आता SIM कार्डशिवाय WhatsApp, Telegram सारखे Apps वापरता येणार नाही; जाणून घ्या सरकारचा ‘हा’ नवा नियम

व्हॉट्सॲप आणि टेलिग्रामसाठी सिमकार्ड अनिवार्य! दूरसंचार विभागाने (DoT) सायबर गुन्हे आणि फसवणूक रोखण्यासाठी 'SIM बाइंडिंग'चे नवीन नियम लागू केले. आता बिना सिमकार्ड मेसेजिंग ॲप्स वापरता येणार नाहीत.

 

• सायबर गुन्हेगारांना चाप!
• सिमकार्डशिवाय मेसेजिंग ॲप्स वापरता येणार नाहीत
• ‘या’ नव्या नियमामुळे फसवणूक होईल कमी

मुंबई: व्हॉट्सॲप (WhatsApp), टेलिग्राम (Telegram) किंवा स्नॅपचॅट (Snapchat) सारखे ॲप्स वापरणाऱ्यांसाठी सरकारकडून एक मोठे अपडेट आले आहे. सरकारने देशातील अनेक लोकप्रिय मेसेजिंग ॲप्सच्या वापराच्या पद्धतीत महत्त्वाचे बदल करून नवीन नियम लागू केले आहेत. यापूर्वी कोणत्याही स्मार्टफोनमध्ये सिम कार्ड नसतानाही व्हॉट्सॲप किंवा इतर मेसेजिंग ॲप्स वापरणे शक्य होते, पण आता तसे होणार नाही. तुमच्या फोनमध्ये ॲप इन्स्टॉल होईल, परंतु लॉगिन आणि वापरासाठी, डिव्हाइसमध्ये नोंदणीकृत मोबाइल नंबर असलेले सिम कार्ड जोडलेले असणे आवश्यक असणार आहे.

सायबर गुन्हे रोखण्यासाठी बदल

दूरसंचार विभागाने हे बदल करण्यामागे सायबर गुन्हेगारांकडून होणारा ॲप्सचा गैरवापर रोखणे, हे मुख्य उद्दिष्ट आहे. आता ‘सिम बाइंडिंग’ (SIM Binding) मुळे वापरकर्त्याच्या नंबर, फोन आणि ॲपमध्ये एक मजबूत लिंक तयार होईल. यामुळे स्पॅम, फ्रॉड कॉल्स आणि आर्थिक फसवणूक (Financial Fraud) यावर नियंत्रण मिळवता येईल. सायबर गुन्हेगार सिम निष्क्रिय (SIM Inactive) झाल्यानंतरही ॲपच्या माध्यमातून फसवणूक करत होते, कारण ॲपचा लॉगिन एकदा झाल्यावर तो सिमवर अवलंबून न राहता काम करत असे. तसेच, व्हॉट्सॲप वेब (WhatsApp Web) आणि तत्सम वेब वर्जनवर आता दर सहा तासांनी आपोआप लॉगआउट होईल आणि पुन्हा क्यूआर कोडने लॉगिन करावे लागेल.

हे देखील वाचा: Google Maps Update: नेव्हिगेशन अ‍ॅपमध्ये आलं नवीन पावर सेविंग मोड! बॅटरी वाचवण्यासाठी होणार मदत, असा करा वापर

वापरकर्त्यांसाठी फायदा

हा नवीन नियम दूरसंचार सुरक्षा आणि जबाबदारी वाढवण्यासाठी उचललेला एक महत्त्वाचा पाऊल आहे, जो सर्वसामान्य वापरकर्त्यांसाठी फायदेशीर ठरणार आहे:

1. सुरक्षितता: सिम बाइंडिंगमुळे मेसेज पाठवणाऱ्या किंवा प्राप्त करणाऱ्या ॲप्स आणि वापरकर्त्यांची खासगी माहिती अधिक सुरक्षित होईल.
2. फसवणूक कमी: यामुळे फसवणुकीच्या घटना कमी होण्यास मदत होईल.
3. उत्तरदायित्व: ॲप-आधारित दळणवळण अधिक सुरक्षित आणि जबाबदार बनेल.

हा नवा नियम दूरसंचार सायबर सुरक्षा (सुधारणा) नियम, २०२५ अंतर्गत लागू करण्यात आला आहे. यामुळे प्रथमच ॲप-आधारित दूरसंचार सेवांनाही कडक दूरसंचार नियमांच्या कक्षेत आणले गेले आहे. कंपन्यांना ९० दिवसांच्या आत या नियमाची अंमलबजावणी करावी लागणार आहे. या नियमामुळे लॉगऑफ होण्याची तात्पुरती गैरसोय होऊ शकते, परंतु दीर्घकाळात यामुळे सुरक्षितता वाढून फसवणूक कमी होण्यास नक्कीच मदत होईल.

हे देखील वाचा: Scam Alert: सावधान! ब्लॅक फ्रायडे सेलच्या नावाखाली सुरु आहे स्कॅम, 2 हजारहून अधिक फेक वेबसाइट्स आल्या समोर