Honda ची पहिलीवहिली EV मार्केटमध्ये धुमाकूळ घालणार, भारतात सुरु झाली टेस्टिंग

एकीकडे सगळ्या कार उत्पादक कंपन्या इलेक्ट्रिक कारच्या उत्पादनावर लक्षकेंद्रित करत असतानाच, दुसरीकडे होंडा देखील त्यांच्या इलेक्ट्रिक कारचे टेस्टिंग करत आहे.

• होंडाच्या पहिल्या EV चे टेस्टिंग सुरु
• Honda 0 अल्फा EV ची टेस्टिंग सुरु
• आर्थिक वर्ष 2026-27 मध्ये लाँच होण्याची शक्यता

भारतात इलेक्ट्रिक कारच्या मागणीत चांगली वाढ होताना दिसत आहे. हीच मागणी लक्षात घेत अनेक ऑटो कंपन्या मार्केटमध्ये दमदार इलेक्ट्रिक कार ऑफर करत आहे. आता या इलेक्ट्रिक सेगमेंटमध्ये Honda देखील त्यांचे पहिले पाऊल टाकत आहे. कंपनीने भारतात त्यांच्या इलेक्ट्रिक कारचे टेस्टिंग सुरु झाले आहे.

वाहन निर्माता Honda कडून भारतात अनेक सेगमेंटमध्ये कार्सची विक्री केली जाते. आता कंपनी आपली पहिली इलेक्ट्रिक कार म्हणून Honda 0 Alpha लाँच करण्याच्या तयारीत आहे. त्याआधी कंपनीने भारतात या SUV ची टेस्टिंग सुरू केली आहे. Honda ने याबाबत आणखी काही महत्त्वाची माहितीही दिली आहे.

15 हजार पगाराच्या दमवर सुद्धा Maruti Wagon R CNG आरामात होते तुमची! जाणून घ्या EMI चा साधा-सोपा हिशोब

भारतामध्ये Honda 0 अल्फाची टेस्टिंग सुरू

Honda ने अधिकृतपणे Honda 0 अल्फा या इलेक्ट्रिक SUV ची भारतात टेस्टिंग सुरू केली आहे. कंपनीने 16 मार्च रोजी या SUV ला हिरवा झेंडा दाखवून टेस्टिंगसाठी रवाना केले आहे.

कठोर टेस्टिंगमधून मिळणार महत्त्वाची माहिती

कंपनीच्या माहितीनुसार, या इलेक्ट्रिक SUV ची भारतीय महामार्गांवर, शहरातील रस्त्यांवर तसेच आव्हानात्मक भौगोलिक भागांमध्ये चाचणी घेतली जाणार आहे. या टेस्टिंगमध्ये कारचा टिकाऊपणा, हँडलिंग, प्रवासातील आराम आणि कार्यक्षमता यांचे बारकाईने मूल्यमापन केले जाईल. याशिवाय, तीव्र उष्णता आणि पावसाळी परिस्थितीतही वाहनाची चाचणी होणार आहे.

अधिकाऱ्यांनी काय सांगितले?

Honda Cars India चे अध्यक्ष आणि CEO ताकाशी नाकाजिमा यांनी सांगितले की, संपूर्ण भारतात सार्वजनिक रस्त्यांवर सुरू झालेली ही व्हेरिफिकेशन टेस्ट Honda च्या विद्युतीकरण प्रवासातील एक महत्त्वाचा टप्पा आहे. भारतातील रस्ते आणि हवामानाची परिस्थिती वेगळी असल्यामुळे, प्रत्यक्ष परिस्थितीत इलेक्ट्रिक वाहनाची सखोल टेस्टिंग घेणे आमच्यासाठी अत्यंत महत्त्वाचे आहे. हा उपक्रम Honda च्या जागतिक अभियांत्रिकी क्षमतेचा आणि स्थानिक ग्राहकांच्या गरजांकडे दिलेल्या विशेष लक्षाचा पुरावा आहे. आम्ही अशी इलेक्ट्रिक SUV आणण्याची तयारी करत आहोत जी विश्वासार्हता, आरामदायी अनुभव आणि वापरण्यास सुलभता देईल.

Hyundai Creta की Toyota Hyryder, 50 हजार रुपये पगार असणाऱ्या व्यक्तीसाठी कोणती कार बेस्ट?

कधी होणार लाँच?

मिळालेल्या माहितीनुसार, Honda ही इलेक्ट्रिक SUV आर्थिक वर्ष 2026-27 मध्ये लाँच करू शकते. मात्र, अद्याप कंपनीने लाँचची अचूक तारीख जाहीर केलेली नाही.

भारतामधूनच होणार निर्यात

कंपनीने स्पष्ट केले आहे की, या SUV चे उत्पादन भारतातच केले जाणार आहे. तसेच भारतातूनच ही इलेक्ट्रिक SUV जपानसह इतर अनेक देशांमध्ये निर्यात केली जाणार आहे.