ट्रम्प प्रशासनाचा आणखी एक वादग्रस्त निर्णय; ‘या’ कृतीमुळे हजारो अफगाणींचे भविष्य संकटात

अमेरिकेचे राष्ट्राध्यक्ष डोनाल्ड ट्रम्प यांनी अफगाण पुनर्वसन कार्यालय बंद करण्याचे निर्देश दिले, त्यामुळे सुमारे 2 लाख अफगाणांचे पुनर्वसन अर्ज अडचणीत येणार आहेत. 9/11 सारख्या धमक्यांच्या भीतीने हे पाऊल उचलण्यात आले आहे.

वॉशिंग्टन : अमेरिकेचे राष्ट्राध्यक्ष डोनाल्ड ट्रम्प यांनी अफगाण नागरिकांच्या पुनर्वसनावर मोठा आघात केला असून, अमेरिकेतील अफगाण पुनर्वसन कार्यालय बंद करण्याचे निर्देश दिले आहेत. या निर्णयामुळे सुमारे दोन लाख अफगाणांचे पुनर्वसन अर्ज अडचणीत येणार आहेत. अमेरिकेतील गुप्तचर अहवालांनुसार, 9/11 सारख्या संभाव्य धोका लक्षात घेऊन हे पाऊल उचलण्यात आले आहे. यापूर्वीच अफगाणिस्तानला दिली जाणारी आर्थिक मदत थांबविण्यात आली होती, त्यामुळे हा निर्णय अफगाण नागरिकांसाठी आणखी एक मोठा धक्का आहे.

एप्रिलपर्यंत कार्यालय होणार बंद

अमेरिकेच्या व्हाईट हाऊस आणि परराष्ट्र विभागाला एप्रिल 2025 पर्यंत अफगाण पुनर्वसन कार्यालय बंद करण्याचा संपूर्ण आराखडा सादर करावा लागणार आहे. याचा अर्थ, यावर्षी एप्रिलपर्यंत हे कार्यालय पूर्णपणे बंद होईल. या निर्णयाचा सर्वाधिक फटका त्यांना बसेल, ज्यांनी अफगाणिस्तानातील 20 वर्षांच्या युद्धात अमेरिकन सैन्याला सहकार्य केले होते. अमेरिकेत स्थायिक होण्यासाठी आणि संरक्षण मिळवण्यासाठी त्यांनी मोठ्या प्रमाणावर अर्ज केले होते, मात्र आता त्यांच्या अर्जांवर कोणतीही सकारात्मक कार्यवाही होणार नाही.

जागतिक घडामोडी संबंधित बातम्या वाचण्यासाठी येथे क्लिक करा : ‘त्यांना गुन्हेगाराप्रमाणे बेड्या ठोकण्यात आल्या…’ व्हाईट हाऊसने शेअर केला ‘हा’ हृदयद्रावक व्हिडिओ

अफगाण नागरिकांवर मोठे परिणाम

या कार्यालयाच्या बंदीनंतर अमेरिकेत असलेल्या अफगाण नागरिकांना अमेरिकन नागरिकत्व मिळू शकणार नाही तसेच त्यांचे पुनर्वसनही होऊ शकणार नाही. अमेरिकन अहवालांनुसार, सध्या अमेरिकेत सुमारे दोन लाख अफगाण नागरिक पुनर्वसनाच्या प्रतीक्षेत आहेत. यामध्ये अफगाण-अमेरिकन लष्करी कर्मचाऱ्यांचे कुटुंबीय, त्यांच्या पालकांशी पुनर्भेटीच्या प्रतीक्षेत असलेले सदस्य आणि अन्य अनेक नागरिकांचा समावेश आहे.

हे सर्व नागरिक अमेरिकेच्या मदतीच्या आशेवर होते, कारण अफगाणिस्तानातील युद्धात त्यांनी अमेरिकन सैन्यासोबत काम केले होते. मात्र आता ट्रम्प प्रशासनाने घेतलेल्या कठोर निर्णयामुळे त्यांचे स्वप्न धुळीस मिळण्याची शक्यता आहे.

सुरक्षा कारणांचा दाखला

ट्रम्प प्रशासनाच्या या निर्णयामागे सुरक्षा कारणे देण्यात आली आहेत. अमेरिकेच्या एका माजी गुप्तचर अधिकाऱ्याने 9/11 सारख्या संभाव्य धोका निर्माण होऊ शकतो, असे स्पष्ट केले आहे. त्यामुळे अफगाण नागरिकांना अमेरिकेत प्रवेश देणे धोकादायक ठरू शकते, असा प्रशासनाचा दावा आहे.

अफगाणिस्तानच्या अर्थव्यवस्थेवर परिणाम

अमेरिकेने यापूर्वी अफगाणिस्तानला दिली जाणारी आर्थिक मदतही बंद केली होती. पुढील तीन महिन्यांसाठी कोणतीही आर्थिक मदत दिली जाणार नाही, असा निर्णय घेण्यात आला होता. यामुळे आधीच आर्थिक संकटाचा सामना करत असलेल्या अफगाणिस्तानची परिस्थिती आणखी बिकट झाली आहे.

राजकीय आणि मानवी हक्क संघटनांची टीका

या निर्णयावर अमेरिकेतील मानवी हक्क संघटना आणि राजकीय विश्लेषकांनी तीव्र नाराजी व्यक्त केली आहे. अफगाण नागरिकांना अमेरिका त्यांच्या गरजेपुरतेच उपयोगात आणत असल्याचा आरोप करण्यात येत आहे. “अमेरिकेने गरज पडली तेव्हा हात जोडले, मात्र आता काम संपल्यावर अफगाणांना वाऱ्यावर सोडले जात आहे,” अशी टीका राजकीय विश्लेषकांनी केली आहे.

अफगाण समुदायाची चिंता वाढली

अमेरिकेत राहणाऱ्या अफगाण समुदायासाठी हा निर्णय धक्कादायक असून त्यांचे भवितव्य अंधारात गेले आहे. अनेक अफगाण नागरिकांनी या निर्णयाविरोधात आवाज उठवण्याची तयारी केली आहे. काही मानवी हक्क संघटनांनी हा निर्णय मागे घेण्यासाठी न्यायालयात धाव घेण्याची शक्यता व्यक्त केली आहे.

जागतिक घडामोडी संबंधित बातम्या वाचण्यासाठी येथे क्लिक करा : काय आहे ‘वदीमा कायदा’ आणि UP च्या ‘शहजादी’ला दुबईत का झाली फाशीची शिक्षा? जाणून घ्या

भविष्यातील परिणाम

ट्रम्प प्रशासनाच्या या निर्णयामुळे अफगाण नागरिकांचे अमेरिकेत पुनर्वसन होण्याची संधी जवळजवळ संपली आहे. तसेच, आंतरराष्ट्रीय स्तरावर या निर्णयाची गंभीर दखल घेतली जाण्याची शक्यता आहे. अफगाणिस्तानातील परिस्थिती आधीच अत्यंत गंभीर असून, अमेरिकेच्या या निर्णयामुळे हजारो अफगाण कुटुंबांना सुरक्षिततेचा मोठा प्रश्न निर्माण झाला आहे. हा निर्णय अमेरिका आणि अफगाणिस्तान यांच्यातील संबंधांवर दीर्घकालीन परिणाम करू शकतो. ट्रम्प प्रशासनाच्या कठोर धोरणामुळे अफगाण नागरिकांवर भीषण संकट कोसळले असून, त्यांच्या सुरक्षिततेसाठी कोणता पर्याय उपलब्ध होईल, याकडे आता संपूर्ण जगाचे लक्ष लागले आहे.