Political News : सुषमा अंधारेंनी अभिनेत्री प्राजक्ता माळीला धरले धारेवर; “महिला अत्याचारावर ब्र शब्द नाही अन्…

अभिनेत्री प्राजक्ता माळी हिने मुख्यमंत्री देवेंद्र फडणवीसांचे जोरदार कौतुक केले. मात्र यावरुन ठाकरे गटाच्या उपनेत्या सुषमा अंधारे यांनी निशाणा साधला.

Maharashtra Politics : मुंबई : मराठी चित्रपटसृष्टीतील यशस्वी अभिनेत्री आणि लाखो चाहत्यांना घायाळ करणारी अभिनेत्री प्राजक्ता माळी (prajakta mali) ही पुन्हा एकदा चर्चेत आली आहे. अनेकदा राजकीय नेत्यांची टीका आणि कार्यक्रमांमुळे चर्चेत असलेली प्राजक्ता माळी ही एका कार्यक्रमामध्ये सहभागी झाली होती. यावेळी तिने मुख्यमंत्री देवेंद्र फडणवीस हे महिलांचा आदर्श करण्यामध्ये अग्रस्थानी असल्याचे म्हणत स्तुतीसुमने उधळली. मात्र यावरुन ती विरोधकांच्या निशाण्यावर आली आहे. अभिनेत्री प्राजक्ता माळीवर शिवसेना ठाकरे गटाच्या उपनेत्या सुषमा अंधारेंनी (Sushma Andhare) निशाणा साधला आहे.

नारी शक्ती वंदन कार्यक्रमामध्ये मुख्यमंत्री देवेंद्र फडणवीस यांच्यासह अभिनेत्री प्राजक्ता माळी देखील सहभागी झाली होती. यावेळी संबोधताना प्राजक्ताने मुख्यमंत्री फडणवीसांचे तोंड भरुन कौतुक केले. ती म्हणाली की ,”भोंदूबाबा प्रकरण मुख्यमंत्री यांनी अत्यंत कठोरपणे हाताळलंय, महाराष्ट्रातील प्रत्येकानं मुख्यमंत्री देवेंद्र फडणवीस यांच्याकडून शिकलं पाहिजे, महिलांचा सन्मान कसा केला पाहिजे हे शिकलं पाहिजे…” पुढे ती म्हणाली की, “मी आवर्जुन उल्लेख करेल. आता महाराष्ट्रात जे काही घडत आहे, भोंदूबाबामुळे जे काही चाललेलं आहे, अतिशय संवेदनशीलतेने मुख्यमंत्र्यांनी हा प्रकार हाताळला आहे. म्हणजे, जिथे बापाप्रमाणे कठोर व्हायला पाहिजे, तिथे ते कठोर होतात. जिथे आईचं ममत्व पाहिजे, तिथे त्या पद्धतीनं त्या गोष्टी हाताळतात…”

हे देखील वाचा : “BJP ने काही भुंकणारी कुत्री पाळली आहेत…: MP संजय राऊतांचे निशिकांत दुबेंवर टीकास्त्र

“त्याचबरोबर ते जेव्हा माईकवर बोलतात. विशेषतः जेव्हा जेव्हा आपण त्यांना टीव्हीवर ऐकतो, पाहतो. तेव्हा त्यांच्यावर कितीही चिखलफेक होत असली, ट्रोलिंग होत असलं तरीही त्यांच्या वाणीतून कधीही चुकीचा शब्द बाहेर पडलेला नाही. मी आजपर्यंत कधीच ऐकला नाही. अहो चुकीचा शब्द सोडा त्यांचा सूर कधी ढळलेला मी पाहिला नाही…”, अशा शब्दांत अभिनेत्री प्राजक्ता माळी हिने मुख्यमंत्री देवेंद्र फडणवीस यांचे तोंडभरुन कौतुक केले. मात्र यावरुन विरोधकांनी टोला लगावला आहे.

हे देखील वाचा : नाशिक धर्मांतर प्रकरण! अखेर फरार निदा खान आली समोर, “मी प्रेग्नंट आहे” म्हणत न्यायालयाकडे मागितला दिलासा

ठाकरे गटाच्या उपनेत्या सुषमा अंधारे यांनी एक्स या सोशल मीडिया प्लॅटफॉर्मवर पोस्ट करुन निशाणा साधला. सुषमा अंधारे यांनी लिहिले आहे की, प्राजक्ताजी तुम्ही हास्य जत्रेच्या निवेदिका आहात आणि हा कार्यक्रम आम्ही आवडीने बघतो. पण राज्यातल्या एकूण महिला लैंगिक शोषणाच्या एकाही प्रश्नावर ब्र शब्द न करणाऱ्या तुम्ही मुख्यमंत्र्यांच्या ब्रँडिंग वर बोलायला लागलात तर हास्यजत्रे मधल्या स्कीट पेक्षा सुद्धा ते जास्त हास्यास्पद वाटायला लागेल… अशी घणाघाती टीका सुषमा अंधारेंनी केली आहे.

See more

प्राजक्ताजी तुम्ही हास्य जत्रेच्या निवेदिका आहात आणि हा कार्यक्रम आम्ही आवडीने बघतो.
पण राज्यातल्या एकूण महिला लैंगिक शोषणाच्या एकाही प्रश्नावर ब्र शब्द न करणाऱ्या तुम्ही मुख्यमंत्र्यांच्या ब्रँडिंग वर बोलायला लागलात तर हास्यजत्रे मधल्या स्कीट पेक्षा सुद्धा ते जास्त… pic.twitter.com/kWAjeYkDYm — SushmaTai Andhare (@andharesushama) April 16, 2026