China : चीनमध्ये मोठी दुर्घटना! दुरुस्तीसाठी उभ्या असलेल्या परदेशी जहाजाला लागली आग; 30 हून अधिक जीवितहानीची भीती

China : चिंगदाओ शिपयार्डमध्ये दुरुस्तीसाठी असलेल्या एका मालवाहू जहाजाला आग लागली. या आगीत तीस जणांचा मृत्यू झाल्याची भीती आहे. चीनने अद्याप कोणतीही अधिकृत आकडेवारी जाहीर केलेली नाही.

• शिपयार्डमध्ये भीषण दुर्घटना
• ३० हून अधिक जणांच्या मृत्यूची शक्यता
• राष्ट्राध्यक्ष शी जिनपिंग आक्रमक

चीनमधील (China) शांगडोंग प्रांतातील महत्त्वाच्या बंदर शहर असलेल्या छिंगदाओ (Qingdao) येथून एक अत्यंत थरारक आणि भीषण बातमी समोर आली आहे. येथील ‘चायना स्टेट शिपबिल्डिंग कॉर्पोरेशन’च्या (CSSC) अंतर्गत असलेल्या प्रसिद्ध बेहाई शिपयार्डमध्ये दुरुस्तीच्या कामासाठी उभ्या केलेल्या एका परदेशी मालवाहू जहाजाला अचानक भीषण आग लागली. सकाळी साधारण ११:१५ वाजताच्या सुमारास जहाजातून धुराचे प्रचंड लोट निघू लागले आणि काही वेळातच आगीने संपूर्ण जहाजाला आपल्या कचाट्यात घेतले. ही घटना घडली तेव्हा जहाजावर आणि त्याच्या आसपास अनेक तंत्रज्ञ, कामगार आणि जहाजाचे कर्मचारी काम करत होते. अचानक लागलेल्या आगीमुळे जहाजावर उपस्थित असलेल्या कामगारांना बाहेर पडण्याची संधीच मिळाली नाही, ज्यामुळे मोठ्या प्रमाणावर जीवितहानी झाल्याचे प्राथमिक अहवालात म्हटले आहे.

३० जणांच्या मृत्यूची भीती; प्रशासनाकडून माहिती गुप्त ठेवण्याचा प्रयत्न?

या दुर्घटनेमध्ये किमान ३० जणांचा होरपळून मृत्यू झाल्याची किंवा गंभीर जखमी झाल्याची भीती व्यक्त केली जात आहे. चिनी सरकारी वृत्तसंस्था ‘शिन्हुआ’ने (Xinhua) या घटनेत “मोठी जीवितहानी” (Heavy Casualties) झाल्याचे मान्य केले आहे, परंतु मृतांचा अथवा जखमींचा निश्चित आकडा जाहीर करणे टाळले आहे. चिनी प्रशासनाच्या या भूमिकेमुळे जीवितहानीचा आकडा ३० पेक्षाही अधिक असण्याची शक्यता वर्तवण्यात येत आहे. हे मालवाहू जहाज नेमक्या कोणत्या देशाचे होते आणि त्यावर कोणत्या प्रकारचा माल किंवा साहित्य होते, याबद्दलही चिनी अधिकाऱ्यांनी अधिकृत खुलासा केलेला नाही.

जागतिक घडामोडी संबंधित बातम्या वाचण्यासाठी येथे क्लिक करा : US Midterm Elections 2026: ट्रम्प यांची मोठी घोषणा; रिपब्लिकन जिंकल्यास प्रत्येक अमेरिकनाला मिळणार 5,000 डॉलर्स

राष्ट्राध्यक्ष शी जिनपिंग व पंतप्रधान ली च्यांग यांच्याकडून बचाव मोहिमेचे आदेश

या अपघाताचे स्वरूप अत्यंत गंभीर असल्याचे लक्षात येताच चीनचे राष्ट्राध्यक्ष शी जिनपिंग आणि पंतप्रधान ली च्यांग यांनी या प्रकरणात थेट हस्तक्षेप केला आहे. राष्ट्राध्यक्ष शी जिनपिंग यांनी आपत्कालीन यंत्रणांना बेपत्ता कामगारांचा तातडीने शोध घेण्याचे, जखमींवर वैद्यकीय उपचार करण्याचे आणि पीडित कुटुंबांना सर्वतोपरी मदत करण्याचे कडक निर्देश दिले आहेत. त्याचप्रमाणे, चीनच्या आपत्कालीन व्यवस्थापन मंत्रालयाने (Ministry of Emergency Management) घटनास्थळी विशेष तज्ज्ञांचे पथक रवाना केले आहे. आग विझवण्यासाठी आणि जहाजाच्या आतील भागात अडकलेल्या कामगारांना बाहेर काढण्यासाठी अग्निशमन दलाच्या अनेक गाड्या आणि बचाव पथके युद्धपातळीवर काम करत आहेत.

जागतिक घडामोडी संबंधित बातम्या वाचण्यासाठी येथे क्लिक करा : China Tick Virus : चीनमध्ये सापडला नवा धोकादायक ‘टिक नोरोव्हायरस’; तीव्र ताप आणि डोकेदुखीने नागरिक त्रस्त

८१५ एकरावर पसरलेले शिपयार्ड आणि सुरक्षेचा प्रश्न

छिंगदाओ शिपयार्ड हे चीनमधील सर्वात मोठ्या जहाजबांधणी आणि दुरुस्ती केंद्रांपैकी एक मानले जाते, जे तब्बल ८१५ एकरच्या विशाल परिसरात पसरलेले आहे. या ठिकाणी दररोज शेकडो देशी-विदेशी व्यापारी जहाजांची दुरुस्ती केली जाते आणि नवीन जहाजेही बांधली जातात. एवढ्या मोठ्या जागतिक दर्जाच्या शिपयार्डमध्ये एवढा भीषण अपघात कसा घडला, सुरक्षेच्या नियमांचे उल्लंघन झाले होते का, किंवा वेल्डिंग/दुरुस्तीच्या कामादरम्यान काही तांत्रिक बिघाड झाला का, या दृष्टीने उच्चस्तरीय चौकशीचे आदेश देण्यात आले आहेत. या दुर्घटनेमुळे आंतरराष्ट्रीय सागरी वाहतूक आणि जहाज दुरुस्ती क्षेत्राला मोठा धक्का बसला आहे.