Dietary Supplements USA Pew Research Supplements Survey 2026
आजच्या वेगवान आणि धकाधकीच्या जीवनशैलीत आरोग्याची काळजी घेणे हे प्रत्येकासाठीच एक मोठे आव्हान बनले आहे. चांगला आहार, नियमित व्यायाम आणि पुरेशी झोप या मूलभूत गरजांसोबतच आता ‘डाएट सप्लिमेंट्स’ (Dietary Supplements) दैनंदिन जीवनाचा अविभाज्य भाग बनत चालल्याचे चित्र समोर आले आहे. अमेरिकेतील बदलत्या आरोग्यदायी सवयींवर ‘प्यू रिसर्च सेंटर’ (Pew Research Center) या संस्थेने जुलै २०२६ मध्ये एक व्यापक सर्वेक्षण केले. या अहवालानुसार, अमेरिकेतील तब्बल ७८ टक्के प्रौढ नागरिक त्यांच्या आरोग्याची काळजी घेण्यासाठी कोणत्या ना कोणत्या स्वरूपाचे सप्लिमेंट घेत आहेत.
अमेरिकन लोकांच्या आरोग्याच्या चार्टमध्ये आता केवळ रोजचे जेवणच नाही, तर विविध गोळ्या, प्रोटीन पावडर आणि ओमेगा तेलांच्या कॅप्सुलने आपले पक्के स्थान निर्माण केले आहे. या सर्वेक्षणातील सर्वात मनोरंजक बाब म्हणजे सप्लिमेंट्स घेणाऱ्या लोकांपैकी बहुतेकांना असे वाटते की, हे पदार्थ त्यांच्या आरोग्यासाठी अत्यंत महत्त्वाचे आहेत. जीवनसत्त्वे किंवा खनिजे घेणाऱ्यांपैकी ६२ टक्के लोकांनी आणि ओमेगा ऑइल घेणाऱ्यांपैकी ६३ टक्के लोकांनी हे सप्लिमेंट्स आपल्या रोजच्या जीवनासाठी ‘अत्यंत आवश्यक’ असल्याचे स्पष्ट केले आहे.
प्यू रिसर्च सेंटरच्या या सर्वेक्षणातून सामाजिक आणि आर्थिक स्तरावर सप्लिमेंट वापरातील मोठे फरक समोर आले आहेत. पुरुषांच्या तुलनेत महिला सप्लिमेंट्सच्या वापरात अधिक पुढे असल्याचे दिसते. सुमारे ८२ टक्के अमेरिकन महिला कोणत्या ना कोणत्या प्रकारचे सप्लिमेंट वापरतात, तर पुरुषांमध्ये हे प्रमाण ७४ टक्के आहे. जीवनसत्त्वे, खनिजे आणि हर्बल सप्लिमेंट्स खरेदी करण्यावर महिला पुरुषांपेक्षा जास्त पैसे खर्च करतात.
जागतिक घडामोडी संबंधित बातम्या वाचण्यासाठी येथे क्लिक करा : India-Bangladesh Ties : शेख हसीनांचा काळ ‘अस्वस्थ करणारा’; बांगलादेशची भारतासोबत ‘रिसेट’ची मागणी, 101 करार होणार रद्द?
तसेच, कुटुंबाचे उत्पन्न आणि सप्लिमेंटचा वापर या दोन्ही गोष्टींचा थेट संबंध असल्याचे उघड झाले आहे. उच्च-उत्पन्न गटातील तब्बल ८५ टक्के कुटुंबांमध्ये नियमित सप्लिमेंट्स घेतले जातात. मध्यम-उत्पन्न कुटुंबांमध्ये हे प्रमाण ७८ टक्के, तर कमी-उत्पन्न असलेल्या कुटुंबांमध्ये ७४ टक्के आहे. प्रोटीन सप्लिमेंट्सच्या बाबतीत हा फरक आणखी उठून दिसतो; उच्च-उत्पन्न गटातील ४० टक्के लोक प्रोटीन पावडर घेतात, तर कमी-उत्पन्न गटात हे प्रमाण केवळ २८ टक्के आहे.
वयोगटानुसार पाहिल्यास १८ ते २९ या युवा वयोगटातील ३७ टक्के तरुण प्रोटीन सप्लिमेंट्सचा नियमित वापर करतात. ६५ वर्षांवरील ज्येष्ठांमध्ये हे प्रमाण केवळ २३ टक्के आहे. तरुण वर्ग जिम आणि फिटनेसवर भर देत असल्याने प्रोटीन सप्लिमेंट्सला त्यांची पहिली पसंती मिळताना दिसते.
वांशिक घटकांचा विचार केला तर, ओमेगा-३ आणि फिश ऑइल सप्लिमेंट्स घेण्याच्या बाबतीत आशियाई अमेरिकन (Asian Americans) सर्वात पुढे आहेत. सुमारे ४० टक्के आशियाई अमेरिकन नागरिक ओमेगा तेलाच्या कॅप्सुल घेतात. याउलट, कृष्णवर्णीय, श्वेतवर्णीय आणि हिस्पॅनिक अमेरिकन लोकांमध्ये हे प्रमाण सुमारे २५ टक्के इतकेच मर्यादित आहे.
जागतिक घडामोडी संबंधित बातम्या वाचण्यासाठी येथे क्लिक करा : Dario Amodei: AIची आंधळी शर्यत थांबवा! अँथ्रोपिकचे सीईओ डारिओ अमोदेई यांचा इशारा; मानवी सुरक्षिततेसाठी ‘स्पीड ब्रेक’ आवश्यक
सप्लिमेंट्सचा वापर जगभरात वेगाने वाढतो आहे, परंतु वैद्यकीय तज्ञांच्या मते प्रत्येक व्यक्तीला सप्लिमेंटची गरज असतेच असे नाही. सप्लिमेंट्स हे नैसर्गिक आहाराला पर्याय ठरू शकत नाहीत. मानवी शरीराला आवश्यक असणारी प्रथिने, जीवनसत्त्वे आणि खनिजे ही अंडी, दूध, दही, डाळी, मोड आलेली कडधान्ये, सोयाबीन आणि मासे यांसारख्या नैसर्गिक अन्नपदार्थांमधून सहज मिळू शकतात.
आपल्याला खरंच प्रोटीन पावडर किंवा व्हिटॅमिनच्या गोळ्यांची गरज आहे का, हे जाणून घेण्यासाठी आधी रोजच्या आहाराचे योग्य मूल्यांकन करणे आवश्यक आहे. शरीरात विशिष्ट जीवनसत्त्वाची कमतरता असेल तरच डॉक्टरांच्या सल्ल्याने सप्लिमेंट घेणे योग्य ठरते. उत्तम आरोग्यासाठी कोणताही शॉर्टकट नसून संतुलित आहार, रोजचा व्यायाम आणि पुरेशी झोप हीच आरोग्याची खरी गुरुकिल्ली आहे.
.png "Videos"){kind=small}
