Greece-Israel Deal : ग्रीसची आकाशाला ‘लोखंडी ढाल’; इस्रायलसोबत ३.५ अब्ज डॉलरचा करार

Greece-Israel Deal : ग्रीस आणि इस्रायलने ३.५ अब्ज डॉलरचा ‘अकिलीस शिल्ड हवाई संरक्षण करार केला आहे. या अंतर्गत David’s Sling, SPYDER, BARAK MX, रडार आणि Drone Dome यांसारख्या अत्याधुनिक प्रणाली ग्रीसला मिळणार आहेत. तुर्कीशी असलेल्या दीर्घकालीन तणावाच्या पार्श्वभूमीवर ग्रीसची संरक्षण क्षमता वाढवण्यासाठी करार अत्यंत महत्त्वाचा आहे.

• तुर्कीच्या वाढत्या लष्करी क्षमतेच्या पार्श्वभूमीवर मोठी तयारी
• इस्रायल-ग्रीस संरक्षण सहकार्याला नवी दिशा
• ग्रीसला काय मिळणार

Greece-Israel Deal : ग्रीस आणि इस्रायलने तब्बल ३.५ अब्ज डॉलरच्या संरक्षण करारावर स्वाक्षरी केली आहे. ‘अकिलीस शिल्ड’ असे नाव देण्यात आलेल्या या कराराअंतर्गत ग्रीससाठी बहुस्तरीय हवाई आणि क्षेपणास्त्र संरक्षण व्यवस्था उभारण्यात येणार आहे. हा करार दोन्ही देशांमधील आतापर्यंतचा सर्वात मोठा संरक्षण करार मानला जात आहे. ग्रीसच्या हवाई क्षेत्राला क्षेपणास्त्रे, ड्रोन आणि इतर हवाई धोक्यांपासून संरक्षण देणे हा या यंत्रणेचा प्रमुख उद्देश आहे.

ग्रीसला काय मिळणार

या संरक्षण कवचामध्ये इस्रायलच्या David’s Sling, SPYDER आणि BARAK MX या अत्याधुनिक संरक्षण प्रणालींचा समावेश करण्यात आला आहे. त्यासोबतच MMR रडार, राष्ट्रीय कमांड-अँड-कंट्रोल प्रणाली आणि ड्रोनविरोधी Drone Dome यंत्रणाही ग्रीसला मिळणार आहे. त्यामुळे विविध प्रकारच्या हवाई धोक्यांचा एकाच एकात्मिक संरक्षण व्यवस्थेतून सामना करण्याची क्षमता ग्रीसला मिळण्याची शक्यता आहे.

Indus Water Treaty : सिंधू जलसंधीबाबत हेगच्या निर्णयाचे पाकिस्तानकडून स्वागत; भारताने निर्णय फेटाळला

तुर्कीच्या वाढत्या लष्करी क्षमतेच्या पार्श्वभूमीवर मोठी तयारी

ग्रीसच्या या संरक्षण करारामागे पूर्व भूमध्य समुद्रातील बदलते सुरक्षा समीकरण महत्त्वाचे मानले जात आहे. ग्रीस आणि त्याचा शेजारी देश तुर्की हे दोन्ही NATO सदस्य असले तरी दोन्ही देशांमध्ये एजियन समुद्र, सागरी सीमारेषा आणि पूर्व भूमध्य समुद्रातील अधिकारांवरून दीर्घकाळापासून तणाव आहे. तुर्कीच्या वाढत्या ड्रोन क्षमतेमुळे ग्रीसने आपली हवाई संरक्षण व्यवस्था अधिक मजबूत करण्यावर भर दिला आहे.

ग्रीस आपल्या संपूर्ण लष्करी क्षमतेचे आधुनिकीकरण करण्याच्या मोठ्या योजनेवर काम करत आहे. २०३६ पर्यंत संरक्षण क्षेत्रासाठी सुमारे २८ अब्ज युरो खर्च करण्याचे नियोजन करण्यात आले आहे. यामध्ये अमेरिकेकडून F-35 लढाऊ विमाने आणि इतर अत्याधुनिक शस्त्रास्त्रांची खरेदीही समाविष्ट आहे.

इस्रायलसोबतचा नवा करार या व्यापक आधुनिकीकरण मोहिमेतील महत्त्वाचा टप्पा ठरला आहे. ग्रीसला आधुनिक क्षेपणास्त्र आणि ड्रोनविरोधी क्षमता मिळाल्यामुळे देशाच्या संरक्षण व्यवस्थेला मोठी चालना मिळू शकते.

Gaza War : गाझा शहराच्या पश्चिमेला इस्रायली हवाई हल्ले; ५ पॅलेस्टिनी ठार

इस्रायल-ग्रीस संरक्षण सहकार्याला नवी दिशा

या करारामुळे इस्रायल आणि ग्रीसमधील संरक्षण सहकार्य आणखी मजबूत होणार आहे. दोन्ही देश यापूर्वीपासून संयुक्त लष्करी सराव, हवाई प्रशिक्षण, सायबर सुरक्षा आणि ड्रोनविरोधी तंत्रज्ञानाच्या क्षेत्रात सहकार्य करत आहेत. मात्र, ‘अकिलीस शिल्ड’ हा या भागीदारीला नव्या पातळीवर नेणारा करार मानला जात आहे.

करारात तंत्रज्ञान हस्तांतरण आणि औद्योगिक सहकार्याचाही समावेश आहे. त्यामुळे ग्रीसच्या स्थानिक संरक्षण उद्योगाला इस्रायली तंत्रज्ञानाचा फायदा होण्याची शक्यता आहे. आधुनिक युद्धात ड्रोन, बॅलिस्टिक क्षेपणास्त्रे, सायबर हल्ले आणि मानवरहित यंत्रणांचे महत्त्व वाढत असल्याने ग्रीसने बहुस्तरीय संरक्षण यंत्रणेवर भर दिला आहे.

इस्रायलसाठीही हा करार महत्त्वाचा आहे. गाझा आणि इतर प्रादेशिक संघर्षांच्या पार्श्वभूमीवर इस्रायली संरक्षण तंत्रज्ञानाची आंतरराष्ट्रीय मागणी वाढली आहे. त्यामुळे ग्रीससोबतचा हा करार इस्रायलच्या संरक्षण उद्योगासाठी मोठे व्यावसायिक आणि सामरिक यश मानले जात आहे.