मावळात अनैतिक संबंधातून 22 वर्षीय तरुणाची हत्या; कोयत्याने सपासप वार केले अन्…

वडगाव मावळ पोलिसांनी दिलेल्या माहितीनुसार, मयत वैभव सातकर व आरोपी अंकुश सातकर दोघे शेजारी राहत असून, मयत वैभव सातकर याचे अनैतिक संबंध असल्याने आरोपी अंकुश सातकर याने धारदार कोयत्याने वैभव याच्या मानेवर अनेक वार केले.

वडगाव मावळ : मावळ तालुक्यात अनैतिक संबंधातून एकाने 22 वर्षीय तरुणावर कोयत्याने मानेवर वार करून खून केल्याची धक्कादायक घटना समोर आली. ही घटना मंगळवारी (दि.1) सायंकाळी पावणेआठच्या सुमारास शनि मंदिराजवळ आंबेवाडी कान्हे (ता. मावळ) येथे घडली. या घटनेने परिसरात खळबळ उडाली. काही काळ भीतीचे वातावरण निर्माण झाले होते.

वैभव उमेश सातकर (वय 22, रा. आंबेवाडी कान्हे, ता. मावळ) असे खून झालेल्या तरुणाचे नाव आहे. अंकुश जयवंत सातकर (वय 42, रा. आंबेवाडी कान्हे ता. मावळ) असे खून केलेल्या आरोपीचे नाव आहे. वडगाव मावळ पोलिसांनी दिलेल्या माहितीनुसार, मयत वैभव सातकर व आरोपी अंकुश सातकर दोघे शेजारी राहत असून, मयत वैभव सातकर याचे अनैतिक संबंध असल्याने आरोपी अंकुश सातकर याने धारदार कोयत्याने वैभव याच्या मानेवर अनेक वार केले. यात गंभीर जखमी झाल्याने जागीच मृत्यू झाला. आरोपी अंधाराचा फायदा घेत पळून गेला.

दरम्यान, या घटनेची माहिती कळताच वडगाव पोलीस स्टेशनचे पोलीस निरीक्षक कुमार कदम, सहाय्यक पोलीस निरीक्षक शितलकुमार डोईजड, पोलीस उपनिरीक्षक ऋतुजा मोहिते व पोलिसांनी धाव घेतली. पंचनामा करून मृतदेह ताब्यात घेतला. शवविच्छेदन करण्यासाठी प्राथमिक आरोग्य केंद्रात रवाना केला. याप्रकरणी पुढील तपास वडगाव मावळ पोलिस करत आहे.

प्रेमप्रकरणातून तरूणाची निर्घृण हत्या

दुसऱ्या घटनेत, वाशिमच्या शिरपूर पोलिस ठाण्याच्या हद्दीतील चांडस येथे प्रेमप्रकरणातून एका तरुणाची निर्घृण हत्या करण्यात आल्याने एकच खळबळ उडाली. महेश रुपराव हाडे (वय 35, रा. गोहगाव हाडे) असे तरुणाचे नाव असून, ही घटना रविवारी (दि. 9) घडली. याप्रकरणी शिरपूर पोलिसांनी 8 जणांविरुद्ध गुन्हा दाखल केला असून, यापैकी 5 जणांना पोलिसांनी अटक केली आहे. याबाबत मृतकाच्या भावाने सोमवारी (दि. 10) शिरपूर पोलिसात तक्रार दिली आहे.