रिया उद्योग मतदारसंघातून अर्ज दाखल केला. गत निवडणुकीत सोसायटी मतदारसंघातील ११ जागा बिनविरोध झाल्या होत्या. उर्वरित दहा जागांसाठी निवडणूक झाली होती. त्यामुळे यंदा अर्ज दाखल करण्याच्या सुरुवातीच्या टप्प्यातच प्रमुख नेत्यांच्या हालचाली सुरू झाल्याने पुढील काही दिवसांत कोणत्या मतदारसंघात कोणाचे नाव पुढे येते, याकडे लक्ष लागले आहे.

 

जलमंदिरवरची भेट ठरली चर्चेचा विषय

बँकेतील बैठकीनंतर शिवेंद्रसिंहराजे यांनी सुरुची निवासस्थानी माध्यमांशी संवाद साधला. त्यानंतर त्यांनी जलमंदिर पॅलेस येथे जाऊन उदयनराजे भोसले यांची भेट घेतली. दोन्ही नेत्यांमध्ये सुमारे तासभर चर्चा झाली. या चर्चेचा तपशील समोर आलेला नसला तरी बँकेच्या निवडणुकीची प्रक्रिया सुरू असताना दोन्ही राजांची झालेली भेट राजकीय वर्तुळात चर्चेचा विषय ठरली.

Pune News: पुणे मेट्रोच्या विस्ताराला राज्याची मोठी चालना; तीन मार्गांसाठी १८० कोटींचा निधी मंजूर

शिवेंद्रसिंहराजे यांनीही अंतिम निर्णयापूर्वी आणखी चर्चा होणार असल्याचे स्पष्ट केले आहे. उमेदवारी अर्ज दाखल करण्यासाठी अद्याप अवधी असल्याने पुढील काही दिवसांत बैठका, भेटीगाठी आणि राजकीय चर्चा यांना वेग येण्याची शक्यता आहे. त्यामुळे सोमवारी झालेल्या बैठकांमधून कोणता राजकीय संदेश बाहेर पडतो आणि त्याचे प्रतिबिंब उमेदवारी अर्जामध्ये कसे उमटते, याकडे आता जिल्ह्याचे लक्ष लागले आहे.

 

महायुतीतील घटक पक्षांशी चर्चा करूनच पुढील दिशा

चौथ्या मजल्यावरील या बैठकीत नेमकी कोणती चचर्चा झाली, याचा तपशील अधिकृतपणे समोर आलेला नाही. मात्र, बैंकेच्या २१ संचालकांच्या निवडीच्या पाश्र्वभूमीवर या बैठकीकडे राजकीयदृष्ट्‌या लक्ष वेधले गेले आहे. याचदरम्यान शिवेंद्रसिंहराजे यांनी मुख्यमंत्री देवेंद्र फडणवीस याव्या सूचनेनुसार पुढील निर्णय होतील, असे स्पष्ट केले. महायुतीतील घटक पक्षांशी चर्चा करूनच पुढील दिशा ठरविली जाईल, असेही त्यांनी सांगितले. त्यामुळे उमेदवारी अर्ज दाखल होत असले तरी अंतिम राजकीय समीकरण अद्याप आकाराला आलेले नसल्याचे संकेत मिळत आहेत.