अनेक स्टार खेळाडू क्रिकेटच्या खेळातून निवृत्ती घेत असताना आता बांग्लादेशच्या (Bangladesh) एका अष्टपैलू खेळाडूचे नाव देखील यात समाविष्ठ झाले आहे. बांग्लादेशचा स्टार क्रिकेटर मुशफिकुर रहीमने (Mushfiqur Rahim) टी२० आंतरराष्ट्रीय क्रिकेटमधून निवृत्तीची घोषणा केली आहे. रहीमनं बांग्लादेशसाठी १०२ सामने खेळले आहेत. मुशफिकुर रहीमनं संघाला अनेक सामन्यात विजय मिळवून देण्यात महत्वाची कामगिरी केली होती. अनुभवी विकेटकीपर फलंदाज मुशफिकुर रहीम म्हणजे बांगलादेश संघातील आक्रमक खेळाडू असून त्याने आतापर्यंत १०२ टी २० सामने खेळले १५०० धावा त्याने केल्या असून ७२ हा त्याचा सर्वोच्च स्कोर आहे.
आशिया कप २०२२ (Asia Cup) मध्ये मुशफिकुर रहीमला विशेष कामगिरी करता आली नाही. आशिया कप स्पर्धेत बांग्लादेश सोबत खेळत असताना रहीमला अफगाणिस्तानविरुद्ध केवळ एक धाव करता आली होती. तर श्रीलंकेविरुद्ध त्याने केवळ चार धावा केल्या होत्या. बांग्लादेशला दोन्ही सामन्यात पराभवाचा सामना करावा लागला. त्यामुळं सुपर फोरमध्ये संघ पोहोचू शकला नाही. या दोन्ही सामन्यांमध्ये बांग्लादेशचा पराभव झाल्याने आशिया कपमधून त्यांना बाहेरचा रस्ता धरावा लागला.
मुशफिकुर रहिमचा हा विक्रम :
मुशफिकुर रहिमने २०१८ सालच्या आशिया चषकात एक विक्रम आपल्या नावे केला आहे. या सामन्यात त्यानं शानदार शतक ठोकलं होतं. शतकवीर रहीमने या विक्रमामुळे धोनी आणि संगकारासारख्या दिग्गजांना मागे टाकलं होतं. रहीमने श्रीलंकेविरुद्धच्या सामन्यात १५० चेंडूत १४४ धावा ठोकल्या होत्या. आशिया चषकाच्या इतिहासातील ही दुसरी सर्वोत्तम खेळी ठरली होती. तर आशिया चषकात एखाद्या विकेटकीपरने ठोकलेली ही सर्वाधिक धावसंख्या होती. श्रीलंकेचा माजी कर्णधार कुमार संगकाराला मागे सोडत मुशफिकुरने या विक्रमाला गवसणी घातली होती. त्याआधी आशिया चषकात विकेटकीपर म्हणून सर्वाधिक धावसंख्या कुमार संगकाराच्या नावे होती. संगकाराने बांगलादेशविरोधात २००८ मध्ये १२१ धावा केल्या होत्या. याशिवाय मुशफिकुरनं वनडे आणि कसोटी सामन्यांमध्ये देखील आपल्या कामगिरीची वेगळी छाप पाडली आहे.
.png "Videos"){kind=small}
