दर्यापूरच्या आठवडी बाजारात रक्तरंजित थरार! 60 वर्षीय व्यक्तीची निर्घृण हत्या; परिसरात खळबळ

दर्यापूरंधील आठवडी बाजार परिसरात बुधवारी सायंकाळी सुमारे ५ वाजताच्या सुमारास घडलेल्या हत्येच्या घटनेने संपूर्ण परिसरात खळबळ उडाली आहे. गजानन खेडकर (वय ६०) यांची हत्या करण्यात आल्याची माहिती समोर आली आहे.

• दर्यापूरच्या आठवडी बाजारात गजानन खेडकर यांची हत्या
• जुन्या वादातून हत्या झाल्याचा प्राथमिक संशय
• येवदा पोलिसांसह फॉरेन्सिक पथकाकडून तपास सुरू

दर्यापूर : दर्यापूरंधील आठवडी बाजार परिसरात बुधवारी सायंकाळी सुमारे ५ वाजताच्या सुमारास घडलेल्या हत्येच्या घटनेने संपूर्ण परिसरात खळबळ उडाली आहे. गजानन खेडकर (वय ६०) यांची हत्या करण्यात आल्याची माहिती समोर आली असून, या घटनेमुळे नागरिकांमध्ये भीतीचे वातावरण निर्माण झाले आहे. या प्रकरणात अवधूत खोडके यांचे नाव संशयित आरोपी म्हणून समोर आले आहे. प्राथमिक माहितीनुसार, जुन्या वादातून ही हत्या झाल्याचा संशय व्यक्त केला जात आहे. मात्र, हत्येमागील नेमके कारण अद्याप स्पष्ट झालेले नसून, पोलिसांकडून विविध बाजूंनी तपास सुरू आहे.

 

घटनेची माहिती मिळताच येवदा पोलिस ठाण्याचे ठाणेदार प्रफुल्ल गाडेकर यांच्या मार्गदर्शनाखाली पोलिसांचे पथक तातडीने घटनास्थळी दाखल झाले. घटनेचे गांभीर्य लक्षात घेऊन फॉरेन्सिक पथकालाही पाचारण करण्यात आले. पथकाने घटनास्थळाची पाहणी करून महत्त्वाचे पुरावे गोळा करण्याची प्रक्रिया राबवली. आठवडी बाजार हा परिसरातील नागरिकांच्या गर्दीचा ठिकाण असल्याने सायंकाळच्या वेळेत घडलेल्या या घटनेने नागरिकांमध्ये चिंतेचे वातावरण पसरले आहे. भरवस्तीत आणि बाजाराच्या ठिकाणी घडलेल्या या गंभीर घटनेमुळे परिसरातील सुरक्षिततेचा प्रश्नही ऐरणीवर आला आहे.

दरम्यान, या प्रकरणाचा पुढील तपास येवदा पोलिस ठाण्याचे ठाणेदार प्रफुल्ल गाडेकर करीत आहेत. पोलिसांकडून घटनास्थळावरील पुरावे, प्रत्यक्षदर्शींची माहिती आणि इतर बाबींच्या आधारे तपास सुरू आहे. तपास पूर्ण झाल्यानंतर हत्येमागील नेमके कारण आणि घटनेचा संपूर्ण घटनाक्रम स्पष्ट होणार आहे. या घटनेमुळे दर्यापूर परिसरात एकच चर्चा सुरू असून, पोलिस तपासातून काय निष्पन्न होते, याकडे नागरिकांचे लक्ष लागले आहे.

हे सुद्धा वाचा : दिवाळीच्या दिवशी काळाचा घाला! भरधाव ट्रकची दुचाकीला भीषण धडक; 27 वर्षीय तरुणाचा जागीच मृत्यू

नागपुरात भांडणात मध्यस्थी करणाऱ्यावरच हल्ला

मित्रासोबत सुरू असलेल्या वादात मध्यस्थी करण्यासाठी गेलेले देवेंद्र उत्तमराव सावरकर (वय ५०, रा. न्यू पँथरनगर, नंदनवन) यांच्यावर दोघांनी हल्ला करून गंभीर जखमी केल्याची धक्कादायक घटना उघडकीस आली आहे. आधी मारहाण केली आणि नंतर लोखंडी कडा व दगडाने वार केल्याने त्यांच्या पायाचे हाड फॅक्चर झाले. याप्रकरणी नंदनवन पोलिसांनी दोघांना अटक केली आहे. अमन उत्तम मेश्राम (वय २५, रा. पडोळेनगर, वाठोडा रोड) आणि अश्लेष शिवशंकर अडिकने (वय २९) अशी आरोपींची नावे आहेत.