सावित्रीबाई फुले पुणे विद्यापीठाचा मोठा निर्णय; परीक्षा केंद्रांचे लेखापरीक्षण होणार

सावित्रीबाई फुले पुणे विद्यापीठाशी संलग्न महाविद्यालयांमधील आगामी परीक्षा अधिक पारदर्शक आणि शिस्तबद्ध वातावरणात पार पडाव्यात, यासाठी विद्यापीठाने परीक्षा केंद्रांचे लेखापरीक्षण करण्याचा निर्णय घेतला आहे.

• सावित्रीबाई फुले पुणे विद्यापीठाचा मोठा निर्णय
• परीक्षा केंद्रांचे लेखापरीक्षण होणार
• विद्यापीठाशी संलग्न असलेल्या सर्व संस्थांना नियम लागू

पुणे/सोनाजी गाढवे : सावित्रीबाई फुले पुणे विद्यापीठाशी संलग्न महाविद्यालयांमधील आगामी परीक्षा अधिक पारदर्शक आणि शिस्तबद्ध वातावरणात पार पडाव्यात, यासाठी विद्यापीठाने परीक्षा केंद्रांचे लेखापरीक्षण करण्याचा निर्णय घेतला आहे. परीक्षा आणि मूल्यमापन मंडळाचे संचालक डॉ. राजेंद्र तलवारे यांनी याबाबतचे परिपत्रक प्रसिद्ध केले आहे. शैक्षणिक वर्ष २०२६-२७च्या प्रथम सत्रातील परीक्षांपूर्वी हे लेखापरीक्षण पूर्ण करण्यात येणार आहे.

 

परीक्षा केंद्रासाठी संबंधित महाविद्यालयांच्या प्राचार्य आणि संचालकांना विद्यापीठाच्या परीक्षा विभागाच्या ऑनलाइन प्रणालीवर अर्ज करण्याची मुदत देण्यात आली होती. प्राप्त अर्जाची पडताळणी दिनांक १६ ते २२ सप्टेंबरदरम्यान करण्यात येत आहे. यानंतर दिनांक २६ सप्टेंबर ते ५ ऑक्टोबर या कालावधीत विद्यापीठाची विशेष समिती संबंधित परीक्षा केंद्रांची प्रत्यक्ष किंवा ऑनलाइन पाहणी करणार आहे. परीक्षा केंद्रासाठी निश्चित केलेल्या सर्व निकषांची पूर्तता करणाऱ्या महाविद्यालयांना १२ ऑक्टोबरपासून सुरू होणाऱ्या प्रक्रियेत ‘ऑक्टोबर-नोव्हेंबर’ परीक्षांपूर्वी अंतिम मान्यता देण्यात येणार आहे.

जवळच्या केंद्रावर विद्यार्थ्यांची बैठक व्यवस्था

लेखापरीक्षण मध्ये त्रुटी आढळल्यामुळे एखाद्या महाविद्यालयाला परीक्षा केंद्र म्हणून मान्यता मिळाली नाही, तर त्या महाविद्यालयातील विद्यार्थ्यांची बैठक व्यवस्था जवळच्या मान्यताप्राप्त परीक्षा केंद्रावर करण्यात येईल. अशा परिस्थितीत संबंधित महाविद्यालयाने त्या परीक्षा केंद्राला आवश्यक मनुष्यबळ आणि संसाधने उपलब्ध करून देणे बंधनकारक राहणार आहे.

हे सुद्धा वाचा : सातारा जिल्हा बँकेच्या रणधुमाळीआधी उदयनराजेंचा ‘सहकाराचा मंत्र’; निवडणुकीतील समीकरणांवर चर्चेला उधाण

चार भागातील संस्थांना नियम लागू

परीक्षा केंद्रांच्या लेखापरीक्षणाचा हा नियम पुणे, अहिल्यानगर आणि नाशिक जिल्ह्यांसह दादरा व नगर हवेली येथील पुणे विद्यापीठाशी संलग्न असलेल्या सर्व संस्थांना लागू राहणार आहे. या प्रक्रियेमुळे परीक्षा केंद्रांमधील उपलब्ध सुविधा, मनुष्यबळ आणि परीक्षा संचालनाची तयारी यांची तपासणी होऊन परीक्षा अधिक शिस्तबद्ध पद्धतीने घेण्यास मदत होणार आहे.

हे सुद्धा वाचा : नात्याला डाग! लहान भावानेच केला मोठ्या भावाचा खून; धक्कादायक कारणही आलं समोर