शेतकऱ्यांसाठी दिलासा! सोयाबीन, मूग, उडीद खरेदीसाठी नोंदणी ३० ऑक्टोबरपासून सुरू; कापसाच्या एमएसपीमध्ये मोठी वाढ

पणनमंत्री जयकुमार रावल यांनी सोयाबीन, मूग आणि उडीद खरेदीसाठी ३० ऑक्टोबरपासून नोंदणी सुरू करण्याची घोषणा केली. केंद्र सरकारने कापसाच्या MSP मध्ये मोठी वाढ केली असून, खरेदीची रक्कम थेट शेतकऱ्यांच्या खात्यात जमा होणार आहे.

• पणनमंत्री जयकुमार रावल यांची घोषणा
• खरेदीचे मोठे उद्दिष्ट
• पूर्ण रक्कम थेट शेतकऱ्यांच्या खात्यात जमा होणार

मुंबई: केंद्र आणि राज्य शासनाने शेतकऱ्यांच्या हिताला प्राधान्य देत सोयाबीन, मूग आणि उडीद या शेतमालाच्या किमान आधारभूत किमतीत (MSP – Minimum Support Price) मोठी वाढ केली आहे. या शेतमालाच्या खरेदीसाठीची नोंदणी प्रक्रिया ३० ऑक्टोबर २०२५ पासून सुरू होत आहे. कापूस खरेदीसाठी ‘कपास किसान’ ॲपद्वारे नोंदणी १ सप्टेंबर २०२५ पासूनच सुरू आहे, अशी माहिती पणन व राजशिष्टाचार मंत्री जयकुमार रावल यांनी मंत्रालयात आयोजित पत्रकार परिषदेत दिली. यावेळी प्रधान सचिव प्रवीण दराडे उपस्थित होते. पणनमंत्री रावल म्हणाले, “शेतकऱ्यांनी ॲपद्वारे अथवा खरेदी केंद्रावर नोंदणी करावी. एमएसपीनुसार पूर्ण रक्कम थेट शेतकऱ्यांच्या खात्यात जमा होईल.”

शेतमालाचा सुधारित एमएसपी आणि खरेदीचे उद्दिष्ट

पंतप्रधान नरेंद्र मोदी यांच्या प्राधान्यक्रमानुसार गेल्या दहा वर्षांत किमान आधारभूत किमतीत मोठी वाढ करण्यात आली आहे.

पणनमंत्री रावल यांनी स्पष्ट केले की, शेतकरी विक्रीस आणेल त्या सर्व सोयाबीन, मूग आणि उडीद या शेतमालाच्या मोठ्या प्रमाणात खरेदीचे नियोजन राज्य शासनाने केले आहे.

तुमच्या खिशाला आता कात्री! 1 नोव्हेंबेरपासून बँक खातेदारांपासून ते सरकारी कर्मचाऱ्यांपर्यंतपर्यंत ‘हे’ 5 नियम बदलणार

पारदर्शक खरेदीसाठी प्रभावी उपाययोजना

खरेदी प्रक्रिया सुलभ आणि पारदर्शक ठेवण्यासाठी अनेक उपाययोजना करण्यात आल्या आहेत.

• नोंदणी प्रक्रिया: शेतकरी ३० ऑक्टोबरपासून खरेदी केंद्रांवर किंवा ॲपद्वारे नोंदणी करू शकतात. त्यांना त्यांच्या सोयीनुसार तारीख आणि वेळ निश्चित करून शेतमाल खरेदी केंद्रांवर आणावा लागेल.
• नोडल संस्था: महाराष्ट्र राज्य सहकारी पणन महासंघ, विदर्भ सहकारी पणन महासंघ आणि महाराष्ट्र राज्य कृषी पणन मंडळ, पुणे या तीन राज्यस्तरीय नोडल संस्थांची नियुक्ती करण्यात आली आहे.
• खरेदी केंद्र: कृषी उत्पन्न बाजार समिती (APMC) यांना देखील पहिल्यांदाच खरेदी केंद्र म्हणून नियुक्त केले आहे.
• नियंत्रण कक्ष: जिल्हा आणि तालुकास्तरावर तक्रार निवारण कक्ष आणि संपर्क क्रमांक उपलब्ध करून देण्यात येणार आहेत.
• दक्षता पथक: खरेदी प्रक्रियेवर नियंत्रण ठेवण्यासाठी जिल्हाधिकारी, जिल्हा उपनिबंधक, कृषी अधिकारी आणि पोलीस प्रशासन यांचे दक्षता पथक स्थापन करण्यात आले आहे.

कापूस खरेदीसाठी मोठी तयारी

राज्यातील प्रमुख नगदी पीक असलेल्या कापसासाठीही एमएसपी खरेदी सुरू आहे. गेल्या वर्षीचा कापूस दर ₹७,५२१ होता, जो यावर्षी ₹८,११० प्रती क्विंटल निश्चित करण्यात आला आहे. यामध्ये ₹५८९ रुपयांची वाढ करण्यात आली आहे. गेल्या वर्षी ६.२७ लाख शेतकऱ्यांकडून १०,७१४ कोटी रुपयांच्या १४४ लाख क्विंटल कापसाची विक्रमी खरेदी झाली होती.  ‘कपास किसान’ ॲपद्वारे आतापर्यंत ३.७५ लाखांहून अधिक शेतकऱ्यांनी नोंदणी केली आहे. खरेदी केंद्रांची वाढ: यावर्षी खरेदी केंद्रांची संख्या १२४ वरून १७० पर्यंत वाढवण्यात आली आहे.

रिफायनरी बांधण्यासाठी 1 लाख कोटींचा नॉन-बाइंडिंग सामंजस्य करार