Israel Iran War : ‘इराणला कधीही अण्वस्त्रे बनवण्याची परवानगी दिली जाऊ शकत नाही’, असे का म्हणाले ब्रिटिश पंतप्रधान?

ब्रिटनचा अमेरिकेच्या कारवाईला पाठिंबा, पण वाटाघाटींवर भर

ब्रिटिश पंतप्रधानांनी ट्विटर (X) वर पोस्ट करत म्हटले, “इराणचा अणुकार्यक्रम हा आंतरराष्ट्रीय स्थैर्याला धोका ठरतो. त्यामुळे अमेरिकेने जो हल्ला केला तो सुरक्षा वाढवण्यासाठीचा उपाय आहे. मात्र, या अस्थिर परिस्थितीत शांततापूर्ण राजनैतिक तोडगा काढणे अत्यंत आवश्यक आहे. इराणने वाटाघाटीच्या टेबलावर परत यावे, हेच आम्ही इच्छितो.”

जागतिक घडामोडी संबंधित बातम्या वाचण्यासाठी येथे क्लिक करा : Trump Iran strikes : ‘परिस्थिती नियंत्रणाबाहेर’, संयुक्त राष्ट्रांत तणावाचे वातावरण, अँटोनियो गुटेरेस यांनी केले ‘विशेष आवाहन’

इस्रायलने हवाई क्षेत्र पुन्हा उघडले

इराणकडून संभाव्य हल्ल्याच्या पार्श्वभूमीवर इस्रायलने काही काळासाठी आपले हवाई क्षेत्र बंद केले होते, मात्र आता परिस्थिती काहीशी निवळल्याने इस्रायल आज दुपारी २ वाजल्यापासून हवाई उड्डाणांसाठी पुन्हा परवानगी देणार आहे.

इराकची प्रतिक्रिया – हल्ला म्हणजे प्रादेशिक अस्थिरतेला चालना

इराणवर करण्यात आलेल्या अमेरिकन हल्ल्यावर इराकनेही तीव्र प्रतिक्रिया दिली आहे. इराक सरकारच्या म्हणण्यानुसार, “अमेरिकेची ही कृती संपूर्ण प्रादेशिक शांततेसाठी गंभीर धोका आहे. हे युद्ध न भडकवता राजनैतिक मार्गाने मार्ग काढला गेला असता तर तो अधिक योग्य ठरला असता.”

फारुख अब्दुल्लांची भावना – इराणला करबला आठवतो

भारतामध्येही या घटनेची प्रतिक्रिया उमटत आहे. नॅशनल कॉन्फरन्सचे नेते फारुख अब्दुल्ला यांनी इराणच्या प्रतिकाराची तुलना थेट करबला युद्धाशी केली. ते म्हणाले, “इराणला करबला आठवतो. त्यांना जिवाचे नुकसान होईल, पण ते कधीही डोके झुकवणार नाहीत. ते प्रतिकार करतील आणि हार मानणार नाहीत.”

इराणचा अमेरिका आणि इस्रायलवर थेट आरोप

या घटनेनंतर इराणच्या परराष्ट्र मंत्रालयाने तीव्र निवेदन जारी करत अमेरिका आणि इस्रायलवर थेट आरोप केला आहे. मंत्रालयाच्या म्हणण्यानुसार, “अमेरिकेने या हल्ल्यांद्वारे राजनैतिकतेवर विश्वासघात केला आहे. इस्रायलसारख्या नरसंहारी राजवटीला पाठिंबा देत अमेरिकेने थेट युद्ध सुरू केलं आहे.” इराणने स्पष्ट इशारा दिला आहे की, जर आंतरराष्ट्रीय समुदायाने हस्तक्षेप करून या युद्धाला रोखलं नाही, तर प्रचंड विनाशकारक परिणाम भोगावे लागतील.

जागतिक घडामोडी संबंधित बातम्या वाचण्यासाठी येथे क्लिक करा : Trump Iran strikes : गुप्तचर यंत्रणेत झाली मोठी चूक? अमेरिकेने जिथे बॉम्ब टाकला होता तिथून इराणने आधीच…

अण्वस्त्र संकट नव्या टप्प्यावर

अमेरिकेच्या हवाई हल्ल्यामुळे इराण-इस्रायल संघर्ष अधिक तीव्र झाला आहे, आणि यात आता युरोपियन राष्ट्रांचा राजनैतिक सहभागही वाढत चालला आहे. ब्रिटनच्या समर्थनासोबतच इराणने जे आरोप लावले आहेत, त्यामुळे ही लढाई केवळ शस्त्रांची नाही, तर आंतरराष्ट्रीय कूटनीतीची सुद्धा झालेली आहे. पुढील काही दिवसांत या संघर्षाचे स्वरूप आणखी गंभीर होण्याची शक्यता आहे.