Rohit Pawar : ‘अजितदादांचा पक्ष सक्षम नाही, अर्थखातं फडणवीसांनी चोरलं,’ रोहित पवारांच्या विधानाने खळबळ

Rohit Pawar : पुणे पदवीधर निवडणुकीच्या पार्श्वभूमीवर आमदार रोहित पवार यांनी अजित पवारांच्या पक्षाची ताकद कमी केल्याचा आरोप केला. अर्थखात्यावरून देवेंद्र फडणवीसांना लक्ष्य करत त्यांनी शक्तिपीठ महामार्गातील खर्च, शेतकरी मदत आणि बारामतीतील परिस्थितीवरही प्रश्न उपस्थित केले.

• ‘पुणे पदवीधरची जागा अजितदादांच्या पक्षाला मिळायला हवी होती’ – रोहित पवार
• शक्तिपीठ महामार्गातील 40 हजार कोटींच्या खर्चावरून सवाल
• बारामतीतील गुंडगिरी आणि तलाठ्यांच्या कारभारावर रोहित पवारांची टीका

 

पुणे पदवीधर मतदारसंघाच्या निवडणुकीच्या पार्श्वभूमीवर राष्ट्रवादी काँग्रेस शरद पवार पक्षाचे आमदार रोहित पवार (Rohit Pawar) यांनी राज्यातील राजकीय घडामोडींवर भाष्य करत सत्ताधाऱ्यांना लक्ष्य केलं. अजित पवार यांच्या पक्षाची ताकद कमी करण्यात आल्याचा आरोप करत त्यांनी पुणे पदवीधरची जागा अजितदादांच्या पक्षाला मिळायला हवी होती, असं मत व्यक्त केलं. यावेळी त्यांनी मुख्यमंत्री देवेंद्र फडणवीस यांच्यावरही टीका केली.

रोहित पवार म्हणाले की, अजित पवार यांच्या पक्षाची ताकद कुठेतरी कमी करण्यात आली आहे. अर्थखातं देवेंद्र फडणवीस यांनी घेतल्याची टीका करताना, आता ते खातं परत मागण्याची धमक अजितदादांच्या पक्षाकडे नसल्याचंही ते म्हणाले.

पुणे पदवीधर मतदारसंघाच्या निमित्ताने रोहित पवार यांनी मतदारांशी संवाद साधला. त्यानंतर माध्यमांशी बोलताना त्यांनी राज्यातील राजकीय परिस्थितीवर आपली भूमिका मांडली.

Eknath Shinde : ‘मी धाडस केलं नसतं तर…’ शिवसेना बंडखोरीची आठवण काढत एकनाथ शिंदेंचा महाविकास आघाडीला टोला

शक्तिपीठ महामार्गावरून सरकारला सवाल

शक्तिपीठ महामार्गाच्या खर्चावरूनही रोहित पवार यांनी सरकारला धारेवर धरलं. या प्रकल्पात 40 हजार कोटी रुपयांच्या खर्चाचा मुद्दा उपस्थित करत त्यांनी हा खर्च थांबवण्याची मागणी केली. शेतकऱ्यांना केवळ पाच हजार रुपयांची मदत देण्यावरूनही त्यांनी सरकारला सवाल केला.

पेट्रोल-डिझेलचे दर आणि खतांच्या किमती वाढल्याने सामान्य नागरिकांवर आर्थिक भार पडत असल्याचं रोहित पवार म्हणाले. शेतकऱ्यांना मदत मिळावी, यासाठी आपला संघर्ष सुरू असल्याचंही त्यांनी स्पष्ट केलं. महाकुंभातील कथित भ्रष्टाचाराच्या मुद्द्यावरून त्यांनी मंत्री गिरीश महाजन यांच्यावरही टीका केली.

बारामतीतील परिस्थितीवरूनही निशाणा

बारामतीत गुंडगिरी वाढल्याचा आरोप करत रोहित पवार यांनी तलाठी कार्यालयांतील कथित गैरव्यवहाराबाबतही भाष्य केलं. मोठ्या प्रमाणात पैसे घेऊन कामं केली जात असल्याचं नागरिक सांगत असल्याचा दावा त्यांनी केला.

2029 च्या निवडणुकीसाठी महाराष्ट्रभर सक्रिय होणार

रोहित पवार यांनी आगामी राजकीय वाटचालीबाबतही संकेत दिले. 2029 च्या निवडणुकीत जास्तीत जास्त उमेदवार निवडून आणण्यासाठी आपण संपूर्ण महाराष्ट्रात सक्रिय होणार असल्याचं त्यांनी सांगितलं.

दरम्यान, स्वाभिमानी शेतकरी संघटनेचे राजू शेट्टी यांनी उपस्थित केलेल्या शेतकऱ्यांच्या प्रश्नालाही रोहित पवार यांनी पाठिंबा दर्शवला. पाणीटंचाईमुळे ऊस जळण्याची भीती असल्याचं सांगत त्यांनी शेतकऱ्यांच्या अडचणींकडे लक्ष वेधलं. अजित पवार आज असते, तर एमपीएससीच्या विद्यार्थ्यांना आंदोलन करण्याची वेळ आली नसती, असंही ते म्हणाले.

Sanjay Raut : सहा महिन्यांत मोदी सरकार कोसळणार? संजय राऊतांचा मोठा दावा; मोदींच्या जागी कोण येणार, राऊतांनी दिले संकेत