All-India Hockey Tournament
२०२२ आणि २०२३ मध्ये उपविजेतेपद मिळविणाऱ्या मेजर ध्यानचंदने गेल्या वर्षीच्या अंतिम फेरीतील ओडिशा नेव्हल टाटा ग्रासरूट्सविरुद्ध दमदार विजय नोंदविला. पूर्वार्धातच तीन गोल करत मेजर ध्यानचंदने सामन्यावर पकड मिळविली. शिवन यादवने आठव्या मिनिटाला खाते उघडले. शिवमने २५व्या मिनिटाला आघाडी दुप्पट केली, तर त्यानंतर अवघ्या एका मिनिटात सुनील पालने गोल करत मध्यांतराला ३-० अशी आघाडी मिळवून दिली. उत्तरार्धात प्रदीप यादवने दोन गोल केले. रोमित पाल आणि शिवम यांनी प्रत्येकी एक गोल करत विजयावर शिक्कामोर्तब केले. ओडिशाकडून वॉरेन्स झाल्को आणि राबिन एक्का यांनी प्रत्येकी एक गोल केला.
यजमान एसएनबीपी अकादमीनेही हॉकी नाशिकचा ४-० असा सहज पराभव करत उपांत्यपूर्व फेरी गाठली. प्रथम कुमारने दोन गोल केले, तर रणजोत सिंग आणि वीर कुमार यांनी प्रत्येकी एक गोल केला. २०२४ आणि २०२५ चे विजेते राउंडग्लास अकादमीनेही उपांत्यपूर्व फेरीत स्थान मिळविले. सलग तिसऱ्या विजेतेपदाच्या प्रयत्नात असलेल्या राउंडग्लासचा डिस्ट्रिक्ट लेव्हल स्पोर्ट्स स्कूल, गुजरातविरुद्धचा सामना प्रतिस्पर्धी संघाने न खेळल्याने राउंडग्लासला विजयी घोषित करण्यात आले.
२०२३ चे विजेते आर्मी बॉईज स्पोर्ट्स कंपनीने एसजीपीसी, अमृतसरचा ४-२ असा पराभव केला. ओमकुमारने सातव्या मिनिटाला आर्मी बॉईजचे खाते उघडले; मात्र अमनदीप सिंगने बरोबरी साधली. त्यानंतर शिवम पटेलने ३९व्या आणि ५६व्या मिनिटाला दोन गोल करत आर्मी बॉईजला आघाडी मिळवून दिली. अंकुर कुमारने आणखी एक गोल केला. एसजीपीसीकडून प्रिन्सप्रीत सिंगने दुसरा गोल केला.
घुमनहेरा अकादमीने दिवसातील सर्वाधिक गोलचा धडाका लावत रिजनल डेव्हलपमेंट सेंटरचा ७-१ असा फडशा पाडला. बिल्सन भेंग्रा याने पहिल्याच मिनिटाला आरडीसीला आघाडी मिळवून दिली, मात्र त्यानंतर घुमनहेराने सामन्यावर पूर्ण वर्चस्व गाजविले. राहुल आणि आर्यन यांनी प्रत्येकी दोन गोल केले, तर कार्तिक, लक्षय कुमार आणि देव यांनी प्रत्येकी एक गोल करत मोठा विजय मिळविला.
आर. के. रॉय अकादमीने रिपब्लिकन स्पोर्ट्स क्लबचा ५-१ असा पराभव केला. विनय कुमारने शानदार हॅट्ट्रिक नोंदविली, तर कुलदीप टोपनोने दोन गोल केले. रिपब्लिकनकडून हेथोइबा चिंगशुबम याने एकमेव गोल केला. एसएआयएलने कोहिनूर हॉकी अकादमीला ४-० असे नमविले. असीम एडिसनने पाचव्या आणि ६०व्या मिनिटाला दोन गोल केले. कुणाल आणि सुमन यांनी प्रत्येकी एक गोल करत एसएआयएलचा विजय निश्चित केला. उपांत्यपूर्व फेरीत राउंडग्लास अकादमीसमोर जय गणेशचे आव्हान असेल. मेजर ध्यानचंद स्पोर्ट्स कॉलेजची लढत घुमनहेरा अकादमीशी होईल. आर्मी बॉईज स्पोर्ट्स कंपनी यजमान एसएनबीपी अकादमीशी भिडणार असून एसएआयएलसमोर आर. के. रॉय अकादमीचे आव्हान असेल.
असे असतील उपांत्यपूर्व फेरीचे सामने
राउंडग्लास अकादमी विरुद्ध जय गणेश
मेजर ध्यानचंद स्पोर्ट्स कॉलेज विरुद्ध घुमनहेरा अकादमी
आर्मी बॉईज स्पोर्ट्स कंपनी विरुद्ध एसएनबीपी अकादमी
एसएआयएल विरुद्ध आर. के. रॉय अकादमी
.png "Videos"){kind=small}
