बिल्डर असल्याचे सांगून १४.७८ लाखांना गंडा
पुणे : प्रगती बिल्डकॉन कंपनीचा मालक असल्याचे सांगून विश्वास संपादन केला आणि १४ लाख ७८ हजार ७६० रुपयांची फसवणूक केल्याप्रकरणी चंदननगर पोलिसांनी एका आरोपीला चंद्रपूर येथून अटक केली.
सिद्धार्थ देविदास झेंडे (वय ३८, रा. म्हसोबा वाडी, ता. इंदापूर, जि. पुणे) असे अटक केलेल्या आरोपीचे नाव आहे. याप्रकरणाचा पुढील तपास पोलिस निरीक्षक अश्विनी जगताप यांच्या मार्गदर्शनाखाली सुरू आहे. पोलिस अंमलदार रमेश मेमाणे, सचिन कदम, रामदास घावटे, किरण घुटे, प्रवीण भालचिमी आणि माऊली लहाणे यांनी सहभाग घेतला.
गेल्या आठवड्यात (दि. ३ ते ४) चंदननगर परिसरातील जुना मुंढवा रोडवरील द्वारकागार्डनजवळ आरोपी सिद्धार्थ झेंडे व एका महिला तक्रारदार यांच्या दुकानात सोने खरेदीच्या निमित्ताने आले. त्यांनी तक्रारदारांचा विश्वास संपादन करून १४ लाख ७८ हजार ७६० रुपये किमतीच्या १०० ग्रॅम वजनाच्या सोन्याच्या तीन बिस्किटे घेतली. यामध्ये २५ ग्रॅम वजनाची दोन आणि ५० ग्रॅम वजनाची एक बिस्कीट होती. त्यानंतर आरोपीने त्यांना बँक खात्याचा क्रमांक देऊन त्यामध्ये पैसे जमा केल्याचे भासविले. मात्र, संबंधित खात्यात पैसे नसल्याचे समोर आले.
याप्रकरणी चंदननगर पोलिस ठाण्यात गुन्हा दाखल करण्यात आला होता. तांत्रिक विश्लेषणाच्या आधारे पोलिसांनी आरोपी चंद्रपूर येथे असल्याची माहिती मिळवली. नंतर पोलिस पथकाने चंद्रपूर येथे जाऊन आरोपीला ताब्यात घेतले. चौकशीत त्याने ज्वेलर्सकडून फसवणुकीच्या माध्यमातून घेतलेली सोन्याची बिस्किटे इंदापूर येथील एका सोनाराला विकून त्याबदल्यात रोख रक्कमा घेतल्याचे सांगितले. त्याच्याकडून सोन्याच्या विक्रीतून मिळालेल्या रकमेपैकी ८ लाख ५० हजार रुपये जप्त करण्यात आले आहेत.
लग्नाचे आमिष दाखवून फसवणूक
पोलिसांच्या प्राथमिक तपासात आरोपीने प्रगती बिल्डकॉन कंपनीचा मालक असल्याचे सांगून विविध व्यावसायिक, हॉटेल व्यावसायिक तसेच महिलांना लग्नाचे आमिष दाखवून फसवणूक केल्याचे समोर आले आहे. छत्रपती संभाजीनगर, पुणे, सोलापूर, जळगाव आणि नाशिक जिल्ह्यांमध्येही अशा प्रकारच्या फसवणुकीचे प्रकार केल्याचे तपासात निष्पन्न झाल्याचे पोलिसांनी सांगितले. आरोपीविरुद्ध यापूर्वी भिगवण आणि विमानतळ पोलिस ठाण्यांत फसवणुकीचे गुन्हे दाखल असल्याची माहितीही पोलिसांनी दिली.
.png "Videos"){kind=small}
