शनिवार, 24 ऑक्टोबर 2026
(फोटो सौजन्य-AI एआय)
भारतातील प्रमुख वाहन उत्पादक कंपनी महिंद्रा अँड महिंद्राने ऑगस्ट २०२६ मध्ये १,०७,६४८ वाहनांची एकूण विक्री नोंदवली आहे. गेल्या वर्षाच्या तुलनेत कंपनीच्या एकूण विक्रीत निर्यातीसह ४२ टक्क्यांची मोठी वाढ झाली आहे. देशांतर्गत बाजारात SUV ची वाढलेली प्रचंड मागणी आणि निर्यातीतील ७१ टक्क्यांची भरघोस वाढ यामुळे महिंद्राने हा ऐतिहासिक टप्पा गाठला आहे.
देशांतर्गत युटिलिटी व्हेइकल्स श्रेणीत महिंद्राने ५९,२५७ वाहनांची विक्री केली आहे, जी ऑगस्ट २०२५ मधील ३९,३९९ युनिट्सच्या तुलनेत तब्बल ५० टक्क्यांनी जास्त आहे. निर्यातीसह एकूण SUV विक्री ६१,१६७ युनिट्सवर पोहोचली आहे. चालू आर्थिक वर्षाच्या पहिल्या पाच महिन्यांत (एप्रिल ते ऑगस्ट २०२६) महिंद्राने २,९४,०५० SUV ची विक्री केली आहे. अपडेटेड स्कॉर्पिओ-एन आणि BE 6 Sporteq या गाड्यांना ग्राहकांकडून मिळालेल्या उदंड प्रतिसादामुळे ही वाढ झाली आहे.
व्यावसायिक वाहने आणि तीन चाकी वाहनांच्या विभागातही महिंद्राने उत्तम कामगिरी केली आहे. लहान व्यावसायिक वाहनांची विक्री २७,४१५ युनिट्सवर पोहोचली असून त्यात २२ टक्क्यांची वाढ झाली आहे. तसेच इलेक्ट्रिक गाड्यांसह तीन चाकी वाहनांच्या श्रेणीत १४,९२२ युनिट्सची विक्री झाली, जी गेल्या वर्षीच्या तुलनेत ४२ टक्क्यांनी जास्त आहे. एप्रिल ते ऑगस्ट या पाच महिन्यांत थ्री-व्हीलर विक्रीत तब्बल ६२ टक्क्यांची वाढ नोंदवली गेली आहे.
निर्यातीचा विचार केल्यास ऑगस्ट २०२६ मध्ये महिंद्राने ६,०५४ वाहने परदेशात पाठवली असून त्यात ७१ टक्क्यांची झेप घेतली आहे. कंपनी आता आपल्या आगामी नवीन गाड्यांवर काम करत असून लवकरच Vision S कॉन्सेप्टवर आधारित कॉम्पॅक्ट SUV आणि प्रीमियम BE7 बाजारात आणणार आहे. याशिवाय ३-डोअर थारचे फेसलिफ्ट व्हर्जन आणि २०२७ मध्ये येणारी स्कॉर्पिओ-एन लाईफस्टाईलर ही मॉडेल्स देखील पाइपलाइनमध्ये आहेत.
