JioHotstar चा जागतिक विस्तार! आता मध्य पूर्वेतही मिळणार भारतीय मनोरंजनाचा खजिना, कंपनीने केली घोषणा
STARZPLAY सोबत करण्यात आलेल्या विशेष भागीदारीनंतर, जिओहॉटस्टार STARZPLAY ॲप आणि वेबसाइटमध्ये एक समर्पित स्ट्रीमिंग गंतव्य म्हणून उपलब्ध असणार आहे. ही भागीदारी जिओहॉटस्टारची व्यापक पोहोच आणि विविधता, तसेच STARZPLAY ची प्रादेशिक उपस्थिती, प्रेक्षकांविषयीची समज आणि स्ट्रीमिंग क्षेत्रातील कौशल्य यांचा मेळ घालते.
MENA प्रदेशातील प्रेक्षक आता भारतातील प्रदर्शनासोबतच नवीन जिओहॉटस्टार ओरिजिनल्सची देखील मजा घेऊ शकणार आहेत. यामध्ये 10 पर्यंत भाषांमधील ऑडिओ ट्रॅक्सचा समावेश असणार आहे. याव्यतिरिक्त, प्रेक्षक जिओस्टार टीव्ही चॅनेल्सवर लोकप्रिय टीव्ही कार्यक्रम, ब्लॉकबस्टर चित्रपट आणि देशातील काही सर्वात मोठ्या रिअ‍ॅलिटी शो फ्रँचायझींचा आनंद घेऊ शकतील. यामध्ये कॉफी विथ करणचा आगामी सीझन, बिग बॉसचा समावेश आहे, जे सहा भाषांमध्ये उपलब्ध असणार आहे. यामध्ये हिंदी, मल्याळम, तमिळ, तेलगू, बंगाली आणि इतर भाषांमधील मजकूर समाविष्ट आहे. तसेच, यात मल्याळम भाषेतील मजकुराचा मोठा संग्रह उपलब्ध असल्याची माहिती मिळाली आहे, जे या प्रदेशातील मल्याळी प्रेक्षकांचे महत्त्व अधोरेखित करते.
STARZPLAY च्या प्लस प्लॅनमध्ये जिओहॉटस्टारच्या मंथली प्लॅनची किंमत AED 34.99 आहे. मॅक्स प्लॅनची किंमत AED 49.99 प्रति महिना आहे. यामध्ये ग्राहकांना संपूर्ण मनोरंजन ऑफर आणि STARZPLAY चे क्रीडा पोर्टफोलिओचा एकत्र आनंद घेता येणार आहे. मॅक्स प्लॅनमध्ये जिओहॉटस्टारचे दैनंदिन मनोरंजन, ओरिजिनल्स, रिॲलिटी फ्रँचायझी आणि चित्रपट यांचा समावेश असणार आहे.
जिओहॉटस्टारच्या मध्य पूर्वेतील विस्ताराबाबत जिओस्टारचे हेड – इंटरनॅशनल बिझनेस, अमित मल्होत्रा म्हणाले की, यूके, कॅनडा आणि सिंगापूरमध्ये जिओहॉटस्टारला दमदार प्रतिसाद मिळाला. यामुळेच भारतीय मनोरंजनासाठी असलेल्या जागतिक संधीवरचा आमचा विश्वास आणखी दृढ झाला आहे. भारतीय कथा, प्रतिभा आणि सांस्कृतिक क्षण जगभरातील प्रेक्षकांपर्यंत पोहोचवण्याच्या दिशेने मध्य पूर्व आणि उत्तर आफ्रिका प्रदेशातील विस्तार हे एक महत्त्वाचे पाऊल आहे.
.png "Videos"){kind=small}
