Islamabad Talks: महासत्तेची अग्निपरीक्षा! 47 वर्षांचे वैर विसरून US-Iran पाकिस्तानमध्ये एकाच टेबलावर; निश्चित करणार जगाचे भवितव्य

Islamabad Talks : पश्चिम आशियाई संघर्ष आणि शांतता प्रक्रियेवर चर्चा करण्यासाठी, १९७९ च्या क्रांतीनंतरची सर्वात मोठी बैठक इस्लामाबादमध्ये इराण आणि अमेरिका यांच्यात होणार आहे.

• १९७९ नंतरची सर्वात मोठी बैठक
• पाकिस्तानात शाही स्वागत
• अटी शर्थींचे राजकारण

US-Iran Peace Talks Islamabad 2026 : जागतिक राजकारणाच्या इतिहासात आजचा दिवस सुवर्ण अक्षरांनी लिहिला जाईल. १९७९ च्या इराणी क्रांतीनंतर प्रथमच अमेरिका आणि इराण (US-Israel Iran War) या दोन कट्टर शत्रू देशांचे सर्वोच्च प्रतिनिधी एकाच टेबलावर चर्चेसाठी बसणार आहेत. पाकिस्तानची राजधानी इस्लामाबाद (Islamabad) या ऐतिहासिक ‘इस्लामाबाद संवादा’ची साक्षीदार होत आहे. काल रात्री उशिरा इराणचे संसद अध्यक्ष मोहम्मद बागेर गालिबाफ यांच्या नेतृत्वाखालील शिष्टमंडळ नूर खान हवाई तळावर दाखल झाले, तेव्हा पाकिस्तानचे लष्करप्रमुख फील्ड मार्शल आसिम मुनीर आणि परराष्ट्र मंत्री इशाक दार यांनी त्यांचे अत्यंत आदराने स्वागत केले.

हाय-व्होल्टेज शिष्टमंडळ: दोन्ही बाजूंचे दिग्गज मैदानात

इराणने या चर्चेसाठी आपली सर्व शक्ती पणाला लावली आहे. गालिबाफ यांच्यासोबत परराष्ट्र मंत्री अब्बास अराघची, संरक्षण परिषदेचे सचिव अली अकबर अहमदीयन आणि केंद्रीय बँकेचे प्रमुख अब्दोलनासेर हेमती असा मोठा ताफा आहे. दुसरीकडे, अमेरिकेचे नेतृत्व उपराष्ट्राध्यक्ष जे.डी. व्हान्स करत असून, त्यांच्यासोबत डोनाल्ड ट्रम्प यांचे विश्वासू सल्लागार जेरेड कुशनर आणि स्टीव्ह विटकॉफ आहेत. हे केवळ एक शिष्टमंडळ नसून, दोन्ही देशांच्या धोरणनिर्मितीतील सर्वात प्रभावशाली व्यक्तींचा गट आहे.

जागतिक घडामोडी संबंधित बातम्या वाचण्यासाठी येथे क्लिक करा : World Peace : ‘इराण-रशियापासून युक्रेनपर्यंत…’ 72 तासांत थांबली आठ देशांमधील युद्ध; जाणून घ्या ‘हे’ दिव्य कसे घडले?

चर्चेच्या अटी: इराणचा पवित्रा कडक

ही चर्चा सुरू होण्यापूर्वीच इराणने आपले इरादे स्पष्ट केले आहेत. गालिबाफ यांनी विमानतळावर उतरताच संकेत दिले की, जोपर्यंत लेबनॉनमध्ये पूर्णपणे युद्धविराम होत नाही आणि अमेरिकेने जप्त केलेली इराणची अब्जावधी डॉलर्सची मालमत्ता मुक्त केली जात नाही, तोपर्यंत कोणतीही “अर्थपूर्ण” चर्चा शक्य नाही. इराणसाठी लेबनॉनमधील इस्रायली हल्ले थांबवणे ही प्रतिष्ठेची लढाई बनली आहे.

See more

BREAKING: Iran’s negotiating team led by parliament speaker Mohammad Bagher Ghalibaf arrives in Pakistan for talks with US pic.twitter.com/es9XpxBgiB — Rapid Report (@RapidReport2025) April 10, 2026

credit – social media and Twitter

ट्रम्प यांचा संभ्रम आणि होर्मुझचा तिढा

वॉशिंग्टनमधून मिळालेल्या माहितीनुसार, अमेरिकेचे अध्यक्ष डोनाल्ड ट्रम्प हे या चर्चेबाबत सकारात्मक असले तरी साशंक आहेत. ट्रम्प यांनी मान्य केले आहे की, चर्चा यशस्वी झाली तरी ‘होर्मुझची सामुद्रधुनी’ पुन्हा उघडणे ही तांत्रिक आणि राजकीय दृष्ट्या मोठी कसरत असेल. होर्मुझ बंद असल्यामुळे जागतिक तेल बाजारात आधीच मोठी खळबळ उडाली आहे. याशिवाय, इस्रायल आणि लेबनॉनमधील वाढता तणाव हा या शांतता चर्चेतील सर्वात मोठा अडथळा ठरण्याची शक्यता आहे.

जागतिक घडामोडी संबंधित बातम्या वाचण्यासाठी येथे क्लिक करा : Peace Talks: ‘आम्ही महासत्ता बनणार!’ मोजतबा खामेनींचे शस्त्रसंधीनंतरचे पहिलेच स्फोटक विधान; सूड घेणार म्हणत अमेरिकेला थेट चॅलेंज

पाकिस्तानचे ‘मध्यस्थ’ म्हणून पुनरागमन

या बैठकीचे यजमानपद भूषवून पाकिस्तानने जागतिक राजकारणात पुन्हा एकदा आपली पकड मजबूत करण्याचा प्रयत्न केला आहे. लष्करप्रमुख आसिम मुनीर यांनी इराणी शिष्टमंडळाचे केलेले स्वागत आणि अमेरिकन शिष्टमंडळाला दिलेले सुरक्षिततेचे आश्वासन, हे पाकिस्तानसाठी मोठे राजनैतिक यश मानले जात आहे. आता संपूर्ण जगाचे डोळे इस्लामाबादच्या त्या बंद दाराआड होणाऱ्या चर्चेकडे लागले आहेत, जिथे जगाला युद्धाच्या विळख्यातून बाहेर काढण्याचा प्रयत्न केला जाईल.