अहिल्यानगरसाठी ऐतिहासिक क्षण! ‘सिव्हिल’मध्ये शासकीय वैद्यकीय महाविद्यालय सुरू; प्रवेश प्रक्रिया कधीपासून? जाणून घ्या

अहिल्यानगरमध्ये ‘सिव्हिल’ रुग्णालयात शासकीय वैद्यकीय महाविद्यालय सुरू करण्याचा ऐतिहासिक निर्णय घेण्यात आला आहे. यंद्याच शैक्षणिक वर्षापासून प्रवेश प्रक्रिया राबवली जाणार असून, शिक्षणासाठी मोठी संधी उपलब्ध होणार आहे.

• अहिल्यानगरसाठी ऐतिहासिक क्षण
• ‘सिव्हिल’मध्ये शासकीय वैद्यकीय महाविद्यालय सुरू
• यंदापासूनच प्रवेश प्रक्रिया

पोपट पिटेकर, अहिल्यानगर : अहिल्यानगर जिल्ह्याच्या शिरपेचात मानाचा तुरा रोवला गेला असून, जिल्हा सामान्य रुग्णालय परिसरात अखेर ‘पुण्यश्लोक अहिल्यादेवी होळकर शासकीय वैद्यकीय महाविद्यालय’ याच शैक्षणिक वर्षापासून (२०२६) सुरू होत आहे. विशेष म्हणजे, मागील वर्षी मुख्यमंत्री देवेंद्र फडणवीस यांनी केलेल्या घोषणेची वर्षभरातच अंमलबजावणी करत महायुती सरकारने जिल्ह्याला मोठी आरोग्य भेट दिली आहे.

Maharashtra Board Result Date : दहावी-बारावीच्या निकालाची तारीख ठरली? मात्र गुणपत्रिकेत होणार मोठे बदल!

मंत्रिमंडळाच्या निर्णयाची यशस्वी अंमलबजावणी

६ मे २०२५ रोजी अहिल्यादेवींचे जन्मस्थान असलेल्या चौंडी येथे राज्य मंत्रिमंडळाची विशेष बैठक पार पडली होती. या बैठकीत जिल्ह्यासाठी स्वतंत्र शासकीय वैद्यकीय महाविद्यालयाची घोषणा करण्यात आली होती. विधान परिषदेचे सभापती प्रा. राम शिंदे यांनी या महाविद्यालयासाठी सातत्याने पाठपुरावा केला होता. त्यांच्या या मागणीला यश आले असून, सोमवारी २७ एप्रिल रोजी मुख्यमंत्री फडणवीस यांनी हे महाविद्यालय यंदापासूनच कार्यान्वित होत असल्याचे जाहीर केले.

शंभर जागा आणि अत्याधुनिक सुविधा

या नवीन वैद्यकीय महाविद्यालयामुळे जिल्ह्याच्या आरोग्य व्यवस्थेला मोठी बळकटी मिळणार आहे.

महाविद्यालयाची ठळक वैशिष्ट्ये खालीलप्रमाणे

विद्यार्थी क्षमता: दरवर्षी १०० विद्यार्थ्यांना वैद्यकीय शिक्षणाची (MBBS) संधी मिळणार आहे.

रुग्णालय क्षमता: सिव्हिल हॉस्पिटलमध्ये ४३० खाटांची क्षमता असलेले सुसज्ज रुग्णालय या कॉलेजला जोडलेले असेल.

प्रवेश प्रक्रिया: शैक्षणिक वर्ष २०२६ पासूनच या महाविद्यालयाची प्रवेश प्रक्रिया सुरू होणार असल्याने वैद्यकीय शिक्षण घेणाऱ्या विद्यार्थ्यांचा मोठा प्रश्न सुटणार आहे.

जिल्ह्यातील आरोग्य सेवेला मिळणार गती

अहिल्यानगर जिल्हा भौगोलिकदृष्ट्या मोठा असल्याने येथे शासकीय वैद्यकीय महाविद्यालयाची नितांत गरज होती. आता सिव्हिल हॉस्पिटलचे रूपांतर मेडिकल कॉलेजमध्ये झाल्यामुळे येथे तज्ज्ञ डॉक्टरांची उपलब्धता वाढणार असून, जिल्ह्यातील सामान्य रुग्णांना उच्च दर्जाचे उपचार स्थानिक पातळीवरच मोफत उपलब्ध होतील. राज्यातील महायुती सरकारने दिलेल्या शब्दाला जागत वर्षभरातच हे महाविद्यालय सुरू केल्याने जिल्हाभरातून आनंदाचे वातावरण व्यक्त होत आहे.

Education News: राज्यातील ७३६ शिक्षण संस्थांना सरकारी अनुदानाची दारे बंद; राज्य सरकारचा मोठा दणका