India-China Relations: संबंधात सुधारणा करण्यासाठी भारताचे मोठे पाऊल; चीनी नागरिकांसाठी टूरिस्ट व्हिसा पुन्हा सुरू

India-China News: LAC दीर्घकाळ चाललेल्या लष्करी तणावानंतर भारत आणि चीन दोन्ही देशांमधील संबंध सामान्य करण्याच्या प्रक्रियेचा एक भाग म्हणून आता नवीन मोठे पाउल उचलले आहे.

• संबंध स्थिर करण्यासाठी भारताचे प्रयत्न
• गलवान संघर्षानंतर २०२० मध्ये निलंबित केलेली सुविधा पुन्हा बहाल
• दोन्ही देशांनी LAC वरून सैन्य मागे घेण्यास दिली होती सहमती

India-China Relations: भारताचे आणि चीनचे संबध सुधारताना (India-China Relations) दिसत आहे. काही दिवसापुर्वी दोन्ही देशांकडून विमान प्रवास सुरु करण्यात आला होता, आता पुन्हा एकदा मोठा निर्णय घेत दोन्ही देशातील संबध सुधरण्यासाठी भर दिला जात आहे. भारताने अलीकडेच जगभरातील आपल्या दूतावास आणि वाणिज्य दूतावासांद्वारे चिनी नागरिकांसाठी पर्यटक व्हिसा अर्ज पुन्हा सुरू केले आहेत. प्रत्यक्ष नियंत्रण रेषेवर (LAC) दीर्घकाळ चाललेल्या लष्करी तणावानंतर दोन्ही देशांमधील संबंध सामान्य करण्याच्या प्रक्रियेचा एक भाग म्हणून या निर्णयाकडे पाहिले जात आहे.

एक महत्त्वाचे पाऊल

२०२० मध्ये झालेल्या गलवान खोऱ्यातील संघर्षानंतर चिनी नागरिकांसाठी व्हिसा सुविधा निलंबित करण्यात आली होती, ज्यामुळे दोन्ही देशांचे संबंध दशकांमध्ये पहिल्यांदाच खालच्या पातळीवर पोहोचले होते. कोणतीही औपचारिक घोषणा न करता ही सुविधा आता पुन्हा सुरू करण्यात आली असून, हा निर्णय दोन्ही देशांमधील लोक-ते-लोक संपर्क (People-to-people contact) वाढवण्याच्या दिशेने एक महत्त्वाचे पाऊल असल्याचे तज्ञांचे म्हणणे आहे.

हे देखील वाचा: Power Balance : मध्य पूर्वेत नवा खेळ; इराण नव्हे तर रशियाने ‘या’ दोन मुस्लिम देशांना युद्धसज्जतेसाठी बनवले महत्त्वाचे प्यादे

संबंध स्थिर करण्यासाठी भारताचे प्रयत्न

सूत्रांनी दिलेल्या माहितीनुसार, अलिकडच्या काही महिन्यांत भारत आणि चीनने त्यांचे संबंध स्थिर करण्यासाठी अनेक लोक-केंद्रित उपाययोजनांवर सहमती दर्शविली आहे. या उपक्रमांचाच एक भाग म्हणून:

थेट उड्डाणे: २०२० पासून निलंबित केलेली थेट उड्डाणे ऑक्टोबर २०२४ मध्ये पुन्हा सुरू करण्यात आली.

इतर उपक्रम: कैलास मानसरोवर यात्रा पुन्हा सुरू करणे, विविध श्रेणीतील प्रवाशांसाठी व्हिसा प्रवेश वाढवणे आणि राजनैतिक संबंधांच्या ७५ व्या वर्धापन दिनानिमित्त संयुक्त उपक्रम आयोजित करणे यासारखे उपाय देखील हाती घेण्यात आले आहेत.

व्हिसा सुविधा: पूर्वी केवळ चीनमधील मिशनद्वारे चिनी पर्यटकांना व्हिसा दिला जात असे, पण आता जागतिक स्तरावर ही सुविधा उपलब्ध आहे. यामुळे दोन्ही देशांमधील लोकांमधील संवाद वाढण्याची अपेक्षा आहे.

LAC वरून सैन्य माघारी आणि उच्चस्तरीय भेटी

ऑक्टोबर २०२४ मध्ये दोन्ही देशांनी LAC वरील पुढच्या जागांवरून सैन्य मागे घेण्याचे मान्य केले. या करारानंतर, पंतप्रधान नरेंद्र मोदी आणि राष्ट्राध्यक्ष शी जिनपिंग यांची कझान (Kazan) येथे भेट झाली. या भेटीत संबंध सामान्य करण्याचा आणि सीमा वाद सोडवण्यासाठी यंत्रणा पुन्हा सक्रिय करण्याचा निर्णय घेण्यात आला. त्यानंतर परराष्ट्र आणि संरक्षण मंत्री, राष्ट्रीय सुरक्षा सल्लागार आणि सीमा वाटाघाटीसाठी विशेष प्रतिनिधींमध्ये अनेक फेऱ्या झाल्या. या भेटींमधून सीमा व्यापार, आर्थिक सहकार्य आणि इतर क्षेत्रांमध्ये हळूहळू क्रियाकलाप पुन्हा सुरू करण्यासाठी एकमत झाले आहे.

हे देखील वाचा: Chemical Weapons : ‘पाकिस्तानी सैन्याने बलुचिस्तानात फॉस्फरस बॉम्ब…’, मीर यार बलोच यांचा आंतरराष्ट्रीय लक्षवेधी दावा