रविवार, 8 नोव्हेंबर 2026
Sonia Gandhi : हे राजकीय पुस्तक नाही, तर खासगी आयुष्याची कहाणी; सोनिया गांधींचे स्पष्टीकरण, सौजन्य : आयएएनएस
काँग्रेसच्या ज्येष्ठ नेत्या सोनिया गांधी (Sonia Gandhi) यांनी त्यांच्या आगामी पुस्तकावरून सुरू झालेल्या चर्चेला अखेर उत्तर दिले आहे. ‘हे एक राजकीय पुस्तक नसून माझ्या कुटुंबाच्या खासगी आयुष्याची कहाणी आहे, असे स्पष्ट करत त्यांनी आपल्या पुस्तकाचा उद्देश सांगितला. कुटुंबातील नाती, संघर्ष, अनुभव आणि माणुसकीच्या विविध पैलूंचे प्रामाणिक चित्रण या पुस्तकात करण्यात आल्याचे त्यांनी म्हटले आहे.
सोनिया गांधी यांनी रविवारी सोशल मीडिया प्लॅटफॉर्म ‘एक्स’वर पहिली वैयक्तिक पोस्ट केली. याच पोस्टद्वारे त्यांनी सोशल मीडियावर वैयक्तिक उपस्थितीची सुरुवात केली. या पोस्टमध्ये त्यांनी दिवंगत पती आणि माजी पंतप्रधान राजीव गांधी यांच्या आठवणींना उजाळा दिला. राजीव गांधी यांचे व्यक्तिमत्त्व अत्यंत आकर्षक आणि स्वभाव सौम्य होता, असे त्यांनी नमूद केले.
यापूर्वी गुरुवारी सोनिया गांधी यांनी इन्स्टाग्रामवरही पदार्पण केले होते. तेथे त्यांनी आपल्या आगामी पुस्तकाचा उल्लेख करत ही ‘प्रेम, कर्तव्य, विरह आणि आपलेपणाच्या शोधाची कहाणी’ असल्याचे सांगितले होते.
सोनिया गांधी यांच्या 544 पानी पुस्तकाचे नाव ‘बिलाँगिंग : अ जर्नी ऑफ लव्ह’ (Belonging: A Journey of Love) असे आहे. या पुस्तकाचे जागतिक प्रकाशन 10 नोव्हेंबर रोजी होणार आहे. भारतात हार्परकॉलिन्स इंडिया या पुस्तकाचे प्रकाशन करणार आहे. यापूर्वी पुस्तकाच्या प्रकाशनावरून लेखिकेच्या प्रतिनिधी आणि पेंग्विन रँडम हाऊस इंडिया यांच्यात मतभेद निर्माण झाले होते. मात्र, हा पेच आता सुटल्याचे सांगण्यात येत आहे.
NCP Merger : दोन्ही राष्ट्रवादी एकत्र येणार? विलिनीकरणाच्या चर्चांवर उदय सामंतांचं मोठं विधान!
पुस्तक लिहिण्याच्या निर्णयाबाबत सोनिया गांधी यांनी ‘एक्स’वरील पोस्टमध्ये सांगितले की, आपल्या कुटुंबाचे अधिक खासगी आणि वास्तववादी चित्र लोकांसमोर मांडण्याची त्यांची इच्छा होती. कुटुंबाबद्दल अनेक गोष्टी लिहिल्या गेल्या आहेत; मात्र त्या व्यक्ती प्रत्यक्षात कशा होत्या, त्यांच्या प्रेरणा, संघर्ष आणि मानवी मर्यादा काय होत्या, याचे चित्रण क्वचितच झाले आहे. आपण ओळखलेल्या आणि प्रेम केलेल्या व्यक्तींना प्रामाणिकपणे मांडण्याचा प्रयत्न या पुस्तकातून केला असल्याचे त्यांनी स्पष्ट केले.
दरम्यान, सोनिया गांधी यांच्या आगामी पुस्तकावरून भाजपने प्रश्न उपस्थित केले आहेत. या पुस्तकात वैयक्तिक अनुभवांऐवजी राजकीय टीका करण्यात आल्याचा भाजपचा आरोप आहे. पुस्तकाच्या प्रकाशनापूर्वी सोनिया गांधी यांनी ‘द हिंदू’ वृत्तपत्राला दिलेल्या मुलाखतीत नरेंद्र मोदी सरकारवर टीका केली होती. सरकारमुळे देशातील लोकशाही संस्थांचे मोठे नुकसान होत असल्याचा आरोप त्यांनी केला होता. मुख्य प्रवाहातील माध्यमांवर नियंत्रण आणि राजकीय फायद्यासाठी धर्माचा वापर होत असल्याचेही त्यांनी म्हटले होते.
याशिवाय, 1975 मध्ये लागू करण्यात आलेल्या आणीबाणीच्या घटनात्मक आधाराचेही सोनिया गांधी यांनी समर्थन केले होते. त्यांच्या या विधानानंतर भाजप नेत्यांनी तत्कालीन पंतप्रधान इंदिरा गांधी यांच्या काळातील आणीबाणीचे समर्थन करण्याचा प्रयत्न केल्याचा आरोप केला.
आतापर्यंत सोनिया गांधी वैयक्तिक सोशल मीडिया खात्यांपासून दूर राहिल्या होत्या. त्यांची विधाने आणि संदेश प्रामुख्याने काँग्रेसच्या अधिकृत ‘एक्स’ खात्यावरून प्रसिद्ध होत असत. मात्र, पुस्तकाच्या प्रकाशनाच्या पार्श्वभूमीवर त्यांनी एक्स आणि इन्स्टाग्रामवर सक्रिय होण्यास सुरुवात केली आहे. त्यामुळे त्यांच्या सार्वजनिक संवादातील हा बदल महत्त्वाचा मानला जात आहे.
Ans: सोनिया गांधी यांच्या पुस्तकाचे नाव 'Belonging: A Journey of Love' असे आहे.
Ans: कुटुंब, नाती, प्रेम, कर्तव्य, विरह, संघर्ष आणि वैयक्तिक अनुभव यांचा पुस्तकात समावेश आहे.
Ans: हे राजकीय पुस्तक नसून आपल्या कुटुंबाच्या खासगी आयुष्याची आणि अनुभवांची कहाणी असल्याचे त्यांनी स्पष्ट केले आहे.
