भारतीय दुचाकी बाजारात ग्राहकांची वाढती मागणी लक्षात घेता बजाज ऑटोने येणाऱ्या सणासुदीच्या काळात मोठी तयारी केली आहे. कंपनी येत्या काही महिन्यांत ३ नवीन प्रोडक्ट्स आणि २ नवीन ब्रँड्स मार्केटमध्ये आणण्याच्या तयारीत आहेत. जुन्या ग्राहकांना आकर्षित करण्यासोबतच नवीन ग्राहकांना जोडणे हा यामागचा मुख्य उद्देश आहे.
पल्सर १५० आणि पल्सर १२५ चे नवे व्हर्जन लाँच
कंपनीने नुकतेच आपले सर्वात लोकप्रिय मॉडेल असणाऱ्या पल्सर १२५ आणि पल्सर १५० चे अपडेटेड व्हर्जन लाँच केले आहे. पल्सर १२५ ची सुरवातीची किंमत ₹९२,९०० (एक्स-शोरूम दिल्ली) तर पल्सर १५० ची किंमत ₹१.१५ लाख (एक्स-शोरूम दिल्ली) ठेवण्यात आली आहे. या नव्या मॉडेल्समध्ये आधुनिक तंत्रज्ञान आणि आकर्षक फीचर्स देण्यात आले आहेत, ज्यामुळे आयकॉनिक पल्सर लुक कायम ठेवत बाईकला एक नवीन फील मिळतो.
४५ दिवसांत ३ नवीन प्रोडक्ट्स बाजारात येणार
बजाज ऑटोचे व्यवस्थापकीय संचालक राकेश शर्मा यांनी सांगितले की, येत्या ४५ दिवसांत कंपनी ३ नवीन उत्पादने बाजारात आणणार असून लवकरच २ नवीन ब्रँड्स देखील लाँच केले जातील. पल्सर १२५ आणि १५० सीसी सेगमेंटमध्ये गेल्या काही काळापासून मोठे अपडेट्स न आल्यामुळे विक्रीत काहीशी संथ गती पाहायला मिळाली होती, मात्र या नवीन अपग्रेडमुळे ही विक्री पुन्हा वेग घेईल असा विश्वास त्यांनी व्यक्त केला आहे.
जुलै महिन्यातील भक्कम विक्रीची आकडेवारी
कंपनीने जुलै महिन्यात विक्रीत तब्बल ३०% वाढ नोंदवली असून एकूण ४,७४,६७७ वाहनांची विक्री केली आहे, जी गेल्या वर्षी याच काळात ३,६६,००० होती. यामध्ये दुचाकींची देशांतर्गत विक्री १९% वाढून १,६५,७४७ युनिट्सवर पोहोचली आहे. १२० सीसी ते १५० सीसी सेगमेंटमधील तात्पुरती घसरण भरून काढण्यासाठी कंपनीचे नवे लाँचिंग अत्यंत महत्त्वाचे ठरणार आहे.
इंडस्ट्री मधील वाढ आणि सणासुदीचा अंदाज
बजाज ऑटोच्या टू-व्हीलर बिझनेसचे प्रमुख सारंग कानडे यांच्या मते, सध्या संपूर्ण दुचाकी उद्योग सुमारे १२% च्या दराने वाढतो आहे. यामध्ये मोटारसायकल सेगमेंट सुमारे १०% तर इलेक्ट्रिक वाहने तब्बल ८०% च्या प्रचंड वेगाने वाढताना दिसत आहेत. १२५ सीसी सेगमेंटचा बाजारपेठेतील वाटा ३ वर्षांतील २५% वरून वाढून २८% झाला आहे, ज्यामुळे आगामी सणासुदीच्या काळात दुचाकींची विक्री विक्रमी पातळी गाठेल असा विश्वास व्यक्त केला जात आहे.
.png "Videos"){kind=small}
