Bangladesh news : बांगलादेशात हिंदू कुटुंबाची निर्घृण हत्या; निवृत्त शिक्षकासह 4 जणांचे मृतदेह बंद घरात आढळले

Hindu Family Murder: बांगलादेशातील रंगपूर येथे एका कुलूपबंद घरात निवृत्त जिल्हा शाळेचे शिक्षक गणपती चक्रवर्ती, त्यांची पत्नी, मुलगी आणि मुलगा यांचे मृतदेह आढळले. गळा दाबून खून झाल्याचा पोलिसांना संशय आहे.

• चौघांची निर्घृण हत्या
• गळा दाबून खून केल्याचा संशय
• हिंदू समाजात प्रचंड भीती

बांगलादेशातील (Bangladesh) रंगपूर शहरातून एक अत्यंत धक्कादायक आणि हृदयद्रावक घटना समोर आली आहे. रंगपूर जिल्हा शाळेतील निवृत्त शिक्षक गणपती चक्रवर्ती आणि त्यांच्या संपूर्ण कुटुंबाची अतिशय निर्घृणपणे हत्या करण्यात आली आहे. शनिवारी रात्री उशिरा पोलिसांनी त्यांच्या तीन मजली नव्याने बांधलेल्या घराचे कुलूप तोडून प्रवेश केला असता, घरात चार जणांचे मृतदेह विखुरलेल्या अवस्थेत आढळले. या भीषण हत्याकांडामुळे संपूर्ण परिसरात खळबळ उडाली असून, बांगलादेशात राहणाऱ्या अल्पसंख्याक हिंदू समाजात तीव्र संताप आणि दहशतीचे वातावरण पसरले आहे.

स्थानिक पोलीस प्रशासनाने दिलेल्या माहितीनुसार, शनिवारी रात्री ११:३० वाजताच्या सुमारास दासपारा (मच्छुआपारा) परिसरातील एका बंद घरातून दुर्गंधी आणि संशयास्पद हालचालींची माहिती मिळाल्यानंतर पोलिसांनी घटनास्थळी धाव घेतली. घर बाहेरून बंद असल्याने पोलिसांनी कुलूप तोडून आत प्रवेश केला. आतमध्ये निवृत्त शिक्षक गणपती चक्रवर्ती (६५), त्यांची पत्नी प्रीतिलता चक्रवर्ती (५०), त्यांची मुलगी आगामी चक्रवर्ती (२३) आणि १२ वर्षांचा मुलगा प्रियम चक्रवर्ती यांचे मृतदेह आढळून आले. सर्व मृतदेह तातडीने ताब्यात घेऊन शवविच्छेदनासाठी रुग्णालयात पाठवण्यात आले आहेत.

जागतिक घडामोडी संबंधित बातम्या वाचण्यासाठी येथे क्लिक करा : Flight 2398: हवेत लॅपटॉपचा भडका, केबिनमध्ये काळा धूर अन् 5 प्रवासी भाजले; अमेरिकन एअरलाइन्सच्या विमानात थरारक घटना

घरातील सामान विखुरलेले; दरोड्याच्या उद्देशाने हत्येचा संशय

पोलीस आणि सीआयडीच्या (CID) तपास पथकाने घटनास्थळाचा ताबा घेऊन सखोल पंचनामा केला. तपासादरम्यान गणपती चक्रवर्ती यांचा मृतदेह छतावर, त्यांची पत्नी व मुलीचे मृतदेह जिन्यावर, तर १२ वर्षांच्या लहान मुलाचा मृतदेह पलंगाखाली आढळला. घरातील कपाटांची कुलुपे तोडलेली होती आणि सर्व सामान अस्ताव्यस्त विखुरलेले होते. यामुळे ही हत्या दरोड्याच्या उद्देशाने किंवा लूटमारीच्या प्रयत्नातून झाली असावी, असा प्राथमिक संशय पोलिसांनी व्यक्त केला आहे.

फॉरेन्सिक टीम आणि गुप्तचर यंत्रणांच्या मते, सर्व पीडितांचा गळा दाबून अत्यंत क्रूरपणे खून करण्यात आला आहे. ही हत्या गुरुवारी मध्यरात्री ते शुक्रवारी पहाटेच्या दरम्यान झाली असावी, असा अंदाज वर्तवण्यात आला आहे. गुरुवारी दुपारनंतर कुटुंबातील सर्व सदस्यांचे मोबाईल फोन बंद असल्याने नातेवाईकांचा त्यांच्याशी संपर्क होऊ शकला नव्हता, ज्यानंतर ही धक्कादायक बाब उघडकीस आली.

जागतिक घडामोडी संबंधित बातम्या वाचण्यासाठी येथे क्लिक करा : Viral News: बालीमध्ये हिंदू सणाचा अवमान करणाऱ्या पर्यटकाला 1 वर्षाचा तुरुंगवास; सोशल मीडियावर व्हायरल ‘तो’ वादग्रस्त VIDEO

अल्पसंख्याक हिंदू समाज भयभीत; संरक्षणाची जोरदार मागणी

मृत शिक्षक गणपती चक्रवर्ती हे अत्यंत नम्र, शांत आणि मनमिळाऊ स्वभावाचे होते, अशी माहिती त्यांच्या शेजाऱ्यांनी व नातेवाईकांनी दिली आहे. निवृत्तीनंतर ते होमिओपॅथीचे वैद्यकीय कामही करत होते. त्यांचे कोणाशीही वैर नव्हते. अशा निष्पाप आणि सुशिक्षित हिंदू कुटुंबाची संपूर्ण हत्या झाल्याने परिसरातील नागरिक हादरले आहेत.

या हत्याकांडानंतर दासपारा भागातील अल्पसंख्याक हिंदू समाजात प्रचंड घबराट पसरली आहे. स्थानिकांनी प्रशासनाकडे तात्काळ सुरक्षेची मागणी केली असून, या गुन्ह्यातील आरोपींना त्वरित कठोर शिक्षा देण्याची विनंती केली आहे. पोलीस प्रशासनाने याप्रकरणी विशेष पथके तयार केली असून, सीसीटीव्ही फुटेज आणि कॉल डिटेल्सच्या आधारे तपास वेगाने सुरू आहे. या भीषण घटनेमुळे बांगलादेशातील अल्पसंख्याकांच्या सुरक्षेचा प्रश्न पुन्हा एकदा जागतिक स्तरावर ऐरणीवर आला आहे.