Sunil Tatkare : ‘रामदास कदम माझ्या पाया पडले होते’; सुनील तटकरे यांचा खळबळजनक दावा, कायदेशीर नोटीसही देणार!

Sunil Tatkare : शिंदे गटाचे नेते रामदास कदम आणि राष्ट्रवादी काँग्रेसचे खासदार सुनील तटकरे यांच्यातील राजकीय वाद आता चांगलाच पेटला आहे. रामदास कदम माझ्या पाया पडले होते, त्यांनी मंत्रिपदाची मागणी केली होती, असा खळबळजनक दावा तटकरे यांनी केला.

• सुनील तटकरे आणि रामदास कदमांमध्ये जुंपली
• अजित पवारांच्या अपघातात तटकरेंची चौकशी करण्याची कदमांची मागणी
• तटकरे कदमांना कायदेशीर नोटीस पाठवणार

 

मुंबई : महाराष्ट्राच्या राजकारणात सुनील तटकरे आणि रामदास कदम यांच्यातील वाद आता चांगलाच रंगताना दिसत आहे. एकमेकांवर आरोप-प्रत्यारोपांच्या फैरी झाडल्या जात असताना खासदार सुनील तटकरे यांनी रामदास कदम यांच्याबाबत मोठा दावा केला आहे. नारायण राणे यांनी शिवसेना सोडली, त्यावेळी रामदास कदम माझ्याकडे आले होते. माझ्या पाया पडून त्यांनी विनवणी केली होती, असा दावा तटकरे यांनी केला आहे.

सुनील तटकरे म्हणाले की, नारायण राणे यांनी शिवसेना सोडल्यानंतर रामदास कदम माझ्याकडे आले होते. त्यावेळी मी त्यांना माझ्या गाडीतून अजित पवार यांच्याकडे घेऊन गेलो होतो. अजितदादा त्यावेळी विरोधी पक्षनेते होते. या सगळ्या गोष्टी खोट्या असतील तर रामदास कदम यांनी आपण मानत असलेल्या जागृत देवस्थानात येऊन सांगावं, असं आव्हानही तटकरे यांनी दिलं.

2009 च्या पराभवानंतर मंत्रिपद मागितल्याचा दावा

2009 मध्ये निवडणुकीत पराभव झाल्यानंतर रामदास कदम आपल्याला भेटायला आले होते. त्यावेळी त्यांनी मंत्रिपदाची मागणी केली होती, असा दावा तटकरे यांनी केला.

Ajit Pawar Accident Case : अजितदादांच्या अपघाताबाबत 90 टक्के लोकांना घातपाताचा संशय? 15 नोव्हेंबरला रोहित पवार मोठा खुलासा करणार!

आंबेसीटर हॉटेलमध्ये कदम आपल्याला भेटले होते. ते राष्ट्रवादी काँग्रेसमध्ये येण्यास इच्छुक होते. विरोधी पक्षनेतेपद मिळवण्यासाठी राष्ट्रवादीत जाण्याची धमकी दिली होती, असंही तटकरे यांनी सांगितलं.

रामदास कदमांना कायदेशीर नोटीस देणार

रामदास कदम यांनी केलेले आरोप पूर्णपणे खोटे असल्याचं सांगत तटकरे यांनी त्यांचा निषेध केला. कदम यांच्या वक्तव्यांवरून त्यांनी तीव्र नाराजी व्यक्त केली. तसेच रामदास कदम यांना कायदेशीर नोटीस पाठवणार असल्याचा इशाराही दिला. अंतुले यांच्याबाबत केलेल्या वक्तव्यांवरूनही तटकरे यांनी कदम यांच्यावर टीका केली.

यापुढे कदमांवर बोलणार नाही!

या वादावर बोलताना सुनील तटकरे यांनी यापुढे रामदास कदम यांच्याबाबत बोलणार नसल्याचं स्पष्ट केलं. गेल्या 40 वर्षांपासून आपण लोकांची सेवा करत असून शरद पवार आणि अजित पवार यांनी आपल्याला अनेक जबाबदाऱ्या दिल्या आहेत, असंही त्यांनी सांगितलं.
दरम्यान, राष्ट्रवादी काँग्रेसच्या विलीनीकरणाचा विषय आता संपला असल्याचं वक्तव्यही तटकरे यांनी केलं. त्यामुळे तटकरे आणि कदम यांच्यातील हा वाद आगामी काळात आणखी कोणतं राजकीय वळण घेतो, याकडे सर्वांचं लक्ष लागलं आहे.

Ramdas Kadam on Sunil Tatkare : अजित पवारांच्या अपघातात सुनील तटकरेंचा हात? रामदास कदमांच्या आरोपांनी राजकारणात मोठी खळबळ