पराभव होऊनही न्यूझीलंड मालामाल, आयसीसीकडून मिळणार ११.४४ कोटी! टीम इंडियाला किती मिळणार बक्षीस रक्कम?

भारत आणि न्यूझीलंड यांच्यात खेळल्या गेलेल्या चॅम्पियन्स ट्रॉफीच्या अंतिम सामन्यात टीम इंडियाने न्यूझीलंडचा ४ विकेट्सने पराभव केला. चॅम्पियन्स ट्रॉफी जिंकल्याबद्दल एकूण भारतीय संघाला सुमारे २१ कोटी ५१ लाख रुपये मिळतील.

Champions Trophy 2025 Prize Money : आयसीसी चॅम्पियन्स ट्रॉफी २०२५ चा विजेता आणि उपविजेता संघ जाहीर करण्यात आला आहे. रविवार ९ मार्च रोजी दुबई येथे खेळलेला विजेतेपदाचा सामना टीम इंडियाने जिंकला आणि न्यूझीलंड संघाला पराभवाचा सामना करावा लागला. पराभवानंतर न्यूझीलंड संघ नक्कीच निराश होईल, पण त्याच वेळी ते श्रीमंतही होतील, कारण आंतरराष्ट्रीय क्रिकेट परिषदेने (ICC) चॅम्पियन्स ट्रॉफी २०२५ साठी मोठी बक्षीस रक्कम ठेवली होती. विजेत्या भारतीय संघाला सुमारे २१.५ कोटी रुपयांची बक्षीस रक्कम मिळेल, तर जेतेपदाच्या सामन्यात पराभूत झालेल्या न्यूझीलंड संघाला सुमारे ११.५ कोटी रुपयांची बक्षीस रक्कम मिळेल.

RO-KO Video : सामना जिंकल्यानंतर रोहित-विराटने दांडिया खेळत साजरा केला आनंद, सोशल मीडिया Video Viral

दुबई येथे भारत आणि न्यूझीलंड यांच्यात खेळल्या गेलेल्या चॅम्पियन्स ट्रॉफी २०२५ च्या अंतिम सामन्यात टीम इंडियाने न्यूझीलंडचा ४ विकेट्सने पराभव केला. हे विजेतेपद जिंकल्यानंतर भारतीय संघाला थेट २.२४ दशलक्ष अमेरिकन डॉलर्स म्हणजेच सुमारे २० कोटी रुपये मिळाले. याशिवाय, स्पर्धेत सहभागी झाल्याबद्दल आणि लीग फेज सामने जिंकल्याबद्दल टीम इंडियाला बक्षीस रक्कम देखील मिळाली आहे. अशाप्रकारे, चॅम्पियन्स ट्रॉफी जिंकल्याबद्दल एकूण भारतीय संघाला सुमारे २१ कोटी ५१ लाख रुपये मिळतील.

चॅम्पियन संघाला किती मिळणार बक्षीस रक्कम

स्पर्धा जिंकल्याबद्दल चॅम्पियन संघाला सुमारे १९ कोटी ५३ लाख रुपये (२.२४ दशलक्ष अमेरिकन डॉलर्स)
स्पर्धेत सहभागी होण्यासाठी सुमारे १ कोटी ९ लाख रुपये (१,२५,००० अमेरिकन डॉलर्स)
३ लीग सामने जिंकण्यासाठी सुमारे ८९ लाख रुपये (प्रति सामना ३४००० अमेरिकन डॉलर्स)

चॅम्पियन्स ट्रॉफी २०२५ च्या बक्षीस रकमेची घोषणा आयसीसीने आधीच केली होती. २०१७ च्या तुलनेत आयसीसीने बक्षीस रकमेत ५३ टक्के वाढ केली होती. हेच कारण आहे की जेतेपदाच्या सामन्यात पराभव पत्करणारा न्यूझीलंड संघ निराश होऊन परतणार नाही तर श्रीमंत होऊन परतणार आहे, कारण आयसीसीने उपविजेत्या संघासाठी १.१२ दशलक्ष अमेरिकन डॉलर्स म्हणजेच सुमारे १० कोटी रुपये बक्षीस ठेवले होते, जे न्यूझीलंडला मिळणार आहेत. याशिवाय, न्यूझीलंडला लीग फेज सामने जिंकल्याबद्दल सहभागाचे बक्षीस आणि बक्षीस मिळेल. अशाप्रकारे, किवी संघाची एकूण बक्षीस रक्कम सुमारे ११ कोटी ४४ लाख रुपये होते.

भारताच्या संघाने रोहीत शर्माच्या नेतृत्वाखाली T२० क्रिकेटमध्ये आणि एकदिवसीय क्रिकेटमध्ये सातत्याने कमालीची कामगिरी केली आहे. रोहित शर्माने भारतीय संघाला सलग चार आयसीसी टुर्नामेंटच्या फायनलमध्ये नेले आहे. तर दोन आयसीसी ट्रॉफी देखील जिंकल्या आहेत. भारताच्या संघाने युवा खेळाडू आणि अनुभवी खेळाडूच्या कॉम्बिनेशनने जागतिक स्तरावर दबदबा निर्माण केला आहे.