फोटो सौजन्य - Social Media
नीता परब : Chandrakant Patil यांनी राज्यातील विद्यार्थ्यांच्या कौशल्य विकासासाठी अभियांत्रिकी महाविद्यालयांमध्ये आधुनिक प्रयोगशाळा तंत्रज्ञान उपलब्ध करून देण्याचा महत्त्वपूर्ण निर्णय जाहीर केला. उद्योगांच्या बदलत्या गरजेनुसार विद्यार्थ्यांना अद्ययावत ज्ञान आणि प्रत्यक्ष अनुभव मिळावा, यासाठी प्रयोगशाळांचे आधुनिकीकरण आवश्यक असल्याचे त्यांनी स्पष्ट केले. मुंबई येथे Directorate of Technical Education Maharashtra आणि Maker Bhavan Foundation यांच्यात सामंजस्य करार करण्यात आला. या करारामुळे राज्यातील स्वायत्त अभियांत्रिकी महाविद्यालयांमध्ये आधुनिक तंत्रज्ञानयुक्त प्रयोगशाळा उभारण्याचा मार्ग मोकळा झाला आहे. या उपक्रमामुळे विद्यार्थ्यांना उद्योगसुसंगत कौशल्ये आत्मसात करण्यास मोठी मदत होणार आहे.
या प्रसंगी अपर मुख्य सचिव बी. वेणुगोपाल रेड्डी, तंत्रशिक्षण संचालक डॉ. विनोद मोहितकर, सहसंचालक डॉ. सुनील भामरे, उच्च शिक्षण संचालक डॉ. शैलेंद्र देवळाणकर तसेच मेकर भवन फाउंडेशनचे मुख्य कार्यकारी अधिकारी गौतम खन्ना उपस्थित होते. या सर्वांनी या उपक्रमाचे महत्त्व अधोरेखित केले.
या कराराअंतर्गत राज्यातील सात शासकीय व अनुदानित स्वायत्त अभियांत्रिकी महाविद्यालयांमध्ये अत्याधुनिक ‘मेकर स्पेस’ लॅब्स स्थापन करण्यात येणार आहेत. या लॅबमध्ये डिजिटल फॅब्रिकेशन सुविधा, प्रोटोटायपिंग साधने, आधुनिक उपकरणे आणि प्रकल्पाधारित शिक्षणासाठी आवश्यक पायाभूत सुविधा उपलब्ध करून दिल्या जाणार आहेत. यामुळे विद्यार्थ्यांना केवळ सैद्धांतिक नव्हे तर प्रत्यक्ष प्रयोगांद्वारे शिकण्याची संधी मिळणार आहे. या उपक्रमामुळे संशोधन, नवोन्मेष आणि नवउद्योजकतेला चालना मिळेल, तसेच स्टार्टअप्स आणि स्थानिक उद्योगांना तांत्रिक सहाय्य मिळून राज्याच्या औद्योगिक विकासाला गती मिळणार आहे. प्राध्यापकांचे प्रशिक्षण, अभ्यासक्रमाचे आधुनिकीकरण आणि उद्योग-शैक्षणिक समन्वय मजबूत करण्यासाठीही हा करार महत्त्वपूर्ण ठरणार आहे.
हा उपक्रम National Education Policy 2020 च्या उद्दिष्टांशी सुसंगत असून राज्याला कौशल्य विकास आणि तंत्रशिक्षण क्षेत्रात अग्रस्थानी नेण्यासाठी एक महत्त्वाचा टप्पा ठरणार आहे.
