Masood Azhar : FATF ची भीती की नवा डाव? 26/11 मुंबई हल्ल्यातील गुन्हेगार मसूद अझरवर पाकिस्तानात 70 लाख रुपयांचे बक्षीस

Masood Azhar: एफआयएच्या नवीन यादीत २६/११ मुंबई दहशतवादी हल्ल्यातील गुन्हेगारांना मदत केल्याचा आरोप असलेल्या १९ दहशतवाद्यांच्या नावांचाही समावेश आहे, ज्यामध्ये आर्थिक मदत पुरवणाऱ्या आणि हल्लेखोरांनी वापरलेल्या बोटी चालवण्यास मदत करणाऱ्यांचाही समावेश आहे.

• ७० लाख रुपयांचे बक्षीस
• २६/११ मुंबई हल्ल्यातील संशयित
• पाकिस्तानचा दुटप्पा चेहरा

आंतरराष्ट्रीय स्तरावर आर्थिक निर्बंधांचा बडगा उचलणाऱ्या फायनान्शिअल ॲक्शन टास्क फोर्सच्या (FATF) आगामी बैठकीच्या पार्श्वभूमीवर पाकिस्तानने पुन्हा एकदा आपल्या जुन्या राजकीय नाटकाचा आधार घेतला आहे. पाकिस्तानी सरकारने जैश-ए-मोहम्मद या दहशतवादी संघटनेचा प्रमुख मसूद अझर (Masood Azhar) याला फेडरल इन्व्हेस्टिगेशन एजन्सीच्या (FIA) मोस्ट वॉन्टेड दहशतवाद्यांच्या ‘रेड बुक’मध्ये समाविष्ट केले असून, त्याच्या अटकेसाठी ७० लाख रुपयांचे बक्षीस जाहीर केले आहे.

ऑक्टोबरमध्ये होणाऱ्या एफएटीएफच्या बैठकीत ब्लॅक किंवा ग्रे लिस्टमध्ये जाण्यापासून वाचण्यासाठी पाकिस्तानने ही उतावीळ पावले उचलली असल्याचे स्पष्ट दिसते. पाकिस्तानने यापूर्वीही आंतरराष्ट्रीय दबावाखाली अशीच नाटके केली आहेत. भारतीय लष्कराने ‘ऑपरेशन सिंदूर’ राबवून पाकिस्तान आणि पाकव्याप्त काश्मीरमधील ९ दहशतवादी तळांवर यशस्वी हल्ला केला होता. त्या कारवाईनंतर मसूद अझरने स्वतः निवृत्त होऊन कुटुंबातील ९ सदस्यांच्या हत्येची जाहीर कबुली दिली होती. आता मात्र पाकिस्तान सरकार तो देशात उपलब्धच नाही असा कांगावा करत आहे.

मसूद अझरबाबत पाकिस्तानचा बनाव आणि भारतीय गुप्तचर यंत्रणांचा दावा

पाकिस्तानने याआधी असा दावा केला होता की मसूद अझर पाकिस्तानात नसून तो अफगाणिस्तानमध्ये लपून बसला आहे. २०२१ मध्ये एफआयएने त्याला पकडून देणाऱ्यास ५० लाख रुपयांचे बक्षीस जाहीर केले होते. पाच वर्षांनंतर आता हे बक्षीस २० लाख रुपयांनी वाढवून ७० लाख रुपये करण्यात आले आहे. परंतु भारतीय गुप्तचर यंत्रणांच्या तांत्रिक विश्लेषणातून आणि ताज्या अहवालांतून धक्कादायक माहिती समोर आली आहे. गेल्या सहा महिन्यांच्या तपासावरून मसूद अझर अफगाणिस्तानमध्ये नसून पाकिस्तानच्या सिंध प्रांतातील नवाबशाह शहरात अत्यंत सुरक्षितपणे लपून बसला असल्याचे उघड झाले आहे.

जागतिक घडामोडी संबंधित बातम्या वाचण्यासाठी येथे क्लिक करा : Dario Amodei: AIची आंधळी शर्यत थांबवा! अँथ्रोपिकचे सीईओ डारिओ अमोदेई यांचा इशारा; मानवी सुरक्षिततेसाठी ‘स्पीड ब्रेक’ आवश्यक

२६/११ मुंबई दहशतवादी हल्ल्यातील संशयितांवर एफआयएची नवी यादी

एफआयएने प्रसिद्ध केलेल्या नवीन ‘रेड बुक’मध्ये २६/११ च्या मुंबई दहशतवादी हल्ल्यातील गुन्हेगारांना प्रत्यक्ष व अप्रत्यक्ष मदत करणाऱ्या १९ दहशतवाद्यांच्या नावांचा समावेश करण्यात आला आहे. यामध्ये हल्लेखोरांना आर्थिक पुरवठा करणारे आणि समुद्राच्या मार्गाने मुंबईत पोहोचवण्यासाठी बोटी चालवण्यास मदत करणारे सहभागी आहेत.

या यादीतील १७ दहशतवाद्यांचे फोटो आणि मुंबई हल्ल्यातील त्यांच्या विशिष्ट भूमिकेचा तपशील समाविष्ट आहे. मात्र, पाकिस्तानच्या दुटप्प्या धोरणाचा पुरावा म्हणजे त्यांनी दोन मुख्य व्यक्तींचे फोटो, लश्कर-ए-तोयबा (LeT) सोबतचे त्यांचे संबंध आणि हल्ल्यातील भूमिकेचा तपशील चलाखीने हटवला आहे.

• मोहम्मद खान (तुरबत): ज्याने हल्लेखोरांना मुंबईकडे नेण्यासाठी ‘अल-हुसैनी’ बोट पुरवली होती, त्याचे नाव यादीत ठेवले गेले असले तरी त्याचा फोटो आणि लश्कर-ए-तोयबाशी असलेले संबंध काढून टाकण्यात आले आहेत.
• अब्दुल रहमान (बहावलनगर): या दहशतवाद्याचा फोटो आणि त्याची माहिती २०२१ च्या एफआयए यादीत होती, परंतु चालू यादीतून त्याचा फोटो हटवण्यात आला आहे.

सध्याच्या एफआयए यादीमध्ये ‘अल-हुसैनी’ आणि ‘अल-फौज’ या बोटींचा वापर करून १० दहशतवाद्यांना मुंबईत उतरवणाऱ्या लश्कर-ए-तोयबाच्या ११ प्रमुख दहशतवाद्यांची नावे अजूनही कायम आहेत.

जागतिक घडामोडी संबंधित बातम्या वाचण्यासाठी येथे क्लिक करा : Saudi Arabia : मध्य पूर्वेत नवे राजकीय समीकरण; हुथींविरुद्धच्या लढ्यात सौदी अरेबियाने मागितली इस्रायलची अप्रत्यक्ष मदत

जैश-ए-मोहम्मदचे १५० कोटींचे फंड कलेक्शन: पाकिस्तानच्या कारवाईचा फोलपणा

एकीकडे पाकिस्तान सरकार मसूद अझरच्या डोक्यावर ७० लाख रुपयांचे इनाम ठेवून आंतरराष्ट्रीय समुदायाची दिशाभूल करत आहे, तर दुसरीकडे जैश-ए-मोहम्मदचा दहशतवादी उघडपणे कबूल करत असलेला एक व्हिडिओ समोर आला आहे. या व्हिडिओमध्ये जैशच्या सदस्याने उघडपणे कबुली दिली आहे की, त्यांच्या संघटनेने गेल्या एका वर्षात १.५ अब्ज पाकिस्तानी रुपये (तब्बल १५० कोटी रुपये) दहशतवादी कारवायांसाठी जमा केले आहेत.

यावरून हे स्पष्ट होते की, ७० लाख रुपयांचे बक्षीस हे केवळ एफएटीएफच्या बैठकीत कारवाई दाखवण्यासाठी रचलेला एक दिखावा आहे. प्रत्यक्षात पाकिस्तानच्या भूमीवर दहशतवादी संघटना कोट्यवधी रुपयांचा निधी गोळा करून बिनदिक्कतपणे कार्यरत आहेत.