(फोटो सौजन्य: सोशल मीडिया)
Sanjay Khanna appointed Chairman and MD of BPCL : ‘फॉर्च्युन ग्लोबल ५००’ कंपनी आणि ‘महारत्न’ सार्वजनिक उपक्रम असलेल्या भारत पेट्रोलियम कॉर्पोरेशन लिमिटेडने आज जाहीर केले की, मंत्रिमंडळाच्या नियुक्ती समितीने सध्याचे संचालक संजय खन्ना यांची कंपनीच्या अध्यक्ष आणि व्यवस्थापकीय संचालक पदावर नियुक्ती करण्यास मंजुरी दिली आहे. पेट्रोलियम आणि नैसर्गिक वायू मंत्रालयाच्या अंतर्गत असलेल्या शोध-सह-निवड समितीच्या शिफारशीनुसार मंत्रिमंडळाच्या नियुक्ती समितीने या नियुक्तीला मान्यता दिली आहे. खन्ना हे पदभार स्वीकारल्याच्या तारखेपासून ३१ मे २०२९ पर्यंत किंवा पुढील आदेश येईपर्यंत या पदावर कार्यरत राहतील. तेल शुद्धीकरण प्रकल्पांमधील कामकाज आणि प्रकल्प अंमलबजावणीचा दांडगा अनुभव असलेले श्री खन्ना हे मूल्यवर्धित उत्पादने, पेट्रोकेमिकल एकात्मीकरण, कार्यात्मक कार्यक्षमता आणि दीर्घकालीन ऊर्जा सुरक्षा यावर कंपनीचे धोरणात्मक लक्ष अधिक दृढ करतील, तसेच बदलत्या ऊर्जा क्षेत्रात शाश्वत वाढीसाठी कंपनीला दिशा देतील अशी अपेक्षा आहे.
संजय खन्ना हे तेल शुद्धीकरण आणि तांत्रिक सेवा क्षेत्रातील तीन दशकांहून अधिक अनुभव असलेले अनुभवी नेतृत्व आहेत. नॅशनल इन्स्टिट्यूट ऑफ टेक्नॉलॉजी तिरुचिरापल्ली येथून केमिकल इंजिनीअरिंगची पदवी आणि मुंबई विद्यापीठातून वित्त व्यवस्थापनातील पदव्युत्तर पदवी संपादन केलेले खन्ना यांनी बीपीसीएलची शुद्धीकरण आणि पेट्रोकेमिकल क्षमता मजबूत करण्यात मोलाची भूमिका बजावली आहे. अध्यक्ष आणि व्यवस्थापकीय संचालक म्हणून नियुक्ती होण्यापूर्वी त्यांनी संचालक म्हणून काम पाहिले आहे. त्यांनी यापूर्वी बीपीसीएलच्या मुंबई आणि कोची येथील तेल शुद्धीकरण प्रकल्पांचे प्रमुख म्हणून कार्यक्षमता वाढवण्यासाठी आणि क्षमता विस्तारासाठी नेतृत्व केले आहे. कोची रिफायनरीचे कार्यकारी संचालक असताना त्यांनी कोरोना महामारीच्या आव्हानात्मक काळात बीपीसीएलच्या पहिल्या वैशिष्ट्यपूर्ण पेट्रोकेमिकल प्रकल्पाचे यशस्वी कार्यान्वयन केले, जो बीपीसीएलच्या पेट्रोकेमिकल प्रवासातील एक महत्त्वाचा टप्पा ठरला.
गेल्या अनेक वर्षांत खन्ना यांनी बीपीसीएलच्या विविध तेल शुद्धीकरण प्रकल्पांमध्ये नवीन प्रक्रिया संच स्थापित करणाऱ्या अनेक प्रतिष्ठित प्रकल्पांचे नेतृत्व केले आहे, ज्यामुळे कंपनीची कार्यक्षमता आणि तांत्रिक प्रगती सुधारण्यास मदत झाली आहे. त्याचबरोबर ते भारत पेट्रो रिसोर्सेस लिमिटेड, पेट्रोनेट एलएनजी लिमिटेड आणि रत्नागिरी रिफायनरी अँड पेट्रोकेमिकल्स लिमिटेडच्या संचालक मंडळावर कार्यरत असून ऊर्जा साखळीत बीपीसीएलचे स्थान अधिक मजबूत करत आहेत. याव्यतिरिक्त श्री खन्ना हे पेट्रोलियम आणि नैसर्गिक वायू मंत्रालयाच्या अंतर्गत तेल शुद्धीकरण केंद्रांच्या तांत्रिक समितीचे अध्यक्ष म्हणूनही काम पाहत असून भारताच्या तेल शुद्धीकरण क्षेत्रातील धोरणात्मक आणि तांत्रिक प्रगतीमध्ये योगदान देत आहेत.
फॉर्च्युन ग्लोबल ५०० यादीतील बीपीसीएल ही भारतातील दुसऱ्या क्रमांकाची तेल विपणन कंपनी असून, कच्च्या तेलाचे शुद्धीकरण व पेट्रोलियम उत्पादनांचे विपणन या क्षेत्रात कार्यरत असलेली एक एकात्मिक ऊर्जा कंपनी आहे. कंपनीला ‘महारत्न’ दर्जा प्राप्त झाला असून, यामुळे अधिक कार्यकारी व आर्थिक स्वायत्तता मिळाली आहे. मुंबई, कोची आणि बीना येथील रिफायनरीजची एकत्रित क्षमता सुमारे ३५.३ दशलक्ष मेट्रिक टन प्रतिवर्ष आहे. कंपनीकडे २५,३०० हून अधिक इंधन केंद्रे, १,००० हून अधिक सीएनजी केंद्रे, ६,२५० हून अधिक एलपीजी वितरक, ४४० ल्युब्रिकंट वितरक, ८१ साठवण केंद्रे, ५६ एलपीजी बॉटलिंग प्रकल्प, ८१ विमानन सेवा केंद्रे, ५ ल्युब मिश्रण प्रकल्प आणि ६ आंतरराज्य पाइपलाईन्सचे विस्तृत जाळे आहे. पर्यावरणपूरक व शाश्वत विकासाच्या दिशेने बीपीसीएल आपली धोरणे, गुंतवणूक आणि सामाजिक उद्दिष्टे एकत्रित करत असून, ६,८०० हून अधिक इंधन केंद्रांवर इलेक्ट्रिक वाहन चार्जिंग सुविधा उपलब्ध केली आहे. २०४० पर्यंत ‘नेट झिरो’ ऊर्जा कंपनी होण्याचे उद्दिष्ट कंपनीने ठेवले आहे. शिक्षण, जलसंधारण, कौशल्य विकास, आरोग्य आणि समाजविकास या क्षेत्रांत विविध उपक्रम राबवत बीपीसीएल समाजाशी जोडलेले कार्य करत आहे. ‘एनर्जायझिंग लाइव्ह्स’ हे ध्येय ठेवून कंपनी जागतिक स्तरावर आदर्श ऊर्जा कंपनी बनण्याच्या दिशेने वाटचाल करत आहे.
.png "Videos"){kind=small}
