गणेश भक्तांसाठी आनंदाची बाब (फोटो सौजन्य - iStock)
गणपती उत्सवाचा काळ जसजसा जवळ येत आहे तसतसे मुंबई, पुणे, सुरत, वडोदरा आणि देशातील इतर शहरांमध्ये राहणाऱ्या कोकणातील लोकांचा त्यांच्या गावी जाण्याचा उत्साहही वाढत आहे. ढोल-ताशांचा आवाज, मोदकांचा सुगंध आणि कुटुंबाचा सहवास यामुळे घरी गेल्याशिवाय गणपतीचा हा उत्सव अपूर्ण वाटतो. पण, या आनंदात दरवर्षी एक मोठी चिंता असते ती म्हणजे कन्फर्म ट्रेन तिकिटांची. उत्सवादरम्यान, कोकणात जाणाऱ्या प्रत्येक ट्रेनमधील जागा महिनोनमहिने आधीच भरल्या जातात आणि वेटिंग लिस्ट इतकी मोठी असते की कन्फर्म होण्याची शक्यता नसते. शेवटच्या क्षणी, बसचे भाडे आकाशाला भिडू लागते आणि प्रवासही थकवणारा असतो.
गणपतीच्या भक्तांसाठी एक आनंदाची बातमी आहे. गणपती उत्सवानिमित्त रेल्वेने विशेष गाड्यांची घोषणा केली आहे. गणपती उत्सवासाठी घरी जाणाऱ्यांना आता प्रवासाची चिंता करावी लागणार नाही. भारतीय रेल्वेने २०२५ या वर्षासाठी ३८० गणपती विशेष गाड्या जाहीर केल्या आहेत. ही संख्या आतापर्यंतची सर्वाधिक आहे.
दरवर्षी रेल्वे अधिक आणि विशेष गाड्या सोडते मात्र आता रेल्वेने स्वतःचाच रेकॉर्डब्रेक करत ३८० गाड्या सोडण्याची घोषणा केली आहे. त्यामुळे यावर्षी कोकणात जाणारा चाकरमानी नक्कीच आनंदात असणार आणि यावर्षीची बाप्पाची वारी नक्कीच सफल होणार.
फेऱ्या वाढवल्या
रेल्वे मंत्रालयाच्या मते, २०२३ मध्ये ३०५ गणपती विशेष गाड्या चालवण्यात आल्या होत्या, तर २०२४ मध्ये ही संख्या ३५८ झाली. आता २०२५ मध्ये विक्रमी ३८० फेऱ्या चालवल्या जातील जेणेकरून प्रवासी आणि भाविकांना आरामदायी प्रवास करता येईल. रेल्वेचे म्हणणे आहे की, उत्सवादरम्यान प्रवाशांची प्रचंड गर्दी पाहता, अतिरिक्त गाड्या चालवणे आवश्यक आहे. यामुळे लोकांना तिकिटे मिळणे सोपे होईल आणि प्रवासही सोयीस्कर होईल.
दिवाळी आणि छठनिमित्त १२,००० विशेष गाड्या
दिवाळी आणि छठसारख्या सणांमध्ये बिहार-उत्तर प्रदेशला जाणाऱ्या गाड्यांमध्ये तिकिटे मिळवणे हे सर्वात मोठे आव्हान असते हेदेखील सर्वांना माहीत आहे. अशा परिस्थितीत, प्रवाशांच्या अडचणी कमी करण्यासाठी रेल्वेने एक विशेष योजना आखली आहे. सणांमध्ये होणारी गर्दी लक्षात घेता, रेल्वेने देशभरात १२,००० विशेष गाड्या चालवण्याची घोषणा केली आहे. या गाड्या २ महिने देशभर धावतील असेही सांगण्यात आले आहे.
रेल्वे राउंड ट्रिप योजनेत २० टक्के सूट
हे लक्षात घेण्यासारखे आहे की रेल्वे लवकरच ‘राउंड ट्रिप पॅकेज’ ही विशेष सुविधा सुरू करणार आहे. यामध्ये, परतीच्या प्रवासात २० टक्के सूट मिळेल. सोप्या भाषेत सांगायचे तर, जर तुम्ही एकत्र ये-जा करण्यासाठी तिकिटे बुक केली तर तुम्हाला भाड्यात २० टक्के सूट मिळेल. या योजनेअंतर्गत, जाण्यासाठी तिकीट १३ ऑक्टोबर ते २६ ऑक्टोबर दरम्यान आणि परतीचे तिकीट १७ नोव्हेंबर ते १ डिसेंबर २०२५ दरम्यान असावे. ही योजना सध्या प्रायोगिक तत्त्वावर सुरू केली जात आहे.
कोकण रेल्वे भारतीय रेल्वेत विलीन; व्यवसाय, पर्यटन आणि रोजगाराच्या नवीन संधी होतील निर्माण
.png "Videos"){kind=small}
