NMC MBBS Mercy Attempt: एमबीबीएस विद्यार्थ्यांसाठी मोठी बातमी! प्रथम वर्ष पास होण्यासाठी मिळणार अतिरिक्त ‘मर्सी अटेम्प्ट’

NMC MBBS Mercy Attempt: नॅशनल मेडिकल कमिशनने (NMC) एमबीबीएसच्या पहिल्या वर्षाच्या विद्यार्थ्यांना मोठा दिलासा दिला आहे. वर्ष २०१९-२० आणि त्यानंतर प्रवेश घेतलेल्या वैद्यकीय विद्यार्थी/विद्यार्थिनींना प्रथम वर्षाची परीक्षा उत्तीर्ण होण्यासाठी एक अतिरिक्त अटेम्प्ट मिळणार आहे.

आता प्रथम वर्षाची परीक्षा उत्तीर्ण होण्यासाठी ५ संधी मिळतील, तर आधी केवळ चारच संधी मिळत होत्या. ही सूट त्या विद्यार्थ्यांनाही मिळेल, ज्यांनी प्रथम वर्षाचा अभ्यासक्रम पूर्ण करण्यासाठी ठरवून दिलेला ४ वर्षांचा कालावधी ओलांडला आहे, पण त्यांचा प्रवेश वैध असावा आणि संबंधित विद्यापीठ किंवा महाविद्यालयाने तो रद्द केला नसेल.

हे पाऊल अशा वैद्यकीय विद्यार्थ्यांसाठी मोठा दिलासा घेऊन आले आहे, जे पहिल्या वर्षाच्या विषयांमधील बॅकलॉगमुळे आपल्या अभ्यासात होत असलेल्या विलंबाने त्रस्त होते. ही अतिरिक्त संधी पात्र विद्यार्थ्यांना त्यांच्या आवश्यक परीक्षा उत्तीर्ण होण्यास आणि त्यांचे वैद्यकीय प्रशिक्षण पुढे नेण्यासाठी आणखी एक संधी देऊ शकते. मर्सी अटेम्प्ट देण्याच्या प्रस्तावावर २३ सप्टेंबर २०२६ रोजी NMC च्या १८ व्या बैठकीत चर्चा करण्यात आली होती.

प्रथम प्रोफेशनल MBBS परीक्षा उत्तीर्ण होण्यासाठी अधिक संधी देण्याची मागणी करणारे अनेक अर्ज आयोगाला विद्यार्थी, विद्यापीठे आणि इतर संबंधित घटकांकडून प्राप्त झाले होते. कोविड-१९ साथीच्या आजारामुळे अभ्यासात आलेला अडथळा, आरोग्याशी संबंधित समस्या आणि वैयक्तिक अडचणीची परिस्थिती अशी कारणे विद्यार्थ्यांनी त्यांच्या विनंती अर्जांमध्ये नमूद केली होती.

JEE Main 2027: जेईई मेन परीक्षेच्या तारखा जाहीर! ‘या’ दिवसापासून सुरू होणार ऑनलाइन नोंदणी

केवळ एकाच वेळेसाठी सूट

हा नवीन निर्णय प्रलंबित प्रकरणांसाठी एकदाच दिली जाणारी तात्पुरती सूट आहे. यामुळे पहिल्या वर्षाच्या MBBS परीक्षेबाबत असा कोणताही नियम तयार होत नाही, जो अमर्याद वेळा लागू करता येईल. म्हणजेच ही सूट केवळ एकाच वेळेसाठी दिली गेली आहे, कायमस्वरूपी नाही.

१० वर्षांतच पास करावे लागेल एमबीबीएस

या अतिरिक्त संधीचा अर्थ असा नाही की विद्यार्थी आपली वैद्यकीय पदवी पूर्ण करण्यासाठी हवा तितका वेळ घेऊ शकतात. NMC ने स्पष्ट केले आहे की या निर्णयानुसार MBBS कोर्स पूर्ण करण्याची कमाल मर्यादा प्रवेशाच्या तारखेपासून १० वर्षे आहे.

NMC ने सर्व संबंधित विद्यापीठे, वैद्यकीय महाविद्यालये आणि इतर भागधारकांना सल्ला दिला आहे की त्यांनी या निर्णयाची नोंद घ्यावी आणि पात्र प्रकरणांवर त्यानुसार कारवाई करावी.

IIT vs NIT Fees: IIT आणि NIT मध्ये नेमका फरक काय? जाणून घ्या कुठे मिळतो कोट्यवधींचा पगार अन् कसा होतो प्रवेश

कोणाला आणखी एक संधी मिळू शकत नाही?

ज्या विद्यार्थ्यांनी आधीच एक मर्सी अटेम्प्ट वापरला आहे आणि आपल्या सर्व पाच संधी पूर्ण केल्या आहेत, ते या नवीन निर्णयांतर्गत इतर कोणत्याही संधीसाठी पात्र असणार नाहीत. NMC ने स्पष्ट केले आहे की अशा विद्यार्थ्यांना या सवलतीअंतर्गत सहावी संधी दिली जाणार नाही, जरी त्यांनी आयोगाच्या जुन्या निर्णयाचा किंवा न्यायालयाच्या कोणत्याही निर्देशाचा हवाला दिला तरीही त्यांना अतिरिक्त संधी मिळणार नाही.