साऊथ आफ्रिका चॅम्पियन्सने पाकिस्तानला पाजलं पाणी! WCL 2025 फायनलच्या सामन्यात 9 विकेट्सने केले पराभूत

नाणेफेक जिंकल्यानंतर पाकिस्तान प्रथम फलंदाजीला आला आणि सलामीवीर शरजील खानने ७६ धावांची शानदार खेळी केली. मात्र, कामरान अकमल फक्त २ धावा काढून पॅव्हेलियनमध्ये परतला. कर्णधार मोहम्मद हाफिजने १७ धावा केल्या तर शोएब मलिकने फक्त २० धावा केल्या. शेवटी उमर अमीनने ३६ धावा केल्या तर आसिफ अलीने २८ धावा केल्या. त्यामुळे पाकिस्तानचा संघ १९५ धावांपर्यंत पोहोचू शकला. दक्षिण आफ्रिकेकडून हार्डस विल्जोएन आणि वेन पार्नेलने प्रत्येकी २-२ बळी घेतले. ड्वेन ऑलिव्हियरनेही १ बळी घेतला.

लक्ष्याचा पाठलाग करताना दक्षिण आफ्रिकेकडून हाशिम अमलाने १८ धावा केल्या. त्याचा सहकारी फलंदाज एबी डिव्हिलियर्सने ६० चेंडूत १२० धावांची शानदार खेळी केली. ज्यामध्ये १२ चौकार आणि ७ उत्तुंग षटकारांचा समावेश होता. तिसऱ्या क्रमांकावर फलंदाजीला आलेल्या जेपी ड्युमिनीने २८ चेंडूत ५० धावांची खेळी केली. त्यामुळे दक्षिण आफ्रिकेने सामना तसेच स्पर्धा जिंकली.

पाकिस्तानचा संघ सलग दुसऱ्यांदा अंतिम सामन्यात पराभूत झाला आहे. दुसरीकडे, आफ्रिकेचा संघ पहिल्यांदाच चॅम्पियन बनला आहे.भारताच्या संघाला सेमीफायनलमध्ये न खेळल्यामुळे स्पर्धेबाहेर व्हावे लागले. भारताच्या खेळाडूंनी पाकिस्तानविरुद्ध सामना खेळण्यास नकार दिल्यामुळे टीम इंडीया उपांत्य फेरीमधुन बाहेर झाली आहे. त्यानंतर पाकिस्तानच्या संघाला फायनलमध्ये प्रवेश मिळाला होता.

संबंधित बातम्या