Yemen Conflict : मध्यपूर्वेत युद्धाची चाहूल! हुथींवर मोठ्या लष्करी कारवाईची तयारी; सौदीची 1 लाख सैनिकांसह आक्रमक रणनीती

Yemen Conflict : होर्मुझ आणि बाब-अल-मंदेब संकटाच्या पार्श्वभूमीवर, सौदी अरेबियाने १,००,००० येमेनी सैनिक आणि हवाई हल्ल्यांच्या साहाय्याने हुथींविरुद्ध मोठ्या लष्करी कारवाईची तयारी सुरू केली आहे.

• लष्करी कारवाईची मोठी योजना
• पाकिस्तानाची ४०,००० सैनिकांची तैनाती
• अमेरिकेचे गुप्तचर व हवाई संरक्षण साहाय्य

पश्चिम आशियातील भू-राजकीय तणाव अत्यंत धोकादायक वळणावर पोहोचला आहे. इराण युद्धामुळे होर्मुझची सामुद्रधुनी बंद झाल्यानंतर आणि येमेनमधील हुथी बंडखोरांनी रेड सी (तांबडा समुद्र) जोडणाऱ्या बाब अल-मंदेब सामुद्रधुनीवर ताबा मिळवल्यानंतर जागतिक तेल पुरवठा आणि सागरी व्यापारापुढील संकट प्रचंड गडद झाले आहे. या सागरी नाकेबंदीमुळे आंतरराष्ट्रीय स्तरावर इंधनाचे दर आणि मालवाहतुकीचा खर्च अनियंत्रितपणे वाढत आहे. हे आंतरराष्ट्रीय संकट मोडून काढण्यासाठी सौदी अरेबियाने हुथींविरुद्ध व्यापक आणि निर्णायक लष्करी कारवाई करण्याची आखणी केली आहे. (Yemen Conflict )

रॉयटर्सच्या विशेष अहवालानुसार, रियाध (सौदी अरेबिया) यावेळी स्वतःचे सैन्य थेट जमिनीवरील लढाईत उतरवण्याऐवजी सौदी-समर्थित १,००,००० हून अधिक येमेनी सैनिकांना आघाडीवर ठेवणार आहे. या जमिनीवरील मोहिमेला सौदी हवाई दलाकडून प्रचंड हवाई हल्ल्यांचे (Airstrikes) आणि रसद पुरवठ्याचे मजबूत कवच दिले जाईल. येत्या काही आठवड्यांत किनारपट्टीच्या मोक्याच्या जागांवर, तसेच अल-बायदा, मारिब, तैझ आणि अल-जॉफ यांसारख्या मुख्य आघाड्यांवर हे चौफेर आक्रमण सुरू होण्याची शक्यता वर्तवली जात आहे.

बाब अल-मंदेब आणि होर्मुझ सामुद्रधुनीचे सामरिक महत्त्व

जागतिक व्यापाराच्या दृष्टीने तांबड्या समुद्राचे दक्षिणेकडील प्रवेशद्वार मानले जाणारे ‘बाब अल-मंदेब’ हे आशिया आणि युरोपदरम्यानच्या सागरी वाहतुकीचे मुख्य केंद्र आहे. इराणमधील युद्धामुळे होर्मुझची सामुद्रधुनी विस्कळीत झाल्यानंतर या मार्गाचे महत्त्व कैक पटीने वाढले आहे. सौदी अरेबियाच्या विश्लेषकांच्या मते, जर हुथींनी बाब अल-मंदेबवर आपले नियंत्रण कायम ठेवले, तर ते आंतरराष्ट्रीय समुदायावर दबाव टाकण्यासाठी याचा गैरवापर करतील. त्यामुळे भविष्यात हुथींसोबत कोणत्याही शांतता वाटाघाटी करणे अशक्य होईल. म्हणूनच या सागरी मार्गावरून हुथींची पकड सैल करणे ही सौदी आणि आंतरराष्ट्रीय मित्रांची प्राथमिक गरज बनली आहे.

जागतिक घडामोडी संबंधित बातम्या वाचण्यासाठी येथे क्लिक करा : US Visa Policy 2026 : अमेरिकेचा व्हिसा हवाय? तर सोशल मीडिया प्रोफाइल ठेवावे लागणार ‘पब्लिक’; ट्रम्प प्रशासनाचा नवा आदेश

पाकिस्तानची सौदीत ४०,००० सैनिकांची मोठी तैनाती

या संपूर्ण लष्करी रणनीतीमध्ये पाकिस्तानची भूमिका अत्यंत महत्त्वाची आणि धक्कादायक मानली जात आहे. सौदी अरेबिया, पाकिस्तान आणि तुर्की यांच्यात झालेल्या संयुक्त संरक्षण करारांतर्गत पाकिस्तानने सौदी अरेबियात तब्बल ३०,००० ते ४०,००० सैनिकांची तुकडी तैनात केली आहे. या पाकिस्तानी सैनिकांवर सौदी अरेबियाच्या सीमांचे रक्षण करणे, तसेच हुथींकडून होणाऱ्या संभाव्य ड्रोन आणि क्षेपणास्त्र हल्ल्यांपासून सौदीच्या तेल पायाभूत सुविधांना (Oil Infrastructure) सुरक्षा पुरवण्याची जबाबदारी सोपवण्यात आली आहे.

याशिवाय, पाकिस्तानने गेल्या महिन्यात येमेनमधील एडन येथे हवाई संरक्षण प्रणाली, तोफखाना, ड्रोन आणि ड्रोनविरोधी यंत्रणांनी भरलेली चार मालवाहू विमाने पाठवली आहेत. पाकिस्तानचे लष्करप्रमुख जनर असिम मुनीर यांच्या नेतृत्वाखाली ही लष्करी भागीदारी अधिक मजबूत झाली असल्याचे मानले जात आहे.

जागतिक घडामोडी संबंधित बातम्या वाचण्यासाठी येथे क्लिक करा : Flydubai Flight 1073 : ‘मला जिवंत सोडू नका!’ प्रवाशांनी पकडल्यानंतर ओमानच्या वैमानिकाची मृत्यूची याचना

अमेरिकेचे गुप्तचर साहाय्य आणि सौदीसमोरील आव्हाने

अमेरिकेनेही या मोहिमेत सौदी अरेबियाला पाठिंबा दिला आहे. अमेरिकन प्रशासनाने सौदी आणि कतारच्या सुरक्षेसाठी पॅट्रियट हवाई संरक्षण यंत्रणा तैनात केली असून उपग्रहांद्वारे मिळणारी गुप्त माहिती आणि हुथींच्या तळांची अचूक माहिती सौदी सैन्याला पुरवली जात आहे. मात्र, या मोहिमेची नेमकी वेळ आणि अमेरिकेच्या थेट सहभागाबाबत वॉशिंग्टनमध्ये अजूनही धोरणात्मक चर्चा सुरू आहे.

तरीही सौदी अरेबियासमोर मोठी आव्हाने उभी आहेत. येमेनमध्ये हुथींविरोधात लढणारे स्थानिक गट आपापसात विभागलेले आहेत. संयुक्त अरब अमिराती (UAE) समर्थित गट आणि सौदी-समर्थित गट यांच्यातील अंतर्गत मतभेदामुळे मोहिमेत अडचणी येण्याची शक्यता आहे. तसेच हुथी बंडखोर डोंगराळ भागात गनिमी काव्याने (Guerrilla Warfare) लढण्यात पटाईत असल्याने ही लढाई दीर्घ आणि आव्हानात्मक ठरू शकते.