Prakash Padukon : लहान शहरांत दडलेत भारताचे भावी बॅडमिंटन चॅम्पियन; प्रकाश पदुकोणांचा विश्वास
भारताचे भावी क्रीडा चॅम्पियन प्रामुख्याने टियर-२ आणि टियर-३ शहरांमधून घडू शकतात, असा विश्वास माजी बॅडमिंटनपटू प्रकाश पदुकोण (Prakash Padukone) यांनी व्यक्त केला आहे. मात्र, यासाठी लहान शहरांतील युवा खेळाडूंना दर्जेदार पायाभूत सुविधा, प्रशिक्षक आणि आवश्यक क्रीडा साहित्य उपलब्ध करून देणे गरजेचे असल्याचे त्यांनी सांगितले.
‘पदुकोण स्कूल ऑफ बॅडमिंटन’ आणि ‘इंटरनॅशनल इन्स्टिट्यूट ऑफ स्पोर्ट्स मॅनेजमेंट’ (IISM) यांच्यात झालेल्या सामंजस्य कराराच्या निमित्ताने पदुकोण बोलत होते. यावेळी त्यांनी भारतात बॅडमिंटनची वाढती लोकप्रियता आणि तळागाळातील प्रशिक्षणाचा दर्जा सुधारण्याची गरज अधोरेखित केली.
टियर-२ आणि टियर-३ शहरांमध्ये यापूर्वीही गुणवत्ता होती. मात्र, तिथे पायाभूत सुविधा, प्रशिक्षण आणि खेळाचे साहित्य उपलब्ध नव्हते. कोणत्याही खेळासाठी या तीन गोष्टी महत्त्वाच्या आहेत. चांगल्या सुविधा, प्रशिक्षक आणि आवश्यक साहित्य, असे पदुकोण यांनी सांगितले.
लहान शहरांमध्ये आता क्रीडा सुविधा आणि संसाधने वाढत असल्याने परिस्थितीत बदल होत असल्याचेही त्यांनी नमूद केले. भविष्यात देशाला मोठ्या प्रमाणात चॅम्पियन लहान शहरे आणि जिल्ह्यांमधून मिळतील, असे पदुकोण म्हणाले.
त्यांच्या मते, खेळाडूंना सुरुवातीपासूनच योग्य प्रशिक्षण मिळणे महत्त्वाचे आहे. केवळ एलिट खेळाडू आणि आंतरराष्ट्रीय पदकांवर लक्ष केंद्रित करण्याऐवजी बॅडमिंटनचा तळागाळातील पाया मजबूत करण्याची गरज आहे. अधिकाधिक मुलांनी बॅडमिंटन खेळावे आणि त्यांना सुरुवातीपासूनच योग्य तंत्र शिकवले जावे, याला प्राधान्य दिले पाहिजे.
जेलीफिशचा दंश, हाताला दुखापत! भारतमातेसाठी जिद्दीला पेटली अन्…; जलतरणपटू गीताने रचला ‘हा’ रेकॉर्ड
पदुकोण यांनी अलीकडील १५ आणि १७ वर्षांखालील स्पर्धेचे उदाहरण दिले. या स्पर्धेसाठी सुमारे ४ हजार प्रवेशिका आल्या होत्या. दहा दिवस चाललेल्या या स्पर्धेच्या पहिल्या पाच दिवसांत तब्बल २२ कोर्ट्सची आवश्यकता भासली. बॅडमिंटनची वाढती लोकप्रियता दिसून येत असली, तरी त्याचवेळी मोठ्या प्रमाणावर दर्जेदार प्रशिक्षण देण्याचे आव्हानही समोर येत असल्याचे त्यांनी सांगितले.
प्रशिक्षणाच्या दर्जाकडे तातडीने लक्ष देण्याची गरज आहे. सध्या काम सुरू असले तरी अजून खूप काही करणे बाकी आहे, असे पदुकोण यांनी स्पष्ट केले.
खेळाडूच्या प्रगतीची संपूर्ण जबाबदारी केवळ प्रशिक्षकावर टाकता येणार नाही, असेही त्यांनी सांगितले. सलग पराभव झाल्यानंतर काही युवा खेळाडू अकादमी किंवा प्रशिक्षक बदलतात. मात्र, स्वतःच्या खेळातील उणिवांचे आत्मपरीक्षण करण्याऐवजी प्रशिक्षकांना दोष देण्याची प्रवृत्ती योग्य नसल्याचे पदुकोण यांनी नमूद केले.
तळागाळातील प्रशिक्षणाचा दर्जा सुधारला, योग्य सुविधा उपलब्ध झाल्या आणि खेळाडूंना सातत्याने मार्गदर्शन मिळाले, तर लहान शहरांमधून देशाला भविष्यात मोठे बॅडमिंटनपटू मिळू शकतात, असा विश्वास त्यांनी व्यक्त केला.
.png "Videos"){kind=small}
