India Transport Sector: ट्रक वाहतुकीला अच्छे दिन! दुचाकी, कार अन् बांधकाम उपकरणांच्या विक्रीत वाढ

India Transport Sector: दिवाळीपूर्वीच्या सणासुदीच्या मागणीमुळे ऑक्टोबर महिन्यात भारताच्या वाहतूक आणि वाहन क्षेत्राला चांगली गती मिळाली. देशातील प्रमुख मार्गांवर ट्रकच्या भाडेदरात वार्षिक 4 ते 13 टक्क्यांपर्यंत वाढ नोंदवण्यात आली.

• सणासुदीमुळे ट्रकच्या भाडेदरात 13% पर्यंत वाढ.
• ऑक्टोबरमध्ये दुचाकी विक्रीत 29% वाढ.
• इलेक्ट्रिक कारच्या विक्रीत वार्षिक 115% वाढ.

दिवाळीपूर्वी सणासुदीच्या हंगामातील मालवाहतुकीच्या वाढलेल्या मागणीमुळे आणि वाहनांच्या किरकोळ विक्रीत झालेल्या सर्वांगीण वाढीमुळे ऑक्टोबर महिन्यात भारताच्या वाहतूक क्षेत्राला चांगली गती मिळाली. यामुळे देशातील उपभोग आणि मालवाहतूक क्षेत्रातील सकारात्मक स्थितीचे संकेत मिळत आहेत. India Transport Sector:

सणासुदीच्या मागणीमुळे ट्रकचे भाडेदर मजबूत राहिले. निरीक्षणाखाली असलेल्या सर्व प्रमुख मार्गांवर ट्रक भाडेदरात वार्षिक आधारावर वाढ नोंदवण्यात आली. दिल्ली–कोलकाता–दिल्ली मार्गावर 13 टक्के वाढ झाली. त्यानंतर बंगळुरू–मुंबई–बंगळुरू मार्गावर 12 टक्के आणि कोलकाता–गुवाहाटी–कोलकाता मार्गावर 9 टक्के वाढ नोंदवण्यात आली. इतर मार्गांवरील भाडेदरात 4 ते 7 टक्क्यांची वाढ झाली. महिन्याच्या तुलनेतही भाडेदर स्थिर राहिले. बंगळुरू–मुंबई–बंगळुरू मार्गावर 2 टक्के, तर दिल्ली–चेन्नई–दिल्ली मार्गावर 1.4 टक्क्यांची वाढ झाली.

प्रवेशबंदीमुळे ट्रक चालक आणि वाहतूकदारांना अडचणींचा सामना

मात्र, राष्ट्रीय राजधानी क्षेत्रात (NCR) BS IV ट्रकच्या प्रवेशबंदीमुळे ट्रक चालक आणि वाहतूकदारांना अडचणींचा सामना करावा लागला. या बंदीमुळे सीमेवर संभ्रमाचे वातावरण निर्माण झाले. ऑक्टोबरमध्ये दुचाकींच्या विक्रीत दमदार वाढ झाली. मोटारसायकल आणि स्कूटरच्या विक्रीत महिन्याच्या तुलनेत 29 टक्क्यांची वाढ नोंदवण्यात आली. दिवाळीपूर्वी सणासुदीच्या खरेदीला मिळालेल्या चालनेमुळे सर्व वाहन श्रेणींमध्ये ही सर्वाधिक वाढ ठरली.

Indian Stock Market Rally: शेअर बाजारात तेजीचा धमाका; अवघ्या 5 मिनिटांत गुंतवणूकदारांच्या संपत्तीत 7 लाख कोटींची भर

कार आणि बांधकाम उपकरणांच्या विक्रीतही सकारात्मक वाढ दिसून आली. मोटार कारच्या विक्रीत महिन्याच्या तुलनेत 17 टक्क्यांची वाढ झाली. बांधकाम उपकरणांच्या विक्रीत 25 टक्के, तर अर्थमूव्हिंग उपकरणांच्या विक्रीत 7 टक्क्यांची वाढ नोंदवण्यात आली. बांधकाम उपकरणांच्या विक्रीत वार्षिक आधारावरही 21 टक्क्यांची वाढ झाली.

इतर वाहन श्रेणींमध्ये तीनचाकी मालवाहू वाहनांची आणि कृषी ट्रेलर्सची विक्री महिन्याच्या तुलनेत प्रत्येकी 20 टक्क्यांनी वाढली. त्यानंतर व्यावसायिक ट्रॅक्टरच्या विक्रीत 15 टक्के आणि मालवाहू वाहनांच्या विक्रीत 11 टक्क्यांची वाढ झाली. मात्र, मॅक्सी कॅबच्या विक्रीत 11 टक्के आणि बसच्या विक्रीत 2 टक्क्यांची घट झाली.

तीनचाकी मालवाहू वाहनांच्या विक्रीत

वार्षिक आधारावर वाहन विक्रीचे चित्र संमिश्र राहिले. गेल्या वर्षी ऑक्टोबरमध्ये सणासुदीच्या काळात वाहन विक्रीने उच्चांक गाठला होता. त्यामुळे यंदाच्या विक्रीची तुलना उच्च आधाराशी करण्यात आली. तीनचाकी मालवाहू वाहनांच्या विक्रीत सर्वाधिक 25 टक्क्यांची वाढ झाली. त्यानंतर बसच्या विक्रीत 14 टक्के आणि कृषी ट्रॅक्टरच्या विक्रीत 7 टक्क्यांची वाढ झाली.

दुसरीकडे, मोटारसायकल आणि स्कूटरच्या विक्रीत 28 टक्के, व्यावसायिक ट्रॅक्टरमध्ये 24 टक्के, मोटार कारमध्ये 15 टक्के, अर्थमूव्हिंग उपकरणांमध्ये 12 टक्के आणि कृषी ट्रेलर्सच्या विक्रीत 11 टक्क्यांची घट झाली. मालवाहू वाहनांच्या विक्रीतही किरकोळ घट नोंदवण्यात आली.

इलेक्ट्रिक वाहनांच्या विक्रीत वार्षिक आधारावर दमदार वाढ सुरूच राहिली. इलेक्ट्रिक कारच्या विक्रीत 115 टक्क्यांची वाढ होऊन ती दुपटीहून अधिक झाली. त्याचबरोबर इलेक्ट्रिक तीनचाकी वाहनांच्या विक्रीत 93 टक्के आणि इलेक्ट्रिक दुचाकींच्या विक्रीत 62 टक्क्यांची वाढ झाली. यावरून इलेक्ट्रिक मोबिलिटी क्षेत्राचा सातत्याने विस्तार होत असल्याचे स्पष्ट होते. महिन्याच्या तुलनेत इलेक्ट्रिक दुचाकींच्या विक्रीत 8 टक्के, तर इलेक्ट्रिक तीनचाकी वाहनांच्या विक्रीत 5 टक्क्यांची वाढ झाली.

Mumbai Redevelopment: मुंबईत पुनर्विकासाची लाट; भाडे बाजारपेठेला तेजी, घरांच्या परताव्यात वाढ

सणासुदीच्या हंगामातील मालवाहतुक

या घडामोडींवर भाष्य करताना श्रीराम फायनान्सचे जॉइंट मॅनेजिंग डायरेक्टर आणि चीफ ऑपरेटिंग ऑफिसर (कमर्शियल व्हेइकल्स) श्री. सुदर्शन होल्ला म्हणाले, “ऑक्टोबर महिन्यात सणासुदीच्या हंगामातील मालवाहतुकीमुळे ट्रकचे भाडेदर अत्यंत मजबूत राहिले. नोव्हेंबरच्या पहिल्या पंधरवड्यापर्यंत ही गती कायम राहण्याची अपेक्षा आहे. NCR क्षेत्रात BS IV ट्रकच्या प्रवेशबंदीमुळे ट्रक चालक आणि वाहतूकदारांना अडचणींचा सामना करावा लागत आहे. दुचाकी, प्रवासी कार आणि बांधकाम उपकरणांच्या विक्रीत महिन्याच्या तुलनेत दमदार वाढ झाली आहे. या महिन्यात दिवाळी असल्याने विक्रीतील ही गती कायम राहण्याची शक्यता आहे.”

मालवाहतूक हे यामागील प्रमुख कारण

ऑक्टोबर महिन्यात इंधनाच्या वापरातही वाढ झाली. पेट्रोलच्या वापरात महिन्याच्या तुलनेत 4 टक्के वाढ झाली, तर डिझेलच्या वापरात 20 टक्क्यांची लक्षणीय वाढ नोंदवण्यात आली. सणासुदीच्या काळातील वाढलेली मालवाहतूक हे यामागील प्रमुख कारण ठरले. वार्षिक आधारावर पेट्रोल आणि डिझेलच्या वापरात अनुक्रमे 3.1 टक्के आणि 11.7 टक्क्यांची वाढ झाली.

ऑक्टोबर महिन्यात FASTag संकलनातही सुधारणा झाली. महिन्याच्या तुलनेत FASTag व्यवहारांच्या संख्येत 1 टक्के, तर संकलित रकमेच्या मूल्यात 2.3 टक्क्यांची वाढ झाली. मात्र, वार्षिक आधारावर व्यवहारांच्या संख्येत 6 टक्क्यांची घट झाली, तर संकलित रकमेच्या मूल्यात 9 टक्क्यांची वाढ नोंदवण्यात आली.