होर्मुजच्या नाकेबंदीवर ट्रम्प यांचा इराणला सर्वात मोठा इशारा (Photo Credit- X)
डोनाल्ड ट्रम्प यांनी त्यांच्या ‘ट्रुथ सोशल’ या प्लॅटफॉर्मवर इराणला दिलेल्या इशाऱ्यात म्हटले आहे की, “इराणची नौदलाची ताकद आता समुद्राच्या तळाशी असून ती पूर्णपणे नष्ट झाली आहे. आम्ही त्यांचे 158 हून अधिक जहाजे आधीच निकामी केली आहेत.” ड्रग तस्करांविरुद्ध ज्या वेगाने आणि कठोरपणे कारवाई केली जाते, त्याच पद्धतीने इराणी जहाजांना रोखले जाईल, असेही त्यांनी स्पष्ट केले.
एकीकडे ट्रम्प आक्रमक पवित्रा घेत असताना, अमेरिकेच्या सर्वात जवळच्या मित्रराष्ट्रांनी मात्र या लष्करी कारवाईतून स्वतःला वेगळे केले आहे.ब्रिटन, फ्रान्स, जपान, नेदरलँड्स, इटली, जर्मनी आणि कॅनडा या देशांनी एक संयुक्त निवेदन जारी करून अमेरिकेच्या या नाकेबंदीत सहभागी होण्यास नकार दिला आहे. विशेषतः ब्रिटनचे पंतप्रधान कीर स्टार्मर आणि ट्रम्प यांच्यातील संबंध कमालीचे ताणले गेले आहेत. ब्रिटनने स्पष्ट केले आहे की, ते जागतिक सागरी मार्गांच्या स्वातंत्र्याचे पुरस्कर्ते आहेत, ते मार्ग बंद करण्याच्या बाजूने नाहीत.
अमेरिकेच्या या आव्हानाला इराणनेही जशास तसे उत्तर दिले आहे. इराणच्या सशस्त्र दलाच्या केंद्रीय मुख्यालयाने जाहीर केले की, इराणच्या बंदरांवर कोणताही हल्ला झाल्यास त्याचे परिणाम गंभीर असतील. “पर्शियन खाडी आणि ओमानच्या समुद्रात सुरक्षा ही एकतर सर्वांसाठी असेल किंवा कोणासाठीच नसेल,” असे इराणने म्हटले आहे. जर इराणची कोंडी करण्याचा प्रयत्न झाला, तर या संपूर्ण क्षेत्रातील इतर देशांची बंदरेही सुरक्षित राहणार नाहीत, असा थेट इशारा इराणने दिला आहे.
तुर्कीचे परराष्ट्र मंत्री हाकान फिदान यांनी या संघर्षावर प्रतिक्रिया देताना कूटनीतीचा मार्ग अवलंबण्याचे आवाहन केले आहे. होर्मुजची सामुद्रधुनी ही जागतिक व्यापारासाठी महत्त्वाची असून, ती लष्करी बळाने बंद करणे जागतिक अर्थव्यवस्थेसाठी घातक ठरू शकते. अनेक देशांनी या लष्करी नाकेबंदीपासून अंतर राखत शांततेच्या मार्गावर भर दिला आहे.
.png "Videos"){kind=small}
