Pakistan Ambulance Blast News Tharparkar Oxygen Cylinder Explosion
पाकिस्तानच्या (Pakistan News) सिंध प्रांतातील थरपारकर जिल्ह्यातून एक अत्यंत वेदनादायी आणि मन सुन्न करणारी घटना समोर आली आहे. नगरपारकर तालुक्यातील डानो धांधाल भागातील एका प्राथमिक आरोग्य केंद्राच्या आवारात उभ्या असलेल्या रुग्णवाहिकेत ऑक्सिजन सिलेंडरचा प्रचंड स्फोट झाला. या अपघातात एका गरोदर महिलेसह तब्बल नऊ जणांचा जागीच व उपचारादरम्यान करुण अंत झाला आहे. तर अनेक जण आगीच्या तीव्र झळांमुळे गंभीररीत्या भाजले आहेत. या भीषण घटनेमुळे संपूर्ण परिसरात तीव्र भीती आणि घबराटीचे वातावरण पसरले आहे.
प्राप्त माहितीनुसार, ही दुर्दैवी घटना ‘पीपल्स प्रायमरी हेल्थकेअर इनिशिएटिव्ह’ (PPHI) च्या अंतर्गत चालवल्या जाणाऱ्या आरोग्य केंद्राबाहेर घडली. रुग्णवाहिकेत एक गरोदर महिला गंभीर स्थितीत वैद्यकीय उपचाराची वाट पाहत होती. याच वेळी आरोग्य केंद्रातील कर्मचारी व तंत्रज्ञ रुग्णवाहिकेतील ऑक्सिजन सिलेंडर बदलण्याचे आणि नवीन सिलेंडर बसवण्याचे काम करत होते. दुर्दैवाने, हे काम सुरू असतानाच अचानक तंत्रज्ञानात बिघाड होऊन अथवा गॅस गळतीमुळे ऑक्सिजन सिलेंडरचा प्रचंड ताकदीचा स्फोट झाला आणि रुग्णवाहिकेने क्षणात रौद्ररुप धारण केले.
स्फोट इतका भयानक होता की त्याचा आवाज काही किलोमीटर अंतरापर्यंत ऐकू गेला. स्फोटाच्या धुमश्चक्रीनंतर रुग्णवाहिकेला क्षणार्धात भीषण आग लागली. वाहनाच्या आत उपस्थित असलेल्या गरोदर महिलेला आणि तिच्या नातेवाईकांना बाहेर पडण्याची साधी संधीही मिळाली नाही. आगीच्या प्रचंड लोटामध्ये होरपळून गरोदर महिला आणि तिच्यासोबत आलेल्या दोन जणांचा दुर्दैवी मृत्यू झाला. याशिवाय, रुग्णवाहिकेजवळ काम करत असलेले आरोग्य कर्मचारीही या आगीच्या भक्ष्यस्थानी पडले.
स्थानिक पोलीस अधिकारी आणि बचाव पथकाने दिलेल्या माहितीनुसार, मृतांमध्ये PPHI चे डिस्पेंसर, रुग्णवाहिकेचा चालक, एक सुरक्षा रक्षक आणि आरोग्य केंद्रातील आणखी एका कर्मचाऱ्याचा समावेश आहे. स्फोटानंतर आरोग्य केंद्राच्या परिसरात एकच पळापळ झाली. घटनास्थळी उपस्थित असलेल्या इतर रुग्ण आणि कर्मचाऱ्यांमध्ये प्रचंड भीतीचे वातावरण निर्माण झाले. स्थानिक नागरिकांनी आणि बचाव पथकाने तातडीने धाव घेऊन आग विझवण्याचा प्रयत्न केला, मात्र तोपर्यंत वाहनाचा आणि त्यातील प्रवाशांचा कोळसा झाला होता.
जागतिक घडामोडी संबंधित बातम्या वाचण्यासाठी येथे क्लिक करा : US Iran war : इराणचा अण्वस्त्र इशारा अन् अमेरिकेची मोठी लष्करी तयारी; होर्मुझच्या सामुद्रधुनीत महायुद्धाची ठिणगी?
या भीषण दुर्घटनेत प्राथमिक आरोग्य केंद्रातील दोन दाई (Midwives) आणि एक महिला परिचारिका देखील गंभीररीत्या भाजल्या आहेत. थरपारकरचे वरिष्ठ पोलीस अधीक्षक (SSP) आणि नगरपारकरच्या सहाय्यक आयुक्तांनी घटनास्थळी धाव घेऊन परिस्थितीचा आढावा घेतला. गंभीर जखमींना स्थानिक पातळीवर प्राथमिक वैद्यकीय मदत दिल्यानंतर तातडीने कराची येथील उच्चस्तरीय रुग्णालयात उपचारासाठी हलवण्यात आले आहे. कराचीला नेत असतानाच एका जखमीची वाटेतच प्राणज्योत मालवली, ज्यामुळे या अपघातातील एकूण मृत्यूंची संख्या नऊवर पोहोचली.
जिल्हा पोलीस प्रशासनाने या संपूर्ण घटनेच्या कसून चौकशीचे आदेश दिले आहेत. सिलेंडर बसवताना सुरक्षेच्या नियमांचे उल्लंघन झाले होते का, किंवा वापरण्यात आलेला ऑक्सिजन सिलेंडर कालबाह्य व सदोष होता का, या दिशेने फॉरेन्सिक तपास सुरू करण्यात आला आहे. निष्काळजीपणा सिद्ध झाल्यास दोषींवर कडक कारवाई केली जाईल, असे आश्वासन स्थानिक प्रशासनाकडून देण्यात आले आहे.
जागतिक घडामोडी संबंधित बातम्या वाचण्यासाठी येथे क्लिक करा : US Nuclear Lab : अमेरिकेच्या प्रमुख अणुप्रयोगशाळेत अचानक भीषण आग; आणीबाणी जाहीर, जाणून घ्या नक्की काय घडले?
सिंध प्रांतातील थरपारकर हा भाग प्रामुख्याने दुष्काळग्रस्त आणि अत्यंत मागासलेला प्रदेश मानला जातो. येथील स्थानिक जनता वैद्यकीय उपचारांसाठी पूर्णपणे सरकारी आरोग्य केंद्रे आणि PPHI सारख्या संस्थांच्या रुग्णवाहिकांवर अवलंबून असते. मूलभूत सोयी-सुविधांचा अभाव असलेल्या या भागात आरोग्य यंत्रणेचा निष्काळजीपणा नवीन नाही. याआधी ऑक्टोबर २०१९ मध्ये मिठी सिव्हिल हॉस्पिटलने इंधनाचा निधी उपलब्ध नसल्याचे कारण सांगत एका मृत बालकाचा मृतदेह वाहून नेण्यासाठी रुग्णवाहिका देण्यास नकार दिला होता, ज्यावरून आंतरराष्ट्रीय स्तरावर टीका झाली होती.
ताजी घटना ही पाकिस्तानमधील आरोग्य यंत्रणेच्या ढासळलेल्या अवस्थेची आणि सुरक्षा मानकांच्या अभावाची गंभीर साक्ष देते. जीवन वाचवणारी रुग्णवाहिकाच जेव्हा मृत्यूचा सापळा बनते, तेव्हा सामान्य जनतेने कोणावर विश्वास ठेवावा, असा संतप्त सवाल स्थानिक नागरिकांकडून विचारला जात आहे. या घटनेनंतर सिंध सरकारवर सुरक्षेचे कडक नियम लागू करण्यासाठी सर्वच स्तरातून मोठा दबाव निर्माण होत आहे.
Ans: आरोग्य केंद्राबाहेर उभ्या असलेल्या रुग्णवाहिकेत कर्मचारी ऑक्सिजन सिलेंडर बदलत असताना तांत्रिक बिघाडामुळे सिलेंडरचा भीषण स्फोट झाला.
Ans: या दुर्दैवी अपघातात एका गरोदर महिलेसह, तिच्या सोबतचे दोन नातेवाईक आणि ६ आरोग्य कर्मचाऱ्यांसह एकूण ९ जणांचा मृत्यू झाला आहे.
Ans: ही दुर्घटना पाकिस्तानच्या सिंध प्रांतातील थरपारकर जिल्ह्यातील नगरपारकर तालुक्यात डानो धांधाल येथील प्राथमिक आरोग्य केंद्राबाहेर घडली.
.png "Videos"){kind=small}
