9/11 Attacks: अमेरिकेच्या गुप्तचर संस्थेच्या फाईलमधून नवीन खुलासे; वर्ल्ड ट्रेड सेंटर हल्ल्यापूर्वीच भारत होता बिन लादेनचा निशाणा

9/11 Attacks : अमेरिकेची गुप्तचर संस्था सीआयएने नुकत्याच सार्वजनिक केलेल्या एका अहवालातून हे उघड झाले आहे की, दहशतवादी ओसामा बिन लादेनने अनेक वर्षांपूर्वीच भारत आणि इतर अनेक देशांवर हल्ल्यांची योजना आखली होती.

• ९/११ आधीपासून भारत निशाण्यावर
• २५ व्या स्मृतिदिनानिमित्त मोठा खुलासा
• १९९८ चा गोपनीय अहवाल

जागतिक दहशतवादाचा चेहरा बनलेला अल-कायदाचा संस्थापक ओसामा बिन लादेन याने अमेरिकेवरील ९/११ (9/11 Attacks) च्या ऐतिहासिक दहशतवादी हल्ल्यांआधीच भारताला आपल्या हिंसक योजनांच्या रडारवर ठेवले होते, असा अत्यंत धक्कादायक खुलासा अमेरिकेची सर्वोच्च गुप्तचर संस्था सीआयए (CIA) च्या नवीन गोपनीय अहवालांतून झाला आहे. ११ सप्टेंबर २००१ रोजी अमेरिकेत झालेल्या भीषण दहशतवादी हल्ल्यांच्या २५ व्या स्मृतिदिनाचे औचित्य साधून सीआयएने तब्बल ७१ गोपनीय अहवाल सार्वजनिक केले आहेत. या कागदपत्रांमध्ये तत्कालीन अमेरिकन राष्ट्राध्यक्षांना दिलेली अत्यंत संवेदनशील माहिती समाविष्ट असून, त्यातून लादेनच्या दहशतवादी जाळ्याच्या जागतिक व्याप्तीवर नवा प्रकाश पडला आहे.

सार्वजनिक करण्यात आलेल्या फायलींमध्ये २८ ऑगस्ट १९९८ रोजी तयार करण्यात आलेला एक अत्यंत महत्त्वाचा दस्तऐवज समाविष्ट आहे, ज्याचे शीर्षक “Bin Laden’s Terrorist Network Remains a Threat” (बिन लादेनचे दहशतवादी जाळे अजूनही धोकादायक आहे) असे होते. हा अहवाल तत्कालीन अमेरिकन राष्ट्राध्यक्ष बिल क्लिंटन यांच्या दैनंदिन गुप्तचर ब्रीफिंगचा (President’s Daily Brief) भाग होता. यात सीआयएने स्पष्ट इशारा दिला होता की, बिन लादेनचे नेटवर्क केवळ मध्यपूर्वेपुरते मर्यादित नसून ते भारत आणि पाकिस्तानसह जगातील अनेक देशांमध्ये मोठ्या हल्ल्यांची आखणी करत आहे.

नैरोबी स्फोट आणि जागतिक षड्यंत्राचे जाळे

हा अहवाल तयार होण्याच्या अवघ्या तीन आठवड्यांपूर्वी, म्हणजेच ७ ऑगस्ट १९९८ रोजी, आफ्रिकेतील नैरोबी (केनिया) आणि दार-ए-सलाम (टांझानिया) येथील अमेरिकन दूतावासांवर अल-कायदाने भीषण बॉम्बस्फोट घडवून आणले होते. या हल्ल्यांमध्ये २२४ निष्पाप लोकांचा मृत्यू झाला होता आणि शेकडो जण जखमी झाले होते. या घटनेनंतर अमेरिकेने बिन लादेनच्या अफगाणिस्तानमधील तळांवर क्षेपणास्त्र हल्ले केले; मात्र या हल्ल्यांमधून लादेन आणि त्याचे मुख्य सहकारी बचावले.

जागतिक घडामोडी संबंधित बातम्या वाचण्यासाठी येथे क्लिक करा : India UAE Trade: ‘संरक्षण, AI, अवकाश, महत्त्वपूर्ण खनिजे…’; भारत आणि युएईमध्ये 11.5 अब्ज डॉलर्सच्या महागुंतवणुकीचा मार्ग मोकळा

सीआयएच्या अहवालानुसार, क्षेपणास्त्र हल्ल्यांनंतरही अल-कायदाचे संपर्क जाळे आणि प्रशिक्षण शिबिरे पूर्ववत सुरू झाली होती. लादेनने भारत, पाकिस्तान, इजिप्त, कुवेत, सौदी अरेबिया, येमेन, युगांडा आणि नायजेरिया या देशांना आपल्या दहशतवादी योजनांचे संभाव्य केंद्र म्हणून चिन्हांकित केले होते. या अहवालात भारतावर होणाऱ्या विशिष्ट हल्ल्याच्या जागेचा किंवा वेळेचा तपशील देण्यात आला नसला, तरी ९/११ च्या तब्बल तीन वर्षांपूर्वीच भारत लादेनच्या जागतिक हिंसक अजेंड्याचा भाग बनला होता, हे यावरून स्पष्ट होते.

Osama Bin Laden wanted to conduct attack in terror attack in India, declassified CIA documents show. Docs released as part of commemoration of the 25th anniversary of the September 11th terrorist attacks. pic.twitter.com/wk3G1FoDou — Sidhant Sibal (@sidhant) September 12, 2026

credit – social media and Twitter

युरोप आणि आशियातील गुप्त कारवाया

सीआयएने आपल्या मूल्यांकनात असेही नमूद केले होते की, बिन लादेनचे समर्थक आणि सहकाऱ्यांचे जाळे किमान ६० देशांमध्ये पसरलेले होते. अहवालात खुलासा करण्यात आला आहे की, अमेरिकन अधिकाऱ्यांनी अल्बानियातील तिराना आणि अझरबैझानमधील बाकू येथे हल्ल्यांची तयारी करणाऱ्या बिन लादेनच्या हस्तकांना अटक करण्यात स्थानिक प्रशासनाला मदत केली होती. उत्तर अमेरिका, युरोप आणि पूर्व आशियामध्ये अल-कायदाची पायाभूत रचना मजबूत असल्याने हे नेटवर्क कुठेही आणि कधीही अमेरिकन व पाश्चात्य हितसंबंधांवर हल्ला करू शकते, अशी भीती सीआयएने व्यक्त केली होती.

जागतिक घडामोडी संबंधित बातम्या वाचण्यासाठी येथे क्लिक करा : Russia Ukraine War: युक्रेनच्या शहरांवर 500 रशियन ड्रोनचा वर्षाव; 90 मिनिटांत शहरांचे मोठे नुकसान, 9 ठार

९/११ पूर्वीचे इशारे आणि ऐतिहासिक महत्त्व

या कागदपत्रांच्या खुलाशामुळे ९/११ च्या हल्ल्यांपूर्वी अमेरिकन गुप्तचर संस्थांकडे उपलब्ध असलेल्या माहितीचे महत्त्व पुन्हा एकदा अधोरेखित झाले आहे. ९/११ च्या तीन वर्षे आधीच अमेरिकेला लादेनच्या मनसुब्यांची कल्पना होती, परंतु या इशाऱ्यांचे योग्य गांभीर्य लक्षात न आल्यामुळे किंवा समन्वयाच्या अभावामुळे ११ सप्टेंबर २००१ चा भीषण अपघात टाळता आला नाही, असे तज्ज्ञांचे मत आहे.

भारतासाठी हा खुलासा अत्यंत महत्त्वाचा मानला जात आहे, कारण १९९० च्या दशकाच्या उत्तरार्धातच भारताला अल-कायदासारख्या आंतरराष्ट्रीय दहशतवादी संघटनेकडून असलेला धोका अमेरिकन कागदपत्रांत नोंदवला गेला होता. सीआयएने सार्वजनिक केलेले हे दस्तऐवज जागतिक सुरक्षेच्या इतिहासातील एका महत्त्वाच्या कालखंडाची माहिती देतात.