Air France चा मोठा निर्णय, ‘या’ मार्गावर पाकिस्तानी वैमानिक पूर्णपणे बॉयकॉट

Air France : एअर फ्रान्सने इस्रायलला जाणाऱ्या आणि तेथून येणाऱ्या विमानांच्या क्रू तैनातीबाबत नियमांची अंमलबजावणी अधिक कडक करण्यात आली आहे. पाकिस्तानी वैमानिक आणि केबिन क्रू सदस्यांना इस्रायल मार्गावरील उड्डाणांवर ड्युटी करण्यास मनाई केल्याचे सांगण्यात येत आहे.

फ्लायदुबईच्या (Fly Dubai) विमानात सहवैमानिकाने भारतीय वैमानिकावर हल्ला करण्याचा कथित प्रयत्न केल्याच्या घटनेनंतर इस्रायलला जाणाऱ्या आणि तेथून येणाऱ्या विमानांच्या क्रू तैनातीबाबत नियमांची अंमलबजावणी अधिक कडक करण्यात आली आहे. एअर फ्रान्सने (Air France) पाकिस्तानी वैमानिक आणि केबिन क्रू सदस्यांना इस्रायल मार्गावरील उड्डाणांवर ड्युटी करण्यास मनाई केल्याचे माध्यमांच्या वृत्तांत म्हटले आहे.

माध्यमांच्या अहवालानुसार, इस्रायलशी राजनैतिक संबंध नसलेल्या देशांच्या नागरिकांना इस्रायल मार्गावरील उड्डाणांमध्ये काम करण्यास निर्बंध आहेत. एअर फ्रान्ससह अमेरिकेची युनायटेड एअरलाइन्स आणि चेक प्रजासत्ताकच्या स्मार्टविंग्स या विमान कंपन्यांनीही या नियमांनुसार क्रू व्यवस्थापनात बदल केल्याचे वृत्त आहे.

फ्लायदुबईच्या विमानात काय घडले?

30 सप्टेंबर 2026 रोजी दुबईहून तेल अवीवकडे जाणाऱ्या फ्लायदुबईच्या विमानात ही घटना घडल्याचा आरोप आहे. ओमानी सहवैमानिक हमाम अल-हम्मामी याने विमानाचा ताबा घेण्याचा प्रयत्न करत भारतीय वैमानिक कॅप्टन स्मित मच्छार यांच्यावर हल्ला केला होता. या घटनेनंतर इस्रायलला जाणाऱ्या विमानांवरील क्रूच्या राष्ट्रीयत्वासंबंधी नियमांकडे अधिक गांभीर्याने पाहिले जात असल्याचे अहवालांत नमूद करण्यात आले आहे.

अनेक एअरलाइन्सकडून नियमांची अंमलबजावणी

फ्रान्समधील शोधपत्रकारितेचे व्यासपीठ मीडियापार्ट आणि विमान वाहतूक क्षेत्रातील माहिती पुरवणाऱ्या सीएच-एव्हिएशन यांच्या 13 ऑक्टोबरच्या अहवालांनुसार, एअर फ्रान्स आणि युनायटेड एअरलाइन्स यांनी आपल्या वैमानिकांना आणि केबिन क्रूला या नियमांची माहिती दिली आहे.
एअर फ्रान्सने इस्रायलच्या आवश्यकतांचे पालन करत असल्याचे स्पष्ट केले आहे. युनायटेड एअरलाइन्सनेही आपल्या क्रू व्यवस्थापन प्रणालीत संबंधित नियम समाविष्ट केल्याचे वृत्त आहे.

UNIFIL Withdrawal: इस्रायल-लेबनॉन सीमा विवादावर मोठा निर्णय; ‘या’ कारणामुळे UN आणि भारताचेही शांतता सैनिक अखेर मायदेशी परतणार

इथिओपियन एअरलाइन्सचे विमान माघारी

या नियमांची अंमलबजावणी किती कडक झाली आहे, हे इथिओपियन एअरलाइन्सच्या एका विमानाच्या घटनेतून दिसून आल्याचे वृत्त आहे. इस्रायली अधिकाऱ्यांना विमानात इंडोनेशियन वैमानिक असल्याचे समजल्यानंतर विमानाला माघारी फिरण्याचे निर्देश देण्यात आले. त्यावेळी विमान इथिओपियाच्या हवाई हद्दीत होते. ते अदीस अबाबा येथे परतल्यानंतर संबंधित वैमानिक बदलण्यात आला आणि त्यानंतर विमान पुन्हा इस्रायलच्या दिशेने रवाना झाले.

इथिओपियन एअरलाइन्सने ही घटना चूक असल्याचे सांगितले. संबंधित वैमानिकाला इस्रायलला जाणाऱ्या विमानाचे संचालन करण्याची परवानगी नसल्याची माहिती कंपनीला नव्हती, असेही वृत्तात नमूद करण्यात आले आहे.

Afghanistan च्या कंधारमध्ये बस व ट्रकचा भीषण अपघात, पाच ठार, 15 जखमी

31 देशांतील नागरिकांवर निर्बंध असल्याचा दावा

मीडियापार्ट आणि इस्रायली माध्यमांच्या अहवालांनुसार, हे निर्बंध मुस्लिमबहुल 31 देशांतील नागरिकांना लागू होतात. पाकिस्तान, इराण, ओमान, सौदी अरेबिया, अल्जेरिया, ट्युनिशिया, बांगलादेश, अफगाणिस्तान, इराक, लेबनॉन आणि नायझेरीया यासारख्या देशांचा त्यात समावेश असल्याचे सांगितले जाते. हे निर्बंध केवळ वैमानिकांपुरते मर्यादित नसून केबिन क्रूलाही लागू असल्याचे वृत्त आहे. दुहेरी नागरिकत्व असलेल्या कर्मचाऱ्यांनाही आपोआप सूट मिळत नाही.

इस्रायलच्या परिवहन आणि रस्ते सुरक्षा मंत्रालयाने १ ऑक्टोबर रोजी परदेशी विमान कंपन्यांना या नियमांची माहिती देणारे निर्देश जारी केल्याचे इस्रायली माध्यमांनी म्हटले आहे. हे नियम फ्लायदुबईतील कथित घटनेपूर्वीही अस्तित्वात होते; मात्र त्यांची अंमलबजावणी पूर्वी इतक्या कठोरपणे केली जात नव्हती, असा दावा अहवालांत करण्यात आला आहे.