Flavio Bolsonaro Miami News Brazil Election Fraud Claim
ब्राझीलमधील (Brazil Election) राष्ट्रपती निवडणुकीच्या निकालानंतर आंतरराष्ट्रीय राजकारणात मोठी खळबळ उडाली आहे. पराभूत झालेले उमेदवार आणि माजी अध्यक्ष जॅर बोल्सोनारो यांचे पुत्र सिनेटर फ्लॅव्हिओ बोल्सोनारो हे देश सोडून अमेरिकेतील मियामी शहरात दाखल झाले आहेत. मियामीत पोहोचताच त्यांनी अत्यंत आक्रमक भूमिका घेत स्वतःला ब्राझीलचे ‘कायदेशीर नेते’ घोषित केले आहे. देशातील सर्वोच्च न्यायालय आणि नवनिर्वाचित राष्ट्राध्यक्ष लुईझ इनासिओ लुला दा सिल्वा यांनी संगनमत करून निवडणुकीत मोठी हेराफेरी केली आणि आपल्याला सत्तेपासून दूर ठेवले, असा गंभीर आरोप त्यांनी केला आहे.
ब्राझीलच्या निवडणूक आयोगाने जाहीर केलेल्या अधिकृत निकालांनुसार, लुला दा सिल्वा यांनी सुमारे ४५ लाख मतांच्या मोठ्या फरकाने ही निवडणूक जिंकली आहे. असे असूनही फ्लॅव्हिओ बोल्सोनारो यांनी पराभव स्वीकारण्यास स्पष्ट नकार दिला आहे. विशेष म्हणजे, ब्राझीलच्या सर्वोच्च न्यायालयाने त्यांच्याविरुद्ध चौकशी सुरू असल्याने त्यांचा पासपोर्ट जप्त करण्याचे आदेश दिले होते. या कायदेशीर आदेशाचा अवमान करत ते देशाबाहेर पडले. या प्रवासात आपल्याला अर्जेंटिनाचे अध्यक्ष हाव्हिएर मिलेई यांनी मदत केली, तसेच अमेरिकेचा व्हिसा मंजूर केल्याबद्दल त्यांनी अमेरिकेचे राष्ट्राध्यक्ष डोनाल्ड ट्रम्प यांचे विशेष आभार मानले आहेत.
जागतिक घडामोडी संबंधित बातम्या वाचण्यासाठी येथे क्लिक करा : US Nuclear Lab : अमेरिकेच्या प्रमुख अणुप्रयोगशाळेत अचानक भीषण आग; आणीबाणी जाहीर, जाणून घ्या नक्की काय घडले?
अमेरिकेत उतरल्यानंतर फ्लॅव्हिओ बोल्सोनारो यांनी ‘X’ (पूर्वीचे ट्विटर) या सोशल मीडिया प्लॅटफॉर्मवर एक खुले पत्र प्रसिद्ध करून मोठा गदारोळ निर्माण केला. या पत्राच्या सुरुवातीच्या मसुद्यात त्यांनी स्वतःचा उल्लेख ‘ब्राझीलचा नव्याने निवडून आलेला अध्यक्ष’ असा केला होता. मात्र, काही वेळातच त्यांनी ही पोस्ट डिलीट केली आणि सुधारित पत्र शेअर केले. या नवीन पत्रात त्यांनी स्वतःला ‘ब्राझीलचा कायदेशीर आणि अधिकृत नेता’ असे संबोधले.
CARTA À NAÇÃO BRASILEIRA 🇧🇷
28.10.26 https://t.co/QqOGZuF8G0 — Flávio Bolsonaro (@FlavioBolsonaro) October 28, 2026
credit – social media and Twitter
आपल्या या संदेशात त्यांनी दावा केला की, “माझ्या ६ कोटी समर्थकांना आणि संपूर्ण ब्राझीलच्या जनतेला हे चांगले ठाऊक आहे की देशाचा खरा नेता कोण आहे.” मतचोरी आणि निवडणुकीत घोटाळा करणारे लोक हे एका संघटित गुन्हेगारी टोळीचा भाग असून त्यांनी देशात हुकूमशाही लादली आहे, असा थेट हल्लाबोल त्यांनी लुला सरकारवर केला.
फ्लॅव्हिओ बोल्सोनारो यांनी निवडणुकीत फसवणूक झाल्याचा दावा केला असला, तरी त्यासाठी त्यांनी कोणताही ठोस पुरावा दिलेला नाही. त्यांचा मुख्य आक्षेप असा आहे की, सर्वोच्च न्यायालयाच्या न्यायाधीशांनी रविवारी मतदानाची वेळ दोन तासांनी वाढवून दिली होती, ज्याचा फायदा लुला यांच्या पक्षाला झाला. दुसरीकडे, लुला यांच्या पक्षाने आरोप केला होता की, ईशान्येकडील राज्यांमध्ये त्यांच्या मतदारांना मतदानापासून रोखण्याचा प्रयत्न झाला, तर बोल्सोनारो यांच्या पक्षाने पावसाचे कारण देऊन दक्षिणेतील राज्यांत मुदतवाढ मागितली होती.
जागतिक घडामोडी संबंधित बातम्या वाचण्यासाठी येथे क्लिक करा : US Midterms 2026 : अमेरिका मध्यावधी निवडणुकांपूर्वी मोठा सायबर हल्ला; फेडरल इलेक्शन कमिशनची फाइलिंग सिस्टीम हॅक झाल्याने खळबळ
इन्स्पर (Insper) या नामांकित संस्थेचे प्राध्यापक पेड्रो बर्गास यांच्या विश्लेषानुसार, वाढवून दिलेल्या दोन तासांच्या कालावधीत संपूर्ण देशात ३५,००० पेक्षाही कमी मते पडली होती. ही संख्या एकूण झालेल्या मतदानाच्या अवघ्या ०.०३ टक्के इतकी अत्यंत नगण्य आहे. त्यामुळे मतदानाची वेळ वाढवल्याने निकालावर कोणताही फरक पडलेला नाही. राजकीय आणि कायदेतज्ज्ञांच्या मते, या निष्कर्षांमुळे फ्लॅव्हिओ यांची निवडणूक रद्द करण्याची मागणी न्यायालयात टिकण्याची शक्यता नाममात्र आहे.
फ्लॅव्हिओ बोल्सोनारो यांचे हे पाऊल त्यांच्या वडिलांच्या कृतीची पुनरावृत्ती मानले जात आहे. २०२२ च्या निवडणुकीत लुला यांच्याकडून पराभूत झाल्यानंतर त्यांचे वडील आणि माजी अध्यक्ष जॅर बोल्सोनारो हेदेखील सत्ता सोडण्यापूर्वी अमेरिकेत निघून गेले होते. नंतर ब्राझीलमध्ये परतल्यावर, जॅर बोल्सोनारो यांच्यावर सत्तापालटाचा कट रचल्याचा आरोप सिद्ध झाला आणि त्यांना २७ वर्षांच्या तुरुंगवासाची कठोर शिक्षा सुनावण्यात आली.
फ्लॅव्हिओ यांनी आपण देश सोडून पळून गेलो नसून, स्वतःच्या आणि कुटुंबाच्या सुरक्षेसाठी बाहेर पडलो असल्याचे स्पष्ट केले आहे. मात्र, या घटनेमुळे अमेरिका आणि ब्राझील या दोन मोठ्या देशांमधील राजनैतिक संबंध ताणले जाण्याची शक्यता निर्माण झाली आहे. जगातील दुर्मीळ खनिजांचा (Critical Minerals) दुसरा सर्वात मोठा साठा ब्राझीलमध्ये आहे. राष्ट्राध्यक्ष लुला यांनी अमेरिकेवर बोल्सोनारो कुटुंबाला पाठीशी घालून ब्राझीलच्या सत्तेत हस्तक्षेप करण्याचा प्रयत्न करत असल्याचा आरोप केला आहे, तर अमेरिकन प्रशासनाने या आरोपांचा पूर्णपणे इन्कार केला आहे.
.png "Videos"){kind=small}
