PTI Protest : इस्लामाबादमध्ये होणार अंतर्गत महायुद्ध! आसिम मुनीर यांनी उभ्या केल्या कंटेनरच्या भिंती; इम्रान समर्थक बुलडोझरसह सज्ज

PTI Protest : पीटीआयचे कार्यकर्ते आणि समर्थक इम्रान खान यांच्या सुटकेच्या मागणीसाठी रस्त्यावर उतरणार आहेत. त्यांना रोखण्यासाठी सरकारने इस्लामाबादमध्ये कंटेनर लावून बॅरिकेड्स लावले आहेत.

• कंटेनर विरुद्ध बुलडोझर संघर्ष
• लष्कर आणि सरकारची कडक भूमिका
• २०२४ पेक्षा मोठ्या आंदोलनाची तयारी

पाकिस्तानच्या राजकारणात पुन्हा एकदा मोठा राजकीय भूकंप झाला असून, राजधानी इस्लामाबादला छावणीचे स्वरूप आले आहे. पाकिस्तानचे माजी पंतप्रधान आणि पाकिस्तान तहरीक-ए-इन्साफ (PTI Protest) पक्षाचे प्रमुख इम्रान खान (Imran Khan) यांच्या सुटकेसाठी पक्षाचे कार्यकर्ते आणि समर्थक २७ सप्टेंबर रोजी राजधानी इस्लामाबादला घेराव घालणार आहेत. हे आंदोलन रोखण्यासाठी पाकिस्तानचे लष्करप्रमुख जनरल असिम मुनीर आणि पंतप्रधान शाहबाज शरीफ यांच्या सरकारने अभूतपूर्व पावले उचलली आहेत. संपूर्ण इस्लामाबाद शहराच्या सीमा २० हजारांहून अधिक शिपिंग कंटेनर्स लावून सील करण्यात आल्या आहेत. इतकेच नाही तर हे कंटेनर हलवता येऊ नयेत म्हणून त्यांना एकमेकांशी वेल्डिंग करून जोडण्यात आले आहे.

दुसरीकडे, इम्रान खान यांच्या समर्थकांनी आणि पीटीआयच्या सैन्याने सरकारची ही तटबंदी उद्ध्वस्त करण्याची पूर्ण तयारी केली आहे. पाकिस्तानभरातून पीटीआय कार्यकर्ते भाड्याने बुलडोझर, क्रेन आणि अवजड यंत्रसामग्री गोळा करत आहेत. रस्ते अडवण्यासाठी लावलेले हे लोखंडी कंटेनर पाडण्यासाठी आणि रस्ता साफ करण्यासाठी या बुलडोझरचा वापर केला जाणार आहे. पीटीआय नेते नईम हैदर पंजुथा यांनी स्पष्टपणे सांगितले आहे की, “सरकारने संपूर्ण इस्लामाबाद बंद केले आहे, पण आम्ही ते उघडू. कोणत्याही परिस्थितीत आम्ही देशाची राजधानी बंद राहू देणार नाही.”

खैबर पख्तूनख्वाच्या मुख्यमंत्र्यांचे नेतृत्त्व आणि ‘२०२४ पेक्षा मोठ्या आंदोलनाची’ आखणी

या ऐतिहासिक आंदोलनाचे नेतृत्व खैबर पख्तूनख्वा प्रांताचे मुख्यमंत्री करत आहेत. त्यांनी खैबर ते इस्लामाबाद अशी भव्य रॅली काढण्याची घोषणा केली असून हजारो समर्थक या यात्रेत सामील होत आहेत. पीटीआयच्या मते, हे आंदोलन २०२४ मध्ये झालेल्या आंदोलनापेक्षाही कितीतरी पटीने मोठे असेल. सरकारच्या अडथळ्यांना न जुमानता देशभरातून लाखो समर्थक इस्लामाबादच्या दिशेने कूच करत आहेत.

जागतिक घडामोडी संबंधित बातम्या वाचण्यासाठी येथे क्लिक करा : Sam Altman: ‘मिसाइल बनवणे ते युद्धाचे निर्णय घेणे, AI घेणार जगाचा ताबा’; UN बैठकीत एआय कंपन्यांच्या प्रमुखांचा जगाला गंभीर इशारा

पाकिस्तानच्या ‘डॉन’ या नामांकित वृत्तपत्राने दिलेल्या माहितीनुसार, सरकार आणि लष्कराने पीटीआय नेत्यांना कडक इशारा दिला असून, त्यांनी इस्लामाबादमध्ये प्रवेश करण्याचा प्रयत्न केल्यास त्यांना “धडा शिकवला जाईल” अशी धमकी दिली आहे. दुसरीकडे, पाकिस्तानचे माहिती मंत्री अता तारार यांनी स्पष्ट केले आहे की, पीटीआय कार्यकर्त्यांना कोणत्याही परिस्थितीत राजधानीत पाऊल ठेवू दिले जाणार नाही. शहरात वैद्यकीय आणीबाणी घोषित करण्यात आली असून रुग्णालयांना सतर्क राहण्याचे आदेश देण्यात आले आहेत.

इम्रान खान तुरुंगात का आहेत? लष्कर विरुद्ध जनता संघर्ष तीव्र

ऑगस्ट २०२३ पासून इम्रान खान हे रावळपिंडीच्या अदियाला तुरुंगात कैद आहेत. २०२२ मध्ये लष्करी आणि राजकीय तख्तापलट झाल्यानंतर इम्रान खान यांनी पाकिस्तानी लष्कर आणि लष्करप्रमुख असिम मुनीर यांच्या राजकीय हस्तक्षेपाविरोधात उघडपणे रान उठवले होते. त्यानंतर त्यांच्यावर भ्रष्टाचाराचे अनेक खटले दाखल करण्यात आले आणि त्यांना तसेच त्यांच्या पत्नी बुशरा बीबी यांना तुरुंगात टाकण्यात आले.

जागतिक घडामोडी संबंधित बातम्या वाचण्यासाठी येथे क्लिक करा : NAZA Documentary : कोण जगेल कोण मरेल… हे ठरवतो इस्रायलचा हा छोटा संगणक; ‘नाझा’ माहितीपटाचा खळबळजनक खुलासा

सध्या इम्रान खान यांच्यावर कोर्टात केवळ एकच खटला प्रलंबित आहे, परंतु लष्कराच्या दबावामुळे न्यायालयीन प्रक्रियेला हेतुपुरस्सर विलंब केला जात असल्याचा आरोप इम्रान खान यांनी केला आहे. नुकतेच सर्वोच्च न्यायालयाने इम्रान खान यांना वैद्यकीय उपचारासाठी रुग्णालयात दाखल करण्याचे आदेश दिले होते, मात्र शाहबाज शरीफ सरकारने न्यायालयाचा हा निर्णयही फेटाळून लावला. ‘फायनान्शियल टाइम्स’च्या अहवालानुसार, इम्रान खान आजही पाकिस्तानात प्रचंड लोकप्रिय आहेत. जनता आसिम मुनीर यांच्या नेतृत्वाखालील लष्कराच्या कथित बेकायदेशीर आणि दडपशाही राजवटीला कंटाळली असून, हे आंदोलन त्यांच्यासाठी बदलाचे आणि आशेचे नवे किरण ठरत आहे. २७ सप्टेंबरचा हा संघर्ष पाकिस्तानच्या राजकीय भविष्याची दिशा ठरवणारा ठरेल.