शिक्षकांना शालेय कामापासून दूर ठेवण्याचा प्रयत्न? राज्यातील शिक्षण व्यवस्थेवरून दिलीप कडू यांचे वक्तव्य

शासनाच्या जाचक नियमांविरोधात शिक्षकांनी संघटित होऊन लढा देणे अत्यावश्यक असल्याचे विदर्भ शिक्षक संघाचे नेते दिलीप कडू यांनी वाशिममधील दौऱ्यात सांगितले.

• तांत्रिक कामांचा बोजा लादला जात आहे
• शिक्षकांना शैक्षणिक कार्यापासून दूर करण्यात येत आहे
• विद्यार्थ्यांचा शैक्षणिक दर्जाही खालावतो

Washim News वाशिम येथे झालेल्या शिक्षक संपर्क दौऱ्यात विदर्भ माध्यमिक शिक्षक संघाचे नेते दिलीप कडू यांनी राज्यातील शिक्षण व्यवस्थेवर होत असलेल्या परिणामांबद्दल गंभीर चिंता व्यक्त केली. त्यांनी सांगितले की, विविध जाचक शासननिर्णय आणि नियम लागू करून शिक्षण क्षेत्राची दिशा व कार्यप्रणाली ढासळवण्याचा प्रयत्न सुरू आहे. हा एक संगनमताचा डाव असून तो हाणून पाडण्यासाठी शिक्षकांनी एकत्र येऊन संघटित शक्ती वाढवणे अत्यंत आवश्यक असल्याचे त्यांनी अधोरेखित केले.

वैद्यकीय शिक्षण करणाऱ्या विद्यार्थ्यांची सर्जन विभागाकडे पाठ! छोटीशी चूक पडते महागात म्हणून…

कडू यांनी पुढे बोलताना स्पष्ट केले की, शिक्षकांवर अनावश्यक प्रशासकीय व तांत्रिक कामांचा बोजा लादला जात आहे. टीईटी अनिवार्य करणे, चुकीच्या संचमान्यता, शिक्षकांना कागदोपत्री व तांत्रिक कामांमध्ये गुंतवून ठेवणे, बीएलओची जबाबदारी देणे अशा निर्णयांमुळे शिक्षकांना शैक्षणिक कार्यापासून दूर करण्यात येत आहे. यामुळे विद्यार्थ्यांचा शैक्षणिक दर्जाही खालावतो आणि शाळांची प्रगती प्रभावित होते. त्याशिवाय, अनुदानित शाळांमध्ये शिक्षक अतिरिक्त असल्याचे दाखवून त्या टप्प्याटप्प्याने बंद पाडण्याचे योजनाबद्ध षडयंत्र शासनाकडून रचले जात असल्याचा गंभीर आरोपही त्यांनी केला.

या परिस्थितीत शिक्षकांनी स्वतःमध्ये एकोपा निर्माण करून अन्यायकारक धोरणांना ठामपणे विरोध करणे गरजेचे असल्याचे कडू यांनी सांगितले. “विदर्भ माध्यमिक शिक्षक संघ हा संशयास्पद डाव कोणत्याही परिस्थितीत यशस्वी होऊ देणार नाही,” असे ठाम आश्वासन त्यांनी उपस्थित शिक्षकांना दिले. त्यांच्या म्हणण्यानुसार, शिक्षकांचा संघटित आवाज हा शासनाला वास्तव समजावून सांगण्याचे सर्वात प्रभावी साधन ठरू शकतो.

सी-टीईटी 2026 साठी अर्ज प्रक्रिया सुरू! ‘या’ तारखेपर्यंत करता येईल अर्ज

या संपर्क दौऱ्यात प्रा. बाळासाहेब गोटे, विनायक उज्जैनकर, जिल्हाध्यक्ष रामेश्वर अवचार, कुलदिप बदर, सुनील कोंगे, बबनराव ठाकरे, मंगेश भोरे, डी. एन. पाटील, गजानन इढोळे, नंदकिशोर नवरे, प्रा. शंकर लहाने, संतोष गडेकर, अविनाश पसारकर तसेच जिल्हा व तालुका स्तरावरील अनेक पदाधिकारी मोठ्या संख्येने उपस्थित होते. शिक्षकांनी या दौऱ्यात मांडलेल्या मुद्द्यांवर आपले समर्थन दर्शवून शिक्षण क्षेत्राला न्याय मिळवण्यासाठी संघटित लढा देण्याची तयारी दाखवली.