AUS vs ENG : जो रूटने लाज राखली, शतक केले नसते तर…! मॅथ्यू हेडनच्या मुलीची प्रतिक्रिया आली समोर

ग्रेसने मानले आभार

हेडनची मुलगी ग्रेस म्हणाली होती, “कृपया शतक ठोका, रूट.” गॅब्बा येथे ऑस्ट्रेलियाविरुद्धच्या गुलाबी चेंडूच्या कसोटीच्या पहिल्या दिवशी रूटने शानदार शतक ठोकले तेव्हा हेडनला दिलासा मिळाला. ग्रेसलाही दिलासा मिळाला. तिने इंस्टाग्राम स्टोरीजवर लिहिले, “धन्यवाद रूट, तू आमच्या सर्वांचे डोळे वाचवलेस.”

गुरुवारी ब्रिस्बेन येथे झालेल्या दुसऱ्या अ‍ॅशेस कसोटी सामन्याच्या पहिल्या दिवशी ऑस्ट्रेलियाच्या भूमीवर पहिले कसोटी शतक झळकावल्यानंतर मॅथ्यू हेडनने इंग्लंडचा दिग्गज फलंदाज जो रूटचे अभिनंदन केले.

इंस्टाग्रामवर शेअर केलेल्या व्हिडिओमध्ये हेडन म्हणाला, “ऑस्ट्रेलियामध्ये शतक ठोकल्याबद्दल अभिनंदन, मित्रा. त्यासाठी तुला बराच वेळ लागला आणि प्रामाणिकपणे सांगायचे तर, माझ्यापेक्षा या खेळात कोणालाही जास्त रस नव्हता. मी तुझ्या शतकाची वाट पाहत होतो. दहा अर्धशतके आणि शेवटी शतक ठोकल्याबद्दल अभिनंदन. आयुष्य पूर्ण जगा आणि त्याचा पुरेपूर आनंद घ्या.”

रूटने त्याचे ४० वे कसोटी शतक झळकावले

रूटने ऑस्ट्रेलियन भूमीवर १८१ चेंडूत पहिले शतक पूर्ण केले. हे रूटचे ४० वे कसोटी शतक होते. इंग्लंडच्या माजी कर्णधाराने ऑस्ट्रेलियात पहिले शतक पूर्ण करण्यासाठी ३० डाव घेतले. गॅबा कसोटीच्या पहिल्या दिवशी शतक झळकावणारा तो मॉरिस लेलँडनंतर दुसरा इंग्लिश खेळाडू ठरला. गॅबा येथे इंग्लंडसाठी कसोटी शतक झळकावणारा रूट आठवा फलंदाज ठरला.

रूट १३५ धावांवर नाबाद 

पहिल्या दिवसाचा खेळ थांबला तेव्हा इंग्लंडने ७४ षटकांत ९ बाद ३२५ धावा केल्या होत्या. जो रूट २०२ चेंडूत १३५ धावा करत नाबाद राहिला, तर जोफ्रा आर्चर २६ चेंडूत ३२ धावा करत नाबाद राहिला. पहिल्या दिवशी ऑस्ट्रेलियाकडून मिचेल स्टार्कने सहा बळी घेतले. दुसऱ्या कसोटीच्या दुसऱ्या दिवशी ऑस्ट्रेलियाचा संघ आणखी एका बळीच्या शोधात असेल.

संबंधित बातम्या