Donald Trump: अहमद अल-शारा यांना भेटल्यानंतर ट्रम्प सीरियावर झाले उदार, केली मोठी घोषणा

Donald Trump Big Relief to Syria : अमेरिकेचे अध्यक्ष डोनाल्ड ट्रम्प यांनी सीरियाच्या भविष्याबाबत एक धाडसी आणि निर्णायक पाऊल उचलले आहे. वाचा नेमक काय आहे प्रकरण?

Donald Trump Big Relief to Syria : अमेरिकेचे माजी अध्यक्ष डोनाल्ड ट्रम्प यांनी सीरियाच्या भविष्याबाबत एक धाडसी आणि निर्णायक पाऊल उचलले आहे. गेल्या १३ वर्षांपासून यादवी युद्धाने उद्ध्वस्त झालेल्या सीरियावर लादण्यात आलेले कठोर आर्थिक निर्बंध ट्रम्प प्रशासनाने सहा महिन्यांसाठी शिथिल केले आहेत. ही घोषणा त्यांनी सीरियाचे अंतरिम अध्यक्ष अहमद अल-शारा यांच्याशी सौदी अरेबियात झालेल्या चर्चेनंतर केली आहे.

ही शिथिलता अमेरिकेच्या २०१९ च्या ‘सीझर सीरिया सिव्हिलियन प्रोटेक्शन अ‍ॅक्ट’ अंतर्गत देण्यात आलेल्या निर्बंधांवर तात्पुरता दिलासा आहे. या निर्णयामुळे सीरियाच्या सेंट्रल बँकेसह काही आर्थिक संस्थांशी व्यवहार करण्याची परवानगी मिळणार असून, देशाच्या पुनर्बांधणीसाठी आर्थिक प्रवाह सुरू होण्याची शक्यता निर्माण झाली आहे.

अहमद अल-शारा यांचे नेतृत्व आणि सीरियातील बदलते राजकारण

गेल्या वर्षी, सीरियातील दीर्घकाळ सत्तेवर असलेल्या बशर अल-असद यांना सत्तेवरून हटवण्यात आल्यानंतर, माजी मिलिशिया कमांडर अहमद अल-शारा यांनी अंतरिम सरकारची सूत्रे हाती घेतली. युद्धात होरपळलेल्या सीरियाला स्थैर्याच्या दिशेने नेण्यासाठी अल-शारा यांचे नेतृत्व आशेचे किरण मानले जात आहे.

तथापि, अल-शारा यांचा हयात तहरीर अल-शाम (HTS) या अल-कायदाशी संबंधित संघटनांशी पूर्वीचा संबंध असल्यामुळे जागतिक समुदाय अजूनही त्यांच्या सरकारबाबत सावधगिरीने वागतो आहे. तरीसुद्धा, ट्रम्प यांचे हे पाऊल राजकीय धोरणात्मक निर्णय म्हणून पाहिले जात आहे, कारण यामुळे अमेरिका मध्यपूर्वेत पुन्हा प्रभाव निर्माण करू शकते.

जागतिक घडामोडी संबंधित बातम्या वाचण्यासाठी येथे क्लिक करा : FATF पुन्हा पाकिस्तानवर बरसणार; भारताने तयार केला ‘टेररिस्तान’विरोधात मजबूत खटला

ट्रम्प यांचे विधान आणि रणनीतीचे संकेत

ट्रम्प यांनी या निर्णयास “नवीन सुरुवात करण्याची संधी” असे संबोधले. त्यांच्या मते, “जर सीरियाला यावेळी पुनर्बांधणीस मदत केली नाही, तर अतिरेकी संघटना जसे की इस्लामिक स्टेट पुन्हा उदयाला येऊ शकतात. त्यामुळे हा निर्णय धोरणात्मक आहे, मानवतेसाठी आहे.” ते पुढे म्हणाले की, “सीरियाची परिस्थिती अत्यंत गंभीर आहे. पायाभूत सुविधा उद्ध्वस्त झाल्या आहेत, लाखो लोक विस्थापित झाले आहेत, बेरोजगारी व उपासमारीने जनतेचे जीवन उद्ध्वस्त झाले आहे. या पार्श्वभूमीवर अमेरिकेला शांततेच्या दिशेने पाऊल टाकणे आवश्यक आहे.”

निर्बंध शिथिलतेचा प्रभाव आणि भविष्यातील शक्यता

ही शिथिलता फक्त १८० दिवसांसाठी लागू करण्यात आली असून, परिस्थितीचे मूल्यमापन करून त्यानंतर निर्णय घेण्यात येईल. अमेरिका सध्या या सहकार्याला “पुनर्बांधणीसाठी संधी” म्हणून पाहत आहे, परंतु कोणत्याही प्रकारचा अतिरेकी संबंध दिसल्यास हे समर्थन तत्काळ मागे घेतले जाऊ शकते. सीरियाला पुनर्बांधणीसाठी अब्जावधी डॉलर्सची गरज आहे. युद्धामुळे 45 लाखांहून अधिक लोक देशोधडीला लागले आहेत, तर शेकडो शहरे आणि गावे पूर्णपणे उद्ध्वस्त झाली आहेत.

सौदी अरेबियातील ऐतिहासिक भेट

या घोषणेआधी ट्रम्प यांनी सौदी अरेबियात अहमद अल-शारा यांची गुप्त आणि महत्त्वाची भेट घेतली होती. या बैठकीत सीरियाच्या सुरक्षेपासून ते राजकीय स्थैर्यापर्यंत अनेक मुद्द्यांवर चर्चा झाली. या भेटीमुळेच ट्रम्प प्रशासनाने शांतता आणि पुर्ननिर्माण प्रक्रियेवर विश्वास दाखवला.

जागतिक घडामोडी संबंधित बातम्या वाचण्यासाठी येथे क्लिक करा : ‘जाऊ देऊ नका, त्याला पकडून…’ मोहम्मद युनूसच्या राजीनाम्याच्या खबरीवर तस्लिमा नसरीन कडाडल्या

 एक नवा अध्याय सुरू होण्याची शक्यता

ट्रम्प यांच्या या निर्णयामुळे मध्यपूर्वेतील राजकीय समीकरणे बदलण्याची चिन्हे आहेत. सीरियाच्या नवीन नेतृत्वाला आंतरराष्ट्रीय मान्यता मिळण्यासाठी ही एक संधी असू शकते. या तात्पुरत्या निर्णयामुळे सीरियाला आर्थिक श्वास मिळेल, पण अल-शारा सरकारने विश्वासार्हता आणि स्थैर्य सिद्ध करणे हे अत्यंत आवश्यक ठरणार आहे. अन्यथा, ही मदत पुन्हा मागे घेतली जाण्याची शक्यता कायम राहील. युद्धाच्या खुणा पुसण्यास आता सीरियाला संधी मिळाली आहे. आता जगाच्या विश्वासाला न्याय देण्याची जबाबदारी अल-शारा यांच्या खांद्यावर आहे.