रविवार, 8 नोव्हेंबर 2026
फोटो सौजन्य AI
सततचा हिंसाचार आणि देशातील अस्थिर वातावरण यामुळे येमेनमधील ३ लाखांहून जास्तच लोकांना आपली घरे सोडून सुरक्षित ठिकाणी आश्रय घ्यावा लागला आहे . राहती घरे , जमेल तेवढं सामना घेऊन ही माणसे दारोदार भटकत आहेत . या सगळ्यांमध्ये सुमारे १ लाख ६५ हजार मुलांचा समावेश आहे .
संयुक्त राष्ट्रांच्या बालकांसाठी काम करणाऱ्या संस्थेने ( UNICEF ) या परिस्थितीबाबत गंभीर चिंता व्यक्त केली आहे . विस्थापनामुळे मुलांची सुरक्षा आणि भविष्यातील संधी , चांगले आयुष्य हे पूर्णपणे धोक्यात आल्याचे या संस्थेने म्हंटले आहे.
येमेनमधील सरकारी सैन्य आणि हुथी बंडखोर यांच्यातील संघर्षामुळे अनेक भागांमध्ये परिस्थिती गंभीर बनली आहे . खासकरून पश्चिम येमेनमधील भागांमध्ये हिंसाचार वाढल्याने नागरिकांना सुरक्षित ठिकाणांच्या शोधात स्थलांतर करावे लागत आहे . अनेक कुटुंबाना घरातील आवश्यक वस्तू घेण्याचीही संधी मिळत नसल्याने त्यांना अत्यंत कठीण परिस्थितीत विस्थापित व्हावे लागत आहे . तैझ परिसरात विस्थापित नागरिकांची संख्या मोठ्या प्रमाणात वाढली असून निवारा आणि मूलभूत सुविधांचा प्रश्न गंभीर झाला आहे .
Sweden News : होलोकॉस्ट नाकारणे आता ठरणार गुन्हा; स्वीडनच्या संसदेत घटनादुरुस्ती मंजूर
या संघर्षात मुलांचे बालपण हिरावले जात असल्याची चिंता व्यक्त होत आहे . विस्थापित झालेल्या मुलांना शाळा सोडावी लागत असून अनेकांना शिक्षणापासून वंचित राहावे लागत आहे . राहण्यासाठी सुरक्षित जागा , पुरेसे अन्न , स्वछ पाणी आणि आरोग्यसेवा मिळवणे ही कठीण झाले आहे . हिंसाचाराच्या वातावरणात मुलांचे शोषण , कुपोषण आणि इतर धोक्यांची शक्यता वाढत आहे . युनिसेफने मुलांच्या संरक्षणासाठी तातडीने मदत आणि सुरक्षित वातावरण उपलब्ध करून देण्याचे आवाहन केले आहे .
युनिसेफचे प्रादेशिक प्रवक्ते सलीम ओवेस यांनी या परिस्थितीबाबत चिंता व्यक्त केली आहे . त्यांच्या माहितीनुसार ३ लाखांहून अधिक नागरिक विस्थापित झाले असून त्यामध्ये सुमारे १ लाख ६५ हजार मुलांचा समावेश आहे .मुलांचे संरक्षण , शिक्षण आणि आरोग्य यांना प्राधान्य देण्याची गरज त्यांनी अधोरेखित केली .
दरम्यान , संयुक्त राष्ट्रांच्या मदत यंत्रणा विस्थापित कुटुंबांपर्यंत पाणी , अन्न , आरोग्यसेवा आणि बालसंरक्षण सुविधा पोहोचवण्याचा प्रयत्न करत आहेत . मात्र वाढता संघर्ष आणि मदतीतील अडथळे यामुळे परस्थिती अजूनच बिकट होण्याची भीती व्यक्त केली जात आहे .
