युरोपमध्ये उष्णतेचा कहर! १० दिवसांत २३०० मृत्यू, हवामान बदल ठरतोय प्राणघातक ( फोटो सौजन्य : सोशल मीडिया)
10-day heatwave Europe : युरोपमध्ये अलीकडेच अनुभवलेल्या १० दिवसांच्या तीव्र उष्णतेच्या लाटेने संपूर्ण खंडाला हादरवून सोडले आहे. इम्पीरियल कॉलेज लंडन आणि लंडन स्कूल ऑफ हायजीन अँड ट्रॉपिकल मेडिसिनच्या शास्त्रज्ञांनी केलेल्या संशोधनानुसार, या लाटेमुळे एकट्या १२ शहरांमध्ये सुमारे २,३०० लोकांचा मृत्यू झाला आहे. त्यापैकी १,५०० मृत्यू हवामान बदलामुळेच झाले, हे या अभ्यासातून समोर आले आहे.
या अभ्यासाचा कालावधी २ जुलै रोजी संपलेल्या दहा दिवसांमध्ये होता. यामध्ये पश्चिम युरोपमधील अनेक प्रमुख शहरांचा समावेश आहे. बार्सिलोना, माद्रिद, लंडन आणि मिलान या शहरांमध्ये उष्णतेचे प्रचंड प्रमाण होते. विशेषतः स्पेनमध्ये तापमान ४० अंश सेल्सिअसपेक्षा अधिक पोहोचले आणि फ्रान्समध्ये उष्णतेमुळे जंगलांना आग लागण्याच्या घटना घडल्या.
संशोधनामध्ये असे स्पष्टपणे नमूद करण्यात आले आहे की, हवामान बदलामुळे युरोपमधील तापमान सरासरीपेक्षा ४ अंशांनी वाढले, ज्यामुळे ही लाट अधिक तीव्र आणि प्राणघातक ठरली. इम्पीरियल कॉलेज लंडनचे डॉ. बेन क्लार्क म्हणाले की, “पूर्वीपेक्षा अधिक गरम वातावरणामुळे उष्णतेच्या लाटा आता केवळ असह्यच नव्हे, तर जीवघेण्या होत आहेत.”
जागतिक घडामोडी संबंधित बातम्या वाचण्यासाठी येथे क्लिक करा : VIDEO VIRAL : लाल समुद्रात टायटॅनिकसारखी दुर्घटना! हुथी बंडखोरांचा जीवघेणा हल्ला; जहाजाचे दोन तुकडे, 3 ठार
उष्णतेमुळे झालेल्या मृत्यूंचा अचूक अंदाज लावण्यासाठी शास्त्रज्ञांनी स्थापित महामारीशास्त्रीय मॉडेल्स, ऐतिहासिक मृत्युदर आणि आरोग्य स्थितीचा अभ्यास केला. अनेक वेळा उष्णतेमुळे होणारे मृत्यू अधिकृत नोंदीत समाविष्ट होत नाहीत, कारण बऱ्याच सरकारांकडून त्याचा डेटा प्रकाशितच केला जात नाही. त्यामुळे संशोधकांनी समवयस्क पुनरावलोकन पद्धती वापरून अंदाज लावला.
युरोपियन युनियनच्या कोपर्निकस क्लायमेट चेंज सर्व्हिसच्या मासिक बुलेटिननुसार, गेल्या महिन्यात युरोपने इतिहासातील तिसरा सर्वात उष्ण जून अनुभवला. पश्चिम युरोपात तर हा रेकॉर्डवरील सर्वात उष्ण जून ठरला आहे. बहुतेक प्रदेशांमध्ये उन्हाळा असह्य झाला आहे.
जागतिक घडामोडी संबंधित बातम्या वाचण्यासाठी येथे क्लिक करा : INS अरिहंत ते अरिघाट! रशियाच्या मदतीने भारत कसा बनला अणु पाणबुडी महासत्ता? ‘गुप्त ATV प्रकल्पाची’ कहाणी
या घडामोडी केवळ आकडेवारीपुरत्या मर्यादित नाहीत. त्या हवामान बदलाचे गंभीर इशारे आहेत. तापमानवाढीचा परिणाम केवळ पर्यावरणापुरता मर्यादित न राहता, तो मानवी जीवनावरही थेट परिणाम करत आहे. युरोपमधील सद्यस्थिती ही जागतिक चेतावणी आहे – जर आपण आजही हवामान बदलाच्या समस्येकडे दुर्लक्ष केले, तर उद्या हे संकट प्रत्येक खंडावर थडकल्याशिवाय राहणार नाही.
