सोमवार, 21 सप्टेंबर 2026
Hockey India : हॉकी इंडियाकडून सविता पूनियाला 10 लाखांचे बक्षिस, 'हे' आहे कारण.... सौजन्य :आयएएनएस
स्टार हॉकीपटू सविता पूनिया भारतीय महिला हॉकीच्या इतिहासात सर्वात जास्त इंटरनॅशनल सामने खेळणारी खेळाडू ठरली आहे. या अनुभवी गोलकीपरने गाठलेल्या या नव्या यशाबाबत हॉकी इंडिया (Hockey India) कडून सोमवारी तिचे कौतुक करण्यात आले, सोबतच तिच्यासाठी रोख बक्षिसाची घोषणा करण्यात आली.
या प्रसंगी हॉकी इंडियाच्या वतीने सांगण्यात आले की, जवळपास दोन दशकापासून सविताने जी चिकाटी दाखवली, ज्या शिस्तबद्धतेने ती खेळली, याचे ते फळ आहे. तिच्या या योगदानाचा सन्मान करण्यासाठी हॉकी इंडियाने तिच्यासाठी 10 लाखांच्या रोख पारितोषिकाची घोषणा केली आहे. सविताने भारताची माजी स्ट्रायकर वंदना कटारियाच्या 320 सीनियर इंटरनॅशनल सामने खेळण्याच्या विक्रमाला मागे सारले. जपानमध्ये सुरू असलेल्या एशियन गेम्समध्ये इंडोनेशियाविरुद्ध भारताच्या ‘बी’ गटातील सामन्यात हा विक्रम रचला.
ओपन प्लेमध्ये शॉट थांबवण्याची तिच्यातील धमक, तसेच पेनल्टी शूटआउटमध्ये न घाबरता खेळण्याचा तिचा रेकॉर्ड पाहता हॉकीच्या जगतात सविताला ‘द वॉल ऑफ इंडिया’ नावाने ओळखले जाते. अशात 36 वर्षीय सविताने 2009 साली आपला पहिला इंटरनॅशनल सामना खेळला होता. सविता आपल्या या शानदार कारकिर्दीत भारतासाठी सलग मोठ्या स्पर्धा खेळत आली आहे. तिने आतापर्यंत तीन ऑलिम्पिक, दोन एशियन गेम्स, कॉमनवेल्थ गेम्स, आशियाई चॅम्पियन्स ट्रॉफी आणि एफआयएच प्रो लीगसारख्या महत्त्वाच्या स्पर्धांत भाग घेतला आहे.
एक युवा आणि प्रतिभावंत गोलकीपरच्या रुपात सुरुवात करणारी सविता वेळेनुसार भारतीय महिला हॉकी संघातील विश्वासू खेळाडूंच्या यादीत समाविष्ट झाली. तिने अनेक वर्षे भारतीय संघाचे नेतृत्त्व केले आहे. कालांतराने संघाची कमान सलीमा टेटेकडे सोपवण्यात आली, परंतु सविता आजही भारतीय संघातील बळकट स्तंभ बनून राहिली आहे.
सविता फेब्रुवारी 2025 मध्ये एफआयएच हॉकी प्रो लीगमध्ये नेदरलंडविरुद्ध आपला 300 वा आंतरराष्ट्रीय सामना खेळली होती. ती वंदनानंतर 300 सामने खेळणारी दुसरी भारतीय महिला आणि पी.आर. श्रीजेशनंतर ही किमया करणारी दुसरी भारतीय गोलकीपर बनलेली. तिने 20 सप्टेंबर, २०२६ ला एशियन्स गेम्सच्या पहिल्या सामन्यात उज्बेकिस्तानविरुद्ध भारताच्या 19-0 अशा दमदार विजयात वंदनाच्या 320 सामन्यांच्या ऑलटाइम रेकॉर्डची बरोबरी केली होती व सोमवारी इंडोनेशियाविरुद्धचा सामना खेळत तिने हा रेकॉर्ड मोडीत काढला.
